‘रिफर सेन्टर’को आरोप खेपेको हेटौँडा अस्पताल ३०० शय्यामा स्तरवृद्धि, ६६ वर्षपछि सुधारको संकेत

‘रिफर सेन्टर’को आरोप खेपेको हेटौँडा अस्पताल ३०० शय्यामा स्तरवृद्धि, ६६ वर्षपछि सुधारको संकेत

A+ A A-

विगत लामो समय ‘रिफर सेन्टर’ को आरोपबाट गुज्रिएको मकवानपुरको सरकारी अस्पताल सुधारोन्मुख अवस्थामा छ ।

२०७५ अघिसम्म संघीय सरकार मातहतको जिल्लाकै ठूलो हेटौँडा अस्पतालमा सामान्य उपचार मात्रै हुने र जटिल प्रकारका बिरामी चितवन जानुपर्ने बाध्यकारी अवस्थाले लामो समय ‘रिफर सेन्टर’को आरोप लागेको थियो । यतिसम्मकी अस्पतालमा कुनै बेला भिडियो एक्स–रे गर्नसमेत सुविधा थिएन । रुखा, खोकी, ज्वरोको मात्रै उपचार हुने हेटौँडा अस्पतालले अब भने मिर्गौला प्रत्यारोपणसम्मकै उपचार सेवा दिने तयारी थालिसकेको छ ।

बागमती प्रदेश सरकारको निरन्तर चासोका कारण हेटौँडा अस्पताल निरन्तर सुधारको गतिमा अगाडि बढेको छ । विगतमा भौतिक संरचना र बजेट अभावले पर्याप्त सेवासुविधा दिन नसकेको अस्पताललाई प्रदेश सरकारको मदन भण्डारी स्वास्थ्य विज्ञान प्रतिष्ठान मातहत ल्याएपछि स्तृरवृद्धिको क्रम अगाडि बढेको हो । विगतमा संघीय सरकारको ५० शय्या (बेड) र अस्पताल व्यवस्थापन समितिको ६० गरी ११० शय्याको क्षमतामा काम गरिरहेको अस्पताललाई प्रदेश सरकारले स्तरोन्नति गर्ने निर्णय गरेको छ ।

विदेशी दातृनिकाय यूएसआइडीको सहयोगमा २०१६ सालमा १५ शय्याबाट स्थापना भएको अस्पताललाई २०२२ सालमा जिल्ला अस्पतालका रूपमा स्तरोन्नति गर्दै तत्कालीन सरकारले २५ शय्याको बनाएको थियो । २०३० देखि अस्पताल ५० शय्याको बनेको थियो । तर, त्यतिबेला पूर्वाधार र जनशक्तिले गर्दा रेफर गर्ने अस्पतालको परिचय बनेको थियो । मुलुक संघीयतामा गएसँगै हेटौँडा अस्पतालले काँचुली फेर्न सुरु गरेको छ ।

बागमती प्रदेश सरकार मन्त्रिपरिषद्को बैठकले हेटौँडा अस्पताललाई ३०० शय्याको क्षमतामा स्तरोन्नति गर्ने निर्णय गरेसँगै कुनै बेला ‘रिफर’ सेन्टर बनेको अस्पताल सुधारिने निश्चित छ । कानुनत: प्रदेश सरकारले आफ्नो मातहतको अस्पताललाई २०० शय्यासम्म स्तरवृद्धि गर्न सक्छ । जसअनुसार प्रदेश सरकारले हेटौँडा अस्पतालमा थप २ सय शय्या थप्ने भएको हो । हाल अस्पताल सञ्चालन तथा व्यवस्थापन समितिको ६० शय्यामा ४० थप गरेर १०० पुर्‍याउने र प्रदेश सरकारले थपेको २०० शय्या गरी कुल ३०० शय्याको क्षमतामा अस्पताल सञ्चालन हुने भएको समितिका सदस्य उत्सव चौलागाईंले जानकारी दिए ।

प्रदेशका स्वास्थ्यमन्त्री उत्तम जोशीका अनुसार प्रदेश सरकारले हेटौँडा अस्पतालसहित प्रदेश सरकार मातहतका १० अस्पतालको स्तरोन्नति गर्ने निर्णय गरेको हो । प्रदेश मन्त्रिपरिषद्ले हेटौँडा अस्पताल मकवानपुर र भक्तपुर अस्पताल भक्तपुरलाई ३०० शय्यामा स्तरोन्नति गर्ने निर्णय गरेको मन्त्री जोशीले जानकारी दिए ।

यसैगरी, धादिङ अस्पताल धादिङबेसी, त्रिशुली अस्पताल नुवाकोट, सिन्धुली अस्पताल सिन्धुली र बकुलहर अस्पताल चितवनलाई १०० शय्यामा स्तरोन्नति गरिने भएको छ । सिन्धुपाल्चोक अस्पताल, रामेछाप अस्पताल, दोलखाको पशुपति चौलागाईं अस्पताल र काभ्रेको मेथिनकोट अस्पताल ५०-५० बेडमा स्तरोन्नति गर्ने निर्णय भएको मन्त्री जोशीले बताए । प्रदेश स्वास्थ्य मन्त्रालयको १ हजार ६ सय ६९ जना (प्राविधिकसहित) कर्मचारीको संगठन संरचना स्वीकृत पनि गरिएको छ ।

हेटौँडा अस्पताल ३०० शय्यामा स्तरवृद्धि भएसँगै थप विशेष चिकित्सकको आवश्यकता पर्दछ । विशेषज्ञ चिकित्सकका लागि सरकारले दरबन्दी जारी गरेपछि सेवामा पनि विस्तार गर्न सकिने हेटौँडा अस्पताल सञ्चालन तथा व्यवस्थापन समिति सदस्य चौलागाईं बताउँछन् । ३०० शय्या भएपछि अस्पताललाई मुटु रोग विशेषज्ञ, न्युरो सर्जन, मिर्गौलासम्बन्धी चिकित्सकलगायतको दरबन्दी बढाउनुपर्ने उनले बताए । अस्पताल स्तरवृद्धि भएसँगै मदन भण्डारी स्वास्थ्य विज्ञान प्रतिष्ठानलाई एमबीबीएस र एमडी अध्यापनका लागि बाटो पनि खुलेको छ ।

हेटौँडा अस्पताललाई ३०० शय्याको क्षमतामा सञ्चालन गर्न पूर्वाधार पर्याप्त रहेको उनले जानकारी दिए । ‘हामीसँग पूर्वाधार पर्याप्त छ । अत्यावश्यक स्वास्थ्य सामग्री पनि जडान भएर केही सुचारु र केही सञ्चालनको तयारीमा छ । तर, पूर्ण क्षमतामा चलाउन जनशक्ति अभाव हुन्छ । जनशक्तिको व्यवस्थापन प्रदेश सरकारले गर्छ’, उनले भने ।

हेटौँडा अस्पतालको पाँच तले नयाँ भवन निर्माणाधीन रहेको समिति सदस्य चौलागाईंले जानकारी दिए । निर्माणाधीन भवन २०० शय्याका लागि हो । निर्माणाधीन भवन २०८२ सालभित्र समितिलाई हस्तान्तरण गर्नुपर्ने उनले बताए ।अस्पताल प्रदेश मातहत आएपछि एमआरआई, सिटीस्क्यान, अत्याधुनिक प्रयोगशाला, १७ बेडको आइसीयू र एचडीयू सञ्चालन गरिएको छ । विगतमा ७ वटा बेडबाट आकस्मिक कक्ष चलाएको अस्पतालमा हाल २५ बेड रहेको सदस्य चौलागाईंले जानकारी दिए ।

अस्पतालमा मनोचिकित्सक वार्ड सञ्चालन हुँदैछ । एनआइसीयू सञ्चालनको तयारीमा रहेको उनले बताए । विगतमा एउटा अपरेशन थिएटरबाट चलेको अस्पतालमा निकट भविष्यमै चारवटासम्म अपरेशन कक्ष सञ्चालन हुने चौलागाईं बताउँछन् । हेटौँडा अस्पतालमा मिर्गौला प्रत्यारोपण सेवा थप गर्ने गरी तयारी थालिएको छ । प्रदेश सरकारको ५ करोड बढी रकम लागतमा अस्पतालमा मिर्गौला प्रत्यारोपणका लागि आवश्यक तयारीको काम भइरहेको हो । अस्पतालले मिर्गौला प्रत्यारोपण सेवा सञ्चालनका लागि शहीद धर्मभक्त राष्ट्रिय प्रत्यारोपण केन्द्र भक्तपुरको प्राविधिक सहयोगमा काम अघि बढाएको हो । अस्पतालमा हाल चिकित्सक करिब ६६ जना गरी कुल कर्मचारी २ सय ९१ जना रहेका छन् ।

प्रकाशित मिति: बिहीबार, पुस ५, २०८० १२:५५