प्रधानमन्त्रीका रूपमा प्रचण्डले गरे आफ्नै रेकर्ड ब्रेक, के सरकारको नेतृत्व फेरिएला ?

प्रधानमन्त्रीका रूपमा प्रचण्डले गरे आफ्नै रेकर्ड ब्रेक, के सरकारको नेतृत्व फेरिएला ?

A+ A A-

पुष्पकमल दाहाल प्रचण्ड तेस्रोपटक प्रधानमन्त्री भएको एक वर्ष पुग्न पाँच दिन मात्रै बाँकी छ । यसअघि दुई कार्यकाल प्रधानमन्त्री भएका प्रचण्डले नौ-नौ महिनाको कार्यकाल राज्यको बागडोर सम्हालेका थिए । त्यसैले उनलाई नौमहिने खड्को हुने गर्छ । तर, तेस्रोपटक भने प्रचण्डले दुई कार्यकालको रेकर्ड तोडेका छन् ।

१० पुसमा प्रचण्ड प्रधानमन्त्री भएको एक वर्ष पुग्छ । यसअघि २०६५ साउनमा पहिलोपटक प्रधानमन्त्री बनेका प्रचण्ड नौ महिना मात्रै प्रधानमन्त्रीको कुर्सीमा रहे । दोस्रोपटक प्रधानमन्त्री बनेका प्रचण्डले २०७३ साउनदेखि २०७४ जेठसम्म देशको बागडोर सम्हाले । त्यसैले प्रधानमन्त्रीका रूपमा प्रचण्डले यसपटक एक वर्षको शासन अनुभव गर्न पाएका छन् ।

प्रधानमन्त्री बन्न एमालेसँग मिले र सरकार चलाउन कांग्रेससहितको गठबन्धनको साथ लिए । कार्यकालमा अस्थिर प्रचण्ड सरकारले स्थिर सन्देश र डेलिभरी दिन सकेन भनेर मन्त्री हेरफेरको चेतावनी दिइरहेका छन् । सरकारले राम्रो काम गर्न प्रयास गर्दागर्दै पनि अहिले काम परिणाममुखी हुन नसकिरहेको ब्रिफ पार्टीको बैठकमा गरेका छन् । उनले मन्त्रीहरूको कार्यसम्पादनमा सुधार नआए ‘बोल्ड’ कदम चाल्ने भन्दै तर्साइरहेका छन् ।

प्रचण्डको तेस्रो कार्यकाल गल्ती, राजनीतिक हस्तक्षेप, नातावाद र चरम भ्रष्टाचारको आरोपमा रुमल्लिएको छ । उनको नेतृत्वमा रहेको गठबन्धनले निर्वाचनको जनादेश खेर फालेको छ । संसदको सबैभन्दा ठूलो दल सत्तारुढ नेपाली कांग्रेसका नेताहरूले सरकार भए/नभएको जनताले आभास गर्न नसकेको बताउँदै आएका छन् । कांग्रेस इतर समूहका नेता शेखर कोइरालाले कांग्रेसको नेतृत्वमा सरकार तत्काल बनाउनुपर्ने बताइरहेका छन् । कांग्रेस महामन्त्री गगन थापाले सरकारले १०० मा १० अंक पाउने बताएका छन् । पुस १ मा पर्वत पुगेका उनले भनेका छन्, ‘अहिलेको सरकारले १०० मा १० अंक मात्र प्राप्त गर्ने काम गरेको हुँदा अब अंक बढाउने काम गर्नुपर्छ ।’

कांग्रेस नेताहरूको सरकार फेर्ने तारन्तारको अभिव्यक्ति, प्रचण्ड स्टन्टमा रमाएको आरोप

अहिले सुशासन ठप्प छ, अर्थतन्त्र अस्तव्यस्त छ, यसबारे जानकार प्रधानमन्त्री प्रचण्डले कांग्रेस सभापति शेरबहादुर देउवालाई प्रधानमन्त्रीको जिम्मेवारी हस्तान्तरण गर्न अझै एक वर्ष बाँकी छ । त्यसैले प्रधानमन्त्री प्रचण्डले आफ्नो मन्त्रिपरिषद् हेरफेर गर्ने सोचमा रहनुले सकारात्मक नतिजा खोजेको देखिन्छ ।

कांग्रेसका नेताहरूले प्रचण्ड सरकारको विकल्प खोज्नुपर्छ भनिरहँदा पार्टीमा संस्थागत रूपमा भने यसबारे छलफल भएको छैन । ‘पाँचवर्षे योजना बनाएर गठबन्धनको सरकार बनेको हो । सोअनुसार अहिले प्रचण्डजीले सरकारको नेतृत्व गर्नुभएको छ । त्योभन्दा दायाँ-बायाँ गर्न पार्टी र सभापतिले सोच्नुभएको छैन । अहिले असहज परिस्थिति बनेको छ । भ्रष्टाचार बढेको छ । सरकारले लय पक्रिएन भन्नेमा गुनासो छ । तर, अहिले सरकार परिवर्तन गरिहाल्ने भन्नेमा कांग्रेस छैन,’ कांग्रेस प्रचार विभाग प्रमुख मीन विश्वकर्माले शिलापत्रसँग भने ।

सरकारको नेतृत्व गरिरहेको दल माओवादी केन्द्रले सरकार परिवर्तनको बहस गर्ने समय नआएको बताएको छ । ‘अहिले सरकार परिवर्तनको कुनै सम्भावना छैन । कांग्रेसभित्र पनि व्यक्ति विशेषले भनेका हुन् । सभापतिज्यूले केही भन्नुभएको छैन र संस्थागत निर्णय पनि आएको छैन,’ माओवादीका प्रवक्ता अग्नि सापकोटाले शिलापत्रसँग भने, ‘गठबन्धनमा समस्या छैन । नचाहिने कुरामा टाउको दुखाउनु पर्दैन ।’

कांग्रेस, माओवादीसहित एकीकृत समाजवादी, जनता समाजवादी, जनमत पार्टी, नागरिक उन्मुक्ति पार्टी, नेपाल समाजवादी पार्टी र लोकतान्त्रिक समाजवादी सरकारमा छन् । जसपा र जनमत पार्टी पनि वर्तमान सरकारलाई नै निरन्तरता दिनुपर्ने पक्षमा छन् ।

जनमत पार्टीले सरकार परिवर्तन गरिरहँदा गलत सन्देश जाने र मन्त्रीहरू फेरबदल भएसँगै नतिजामा प्रभाव पर्ने भएकाले फेरबदल गर्न नहुने बताएको छ । ‘सरकार परिवर्तन गरिरहँदा डेलिभरी झन् कमजोर हुन्छ । वर्तमान सरकारमा भएका कमजोरी सुधार्नुपर्छ । हाम्रो एक मात्र मन्त्रालयमा कार्यसम्पादनमा ७० भन्दा बढी अंक छ । हाम्रो कारण गठबन्धनमा प्रभाव पर्ने पनि होइन,’ पार्टी प्रवक्ता डा. शरदसिंह यादवले शिलापत्रसँग भने ।

वर्तमान सरकारसँग ‌बढी असन्तुष्ट देखिएको जसपा पनि सरकारको निरन्तरताको पक्षमा छ । गौर नरसंहारको फाइल ब्युँताएपछि सरकार छाड्ने चेतावनी प्रधानमन्त्री प्रचण्डलाई भेटेर अध्यक्ष उपेन्द्र यादवले दिएका थिए ।

‘सरकारसँग हाम्रा असन्तुष्टि होलान् । त्यसलाई सम्बोधन गर्नुपर्छ । तर, सरकार परिवर्तन गर्नुपर्छ भन्नेमा हाम्रो पार्टी छैन,’ जसपाका प्रवक्ता मनिष सुमनले भने ।

प्रकाशित मिति: बिहीबार, पुस ५, २०८० १९:०७