कांग्रेस नेताहरूको सरकार फेर्ने तारन्तारको अभिव्यक्ति, प्रचण्ड स्टन्टमा रमाएको आरोप

कांग्रेस नेताहरूको सरकार फेर्ने तारन्तारको अभिव्यक्ति, प्रचण्ड स्टन्टमा रमाएको आरोप

A+ A A-

गत वर्ष भएको संघीय चुनावअघि तत्कालीन सत्ता गठबन्धनमा सहमति थियो- सरकारको पाँच वर्षमा पहिलो दुई वर्ष माओवादी केन्द्र, बीचको एक वर्ष एकीकृत समाजवादी र अन्तिम दुई वर्ष चुनावी सरकारको नेतृत्व कांग्रेसले गर्ने ।

चुनावबाट ठूलो दल बनेको कांग्रेसले पहिले प्रधानमन्त्री बन्नुपर्ने संस्थागत निर्णय लिएपछि माओवादी अध्यक्ष पुष्पकमल दाहाल प्रचण्ड एमालेको सहयोग लिएर प्रधानमन्त्री बन्न गए र प्रधानमन्त्री बनेर पुरानो गठबन्धनमा फर्किए ।

अहिले पुरानो सहमति बिर्सेर कांग्रेस नेताहरू सहमतिको समयअगावै सरकारको नेतृत्व माग गर्न थालेका छन् । विशेष गरी कांग्रेसका नेता डा. शेखर कोइराला प्रचण्ड नेतृत्वको सरकार फेर्नुपर्ने बताइरहेका छन् । कांग्रेसको नेतृत्वमा सरकार बने मात्र लोकतन्त्र र राष्ट्रियता बलियो हुने उनको दलिल छ ।

बुधबार पनि उनले ८९ सिट जितेर कांग्रेस पहिलो दल बने पनि ३२ सिटमा सीमित माओवादीलाई सकारको नेतृत्व दिनुपरेको गुनासो गरे । बीपी युथ सर्कलले बुधबार काभ्रेको धुलिखेलमा आयोजना गरेको युवाहरूको विचार सम्मेलनमा उनले निर्वाचन प्रणालीमै खराबी भएको विश्लेषण सुनाए ।

‘८९ सिट भएको कांग्रेसले ३२ सिट भएको माओवादीलाई सरकार दिनुपरेको छ । निर्वाचन प्रणाली नै यस्तो छ, त्यसले कुनै पनि पार्टीको बहुमत आउन सक्दैन । मिलीजुली सरकार हुनुपर्छ,’ उनले भने, ‘दुर्भाग्य नेपाली कांग्रेस मात्र डेमोक्रेटिक पार्टी छ । हाम्रो कमीकमजोरीको बाबजुत पनि अन्तर्राष्ट्रिय छवि छ, यो भनेको लोकतान्त्रिक दल भन्नेछ । त्यो छवि बचाउन कस्तो निर्वाचन प्रणाली बनाउन सक्छौँ र त्यो प्रणालीले समावेशिता कसरी बनाउन सकिन्छ, त्यो अन्त्यै जरुरी छ ।’

शेखरले बीपी जयन्तीको सन्दर्भमा हेटौँडा पुगेर कांग्रेसकै समर्थनमा निर्माण भएको हालका सरकार परिवर्तन गर्ने वा नगर्ने विषयमा पार्टीभित्र छलफल हुने बताए ।

‘देशमा द्वन्द्व गराउने र द्वन्द्व निम्त्याउने प्रयास भइरहेकाले प्रधानमन्त्रीको अभिव्यक्तिले देशलाई अप्ठ्यारो पारिरहेको छ,’ उनले भने । कांग्रेस संसदको ठूलो दल भएकाले विचार गरेर अघि बढ्ने उनले बताएका थिए । ‘हामी देशकै ठूलो दल हौँ । हाम्रो ९० सिट छ । यो सबै विषयलाई विचार गरेर अगाडि बढ्छौँ,’ उनको भनाइ थियो ।

भदौ २२ गते सञ्चारकर्मीहरूसँग उनले कांग्रेसले सरकारको नेतृत्व गर्नुपर्ने बताए । कांग्रेसको नेतृत्वमा सरकार बन्दा अराजकता घट्ने र प्रजातन्त्र बाँच्ने उनको तर्क थियो ।

‘सरकारको नेतृत्व नेपाली कांग्रेसले नै गर्नुपर्छ । मैले एक स्टेप अघि बढेर सभापति शेरबहादुर देउवा भएकै कार्यक्रममा केही दिनअघि यो कुरा राखेको थिएँ । कांग्रेस नेतृत्वमा सरकार भयो भने मानिसहरूलाई कम्तीमा प्रजातन्त्र त बाँच्छ भन्ने लाग्छ,’ उनले भनेका थिए, ‘अहिले जति अराजकता छ, कांग्रेस नेतृत्वमा सरकार बनेपछि त्यो घट्छ भन्ने मलाई विश्वास छ । निमिट्यान्न नभए पनि आधा त घट्ला ! हामी ९ मन्त्रालयसहित अहिलेको सरकारमा छौँ । तर, जनता र कार्यकर्तालाई सरकारमा भएको अनुभूति भएको जस्तो मलाई लागेको छैन ।’

देशमा फैलिएको राजनीतिक, आर्थिक, सामाजिक, सांस्कृतिक धार्मिक अराजकता नियन्त्रण गर्न पनि कांग्रेसको सरकार आवश्यक रहेको उनको बुझाइ छ ।

प्रधानमन्त्री प्रचण्ड भने सरकारको आयुबारे चिन्ता नरहेको बताउन थालेका छन् । कहिले जातीय राज्य दिन्छु भन्छन्, कहिले सरकारबाट हटाइए जनतालाई सडकमा ओरारेल आन्दोलन गर्छु भन्छन् । यसलाई कांग्रेसका नेताहरूले रुचाएका छैनन् ।

साउन २४ गते प्रधानमन्त्री प्रचण्डले बहुमत पाए प्रदेशको नाम पहिचनको आधारमा राख्ने बताएका थिए । उनले भनेका थिए, ‘२०८४ मा पहिचान पक्षधरलाई टन्नै मत हाल्दिनुभयो भने सदनैबाट त्यही पारित हुन्छ । अहिलेको घटनाक्रमले नयाँ चेतना हामी सबैमा पैदा भएको छ । चेतनाको बलमा पहिचानसहितका प्रदेशहरूको नामकरण गर्न सकिन्छ ।’

प्रधानमन्त्री प्रचण्डले भदौ १४ गते बर्खा सिद्धिएपछि लाखौँ जनतालाई सडकमा उतार्ने बताएका थिए । ‘केही दिनपछि, बर्खा सिद्धिएपछि लाखौँ जनतालाई सडकमा ल्याएर राष्ट्रियताको पक्षमा, जनजीविकाका पक्षमा, सामाजिक न्यायको पक्षमा र भ्रष्टाचारविरुद्ध जगैदेखि हल्लाइदिनुपर्ने हुन्छ । जनतालाई सडकमा नल्याई सरकारले नै गर्देला र खाउँला भन्नु भुल हो,’ उनले भनेका थिए ।

भदौ १६ गते काठमाडौंमा पाँचै वर्ष प्रधानमन्त्री बन्ने परिस्थिति बन्दै गएको बताएका थिए ।

यी अभिव्यक्तिले मात्र होइन कांग्रेलाई आफ्ना नेतालाई थुनामा पठाउनु र माओवादीका नेतालाई नछोएर पक्षपाती व्यवहार देखाएको भन्दै कांग्रेस प्रधानमन्त्री र गृहमन्त्रीसँग आक्रोशित छ । नक्कली भुटानी शरणार्थी प्रकरणमा कांग्रेस नेता बालकृष्ण खाँण पुर्पक्षका लागि थुनामा रहेको विषयले कांग्रेस आक्रोशित छ । खाँणविरुद्ध उजुरी नपरेको र म्यासेजका भरमा पक्राउ गरिएको कांग्रेसका नेताको बुझाइ छ ।

सुन प्रकरणमा मुछिएका माओवादी नेता कृष्णबहादुर महरालाई सोधपुछ समेत नगरेको भन्दै भ्रष्टाचार निर्मुल पार्ने सरकारको अभियानमा दाग देख्छन् कांग्रेस नेताहरू । सरकार सञ्चालन गर्दा मनोमानी ढंगले चलेको, काम भन्दा प्रचारवाजी र स्टन्ट गर्न रमाएको कांग्रेस नेताहरूको आरोप छ ।

‘सरकार र गठबन्धनको मुख्य पार्टी हामी हौँ । मुख्य दललाई जानकारी नदिइ मनोमानी ढंगले चल्नु राम्रो हुँदैन । हात्ती आयो हात्ती आयो फुस्सा भने जस्तो भ्रष्टाचारका काण्डहरूमा हल्ला भयो । काम भएन । सरकारले पनि स्टन्ट गर्न भएन नि,’ कांग्रेस सांसद सञ्जय गौतमले शिलापत्रसँग भने ।

सरकारको अपजसको भारी कांग्रेसले नबोक्ने उनले बताए । जनतामा आसाको सञ्चार होस् भन्ने कांग्रेसले चाहेको उनले बताए । ‘प्रचण्ड नेतृत्वको सरकारलाई समर्थन गर्दैगर्दा यी समस्याको समाधान गर्ने र नेपाली जनतामा आसा सञ्चार होस् भन्ने खोजेको हो । सुशासनको प्रत्याभूति देओस् सुशासन होस् भन्ने हो । अपजसको भारी त बोक्न सक्दैन कांग्रेसले,’ गौतमले भने, ‘अब कांग्रेसको नेतृत्वमा सरकार नबनी निकास नपाउने हो कि भन्ने भएको हो । यतिन्जेल सरकारलाई हेरेका हौँ । राष्ट्रिय अन्तराष्ट्रिय सहयोग छ । शेखर दाईले त्यही भन्नुभएको हो ।’

कांग्रेसका बुझाइमा सरकारले जे-जे कुराहरूलाई प्राथमिकता दिनुपर्ने थियो त्यसलाई दिएको देखिँदैन । भ्रष्टाचारलाई निर्मुल पार्दै आर्थिक रूपमा ओरालो लागेको अर्थतन्त्रलाई पुरानो लयमा फर्काउनुपर्ने दायित्व सरकारको हो ।

‘भ्रष्टाचार नियन्त्रणको नाममा सरकार जथाभावी अगाडि बढ्न थाल्यो । अर्थतन्त्रलाई व्यवस्थित गर्न खासै पहल गरेको केही पनि देखिएन,' कांग्रेस प्रचार विभाग प्रमुख मीन विश्वकर्माले शिलापत्रसँग भने, ‘भ्रष्टाचार नियन्त्रणमा भ्रष्टाचारीलाई नपक्रिएर नदेखिएका भ्रष्टचारीलाई पक्रियो । भ्रष्टाचार नियन्त्रणमा गरे भनेर स्टन्टबाजीमा गयो सरकार । त्यसले जनतामा सरकारको विश्वास कम हुन्छ । अब कांग्रेसका जिम्मेवार नेताहरूले आफ्ना कुराहरूलाई अभिव्यक्त गर्न थाल्नुभएको छ ।’

इतर समूहका नेता शेखरले सरकारको नेतृत्व कांग्रेसले नै गर्नुपर्छ भन्नुको कारण भने प्रचण्डको विकल्प मात्र देखिन्छ । उनले वर्तमान गठबन्धनबाट नै कांग्रेस नेतृत्वको सरकार भनिरहेका छन् । त्यसो भए पार्टीमा संसदीय दलको नेता प्रधानमन्त्री बन्ने व्यवस्थाअनुसार सभापति शेरबहादुर देउवा प्रधानमन्त्री बन्न सक्छन् ।

‘जनता यो सरकारमा आश्वस्त हुन सकेका छैनन् । यसको विकल्पमा अर्को सरकार बन्नुपर्छ भन्ने कुरा भएन । आलोपालोको हिसाबमा कांग्रेसको पालो पनि छ । उहाँले यो अर्थमा भन्नुभएको हो,’ प्रचार विभाग प्रमुख विश्वकर्माले भने ।

लामो समय यो सरकार जाँदा झन् बिग्रने कांग्रेस नेताहरूको बुझाइ छ । प्रधानमन्त्रीको अभिव्यक्तिको सिको गरेर नगर प्रमुखहरूले भनि भड्काउ अभिव्यक्ति दिन थालेको विश्वकर्माले बताए ।

‘प्रधानमन्त्रीज्यूले पनि भड्काउने अभिव्यक्ति दिनुभयो । सरकार छोड्न परे लाखौँ जनता सडकमा ल्याउँछु भन्ने त्यसैका सिको गरेर मेयरहरूले सिंहदबारमा आगो लाउछु भन्ने उत्ताउला अभिव्यक्ति आउन थाले । यसले राजनीतिक अस्थिरतालाई बढावा दिन्छ,’ उनले भने ।

केही दिनअघि काठमाडौं महानगरका प्रमुख बालेन शाहले सामाजिक सञ्जालमा सिंहदरबारमा आगो लगाउने बताएका थिए ।

शेखर मात्र होइन सत्तारुढ दल एकीकृत समाजवादीका सम्मानित नेता झलनाथ खनाल पनि सरकारको रवैया यस्तै रहिरहे धेरै दिन नटिक्ने बताउँछन् । ‘सरकार अब ढल्छ भनेको होइन तर यस्तै रवैया रहयो भन्ने टिक्दैन । म अहिले पनि भन्छु,’ उनले बुधबार जनकपुरमा भने ।

शेखरले प्रधानमन्त्री प्रचण्डको विकल्प खोजिरहँदा पाँचै वर्ष प्रधामन्त्री बन्ने सम्भावना पनि देख्छन् । ‘सरकार परिवर्तन हुनुपर्छ र कांग्रेसकै नेतृत्वमा भनेर मैले भनिराखेको छु । तर अहिले नै सरकार परिवर्तन हुने त म देख्दिनँ । अहिले जे–जसरी अघि बढेका छौँ, त्यसले त प्रचण्डजीलाई धेरै नै सहज बनाइदिएको छ । उस्तै परे उहाँ नै ५ वर्ष प्रधानमन्त्री हुन बेर छैन,’ शेखरले भनेका छन् ।

कांग्रेसले आवश्यक परेमा राष्ट्रिय सहमतिको सरकार बनाउन पहल गर्ने सांसद गौतम बताउँछन् ।

‘प्रचण्डजी त्यो दाउमा हुनुहुन्छ होला । सबैतिर सन्तुलन मिलाएर भरसक हुन्छु भन्ने लागेको होला । हामीले नेतृत्व नगरिकन मुलुकले स्थायी बाटो लिँदैन कि,' गौतमले भने, 'आवश्यक परेमा सबै शक्ति मिलाएर राष्ट्रिय सहमतिको सरकार पनि बनाउन पर्छ कि भन्ने लागेको छ ।’

प्रकाशित मिति: बुधबार, भदौ २७, २०८० १९:५७