‘कुरा राख्न त हामीले पनि जानेका छौँ, डेमोक्रेटिक कन्ट्रीको डेमोक्रेटिक चिफ हुँ’

‘कुरा राख्न त हामीले पनि जानेका छौँ, डेमोक्रेटिक कन्ट्रीको डेमोक्रेटिक चिफ हुँ’

A+ A A-

प्रधान सेनापति प्रभुराम शर्मा बुधबार प्रतिनिधिसभाको राज्यव्यवस्था तथा सुशासन समितिमा काठमाडौं–तराई–मधेश द्रुत मार्गबारे उठेका प्रश्नको जवाफ दिन आए । करिब २ घण्टा सांसदहरूले प्रधान सेनापति शर्मालाई प्रश्न गरे । सांसदहरूका प्रश्न थिए– हालसम्म २७ प्रतिशत मात्र काम किन ? सेनाको काम ठेक्कापट्टा गर्ने हो ? सिमानाको रक्षा कसले गर्छ ? फास्ट ट्र्याक कि कछुवा ट्र्याक ? सेनामा भद्रगोल, मनपरी किन ? भ्रष्टाचार र अनियमितताको आशंका छ नि ? २०८३ सालमा आयोजना सम्पन्न हुन्छ कि हुँदैन ?

सांसदहरूबाट आएका यी प्रश्न प्रधान सेनापति शर्माले धैर्यतापूर्वक सुने । र, अधिकांश प्रश्नको जवाफ उनको भावभंगीले पनि दिइरहेको थियो । सांसदहरूको प्रश्न सकिएपछि सभापति रामहरि खतिवडाले प्रधान सेनापति शर्मालाई बोल्न समय दिए । सांसदहरूका प्रत्येक प्रश्नको सटिकमा जवाफ फर्काए उनले ।

393086928_774248747804581_4859841913210367626_n1703079401.jpg

सेनाले फास्ट ट्र्याक मागेको होइन

सेनाको काम ठेक्कापट्टा गर्ने हो ? भन्ने प्रश्नमा प्रधान सेनापति शर्माले आफूहरूले सरकारसँग नमागेको स्पष्ट पारे । ‘माननीयज्यूहरू, नेपाली सेनाले फास्ट ट्र्याक कहिल्यै मागेको होइन, हामीले मागेर भएको होइन, तपाईंहरूले दिएको हो । तपाईंहरूको सरकारले दिएको हो । सहर्ष स्वीकार गरेर हामीले काम गरिरहेका छौँ । कोसिस गरिरहेका छौँ । ठेक्कापट्टाको कुरा आयो । पैसा, द्रव्यको कुरा भगवान्‌को पालादेखि नै उठ्ने कुरा हो । अहिले आधुनिक संसारमा उठ्नु स्वाभाविक हो । तर, नेपाली सेनाले गलत काम गर्दैन,’ रक्षात्मक देखिए सेनापति शर्मा ।

अनियमितता र भ्रष्टाचार भएको प्रश्नलाई उनले अस्वीकार गरे । ‘नियमकानुनको परिधिभित्र रहेर पारदर्शी ढंगले सेनाले काम गर्छ । केही काम भएको पनि होला । विद्वान् र ऋषिमुनिले पनि गल्ती गरेका छन् । गल्ती हुँदैन भन्दिनँ । गल्ती भएमा करेक्सन गर्नुपर्छ । आर्थिक अनियमितमा हुनु हुँदैन,’ उनले भने, ‘ठेक्कापट्टा लगाउने रहर छैन । नेपाल सरकारले बनाएको नियम कानुनको परिधिभित्रबाट लगाएको हो । भ्रष्टाचार हुन दिँदैनौँ । भएछ भने कारबाही गर्छौं ।’

प्रधान सेनापतिलाई सांसदहरूले भने– फास्ट ट्र्याकले सेनाको इमेज बिग्रियाे, भद्रगोल छ, मनपरी छ

सांसदलाई प्रतिप्रश्न : फास्ट ट्र्याकमा नियम दिनु पर्दैन ?

अधिकांश सांसदले प्रगति कम भएको आरोप लगाए । तर यसमा प्रधान सेनापति शर्माले उल्टै सांसदहरूलाई प्रतिप्रश्न गरे । ‘प्रगति कम देखियो भनेर माननीयबाट कुरा आयो । त्यो किन भयो ? फास्ट ट्र्याकमा बन्नुपर्छ भने नियम पनि फास्ट ट्र्याकमा दिनुपर्छ, खोइ त ? चारवटा रुख काट्न ९ महिना लाग्छ । यो कसको गल्ती ? तपाईंहरूले बनाएको नियम हो । मेरो पनि तपाईंहरूको नि गल्ती छ,’ फास्ट ट्र्याकको काम द्रुत गतिमा नहुनुमा कानुन बाधक भएको निचोड प्रधान सेनापति शर्माको छ ।

उनले रुख काट्नका लागि प्रधानमन्त्री र रक्षामन्त्रीलाई भन्दा पनि नभएको दु:खेसो समितिमा गरे । ‘प्रधानमान्त्री र रक्षामन्त्रीलाई देखाएको । रुख काट्न वैशाखमा देखाएको अहिलेसम्म काटेको छैन । काम चाहिँ फास्ट गर्नुहोस् भन्ने । नियम कानुन उही पुरानो छ । २०१७ सालसम्मको नियम देखाउनुहुन्छ । रिसले भनेको होइन,’ कड्किए प्रधान सेनापति शर्मा ।

पैसाका कारण आयोजना निर्माणमा ढिलाइ नभएको उनले स्पष्ट पारे । ‘विकास गर्न कानुन दिनुपर्ने हो, त्यो दिन सकेको छैन । त्यसले गर्दा ढिलाइ भएको छ । पैसाका कारण ढिला भएको छैन । यही ताल हो भने २०८३ मा पनि बन्दैन । कानुन नसच्चिईकन हुँदैन,’ समयसीमाभित्र आयोजना पूरा हुनेमा प्रधान सेनापति ढुक्क छैनन् ।

यद्यपि, फास्ट ट्र्याकको बाटोहुँदै काठमाडौंबाट गाडी निजगढसम्म पुर्‍याउने योजना रहेको उनले सुनाए । ‘२०८३ मा सिँगार्न नसके पनि गाडी काठमाडौंबाट निजगढ निकाल्न सकिन्छ कि भनेर कोसिस गरिरहेका छौँ । सिँगार्न अर्को २/३ वर्ष लाग्न सक्छ,’ उनले भने ।

संसदीय समितिमा चन्दा कार्कीको प्रश्न- ६ वर्षसम्म द्रुतमार्गको काम किन सकिएन ?

जनताको सम्पत्ति लुटेर खान पाइन्छ ?

सांसदहरूले टेन्डर र मुआब्जा ढिला गर्नुको कारण सोधेका थिए । जवाफमा सेनापति शर्माले भने, ‘जमिन सरकारको छैन । जनताको छ । जनताको सम्पत्ति लुटेर खान पाइन्छ ? जनताले दिएमा लिने हो । अर्काको सम्पत्ति त्यत्तिकै लिन पाइन्छ ? सरकारी भाउ एउटा छ । बजार भाउ अर्को छ । कसले मान्छ ? कि त बजारभाउअनुसार मुआब्जा दिनुपर्‍यो ।’

‘त्यसो भए कसले गर्ने त ?,’ संसादहरूले प्रश्न गरे । ‘सरकारले जग्गा दिनुपर्‍यो । कुरा राख्न त हामीले पनि जानेका छौँ नि,’ सांसदहरूलाई सेनापतिले जवाफ फर्काए । वनको ‘स्वीकृति नलिई कसरी रुख काट्ने ?,’ प्रधान सेनापतिले फेरि प्रश्न गरे । ढिला हुनुका कारण यिनै रहेको समितिलाई जवाफ दिए उनले । ‘नत्र तीन वर्षअघि नै टेन्डर लगाइन्थ्यो नि,’ उनले भने ।

फास्ट ट्र्याककाे काम सक्न सेनाले क्यालेन्डर बनाओस् : गगन थापा

खोकनाको समस्या कसरी समाधान हुन्छ ?

फास्ट ट्र्याकको प्रस्थानबिन्दु खोकनामा विवाद छ । स्थानीयले मानिरहेका छैनन् नि भन्ने सांसदहरूको प्रश्नमा प्रधान सेनापति शर्माले भने, ‘खोकनामा रिङ रोड बन्छ । रेल आउँछ भनेको छ । बागमती कोरिडोर बन्छ भनेर तपाईंहरू जानुभएको छ । खोकना सांस्कृतिक नगरी हो । खोकना के हो, म पनि बुझ्छु । मेरा पनि साथी त्यहाँ छन् ।’ समाधानका लागि रक्षामन्त्रीको संयोजकत्वमा समिति बनेको उनले बताए ।

सांसदहरूले काम २०७४ सालबाट सुरु भएको भनेपछि प्रधान सेनापति शर्माले २०७६ बाट मात्र सुरु भएको दाबी गरे । ‘डीपीआर पास गर्न ६ महिना लाग्यो । योजना २०७४ सालमा बनाएको हो । २०७६ सम्म केही भएको छैन । २०७६ को आधाआधीबाट काम सुरु भएको हो । ६ वर्ष भयो, ६ वर्ष भयो भनेर रटान छ । होइन । सेनालाई आरोप मात्र लगाउने ?,’ कड्किँदै उनले भने, ‘डेमोक्रेटिक कन्ट्रीको डेमोक्रेटिक चिफ हुँ । मैले भन्न मिल्छ ।’

रवि लामिछानेको टिप्पणी: फास्ट ट्र्याक होइन, कछुवा ट्र्याक भयो

ज्नताले तिरेको कर त्यसै खर्च गर्न मिल्दैन

सरकारले बजेट दिए पनि खर्च नभएको उनले स्वीकार गरे । ‘यथेष्ट बजेट सरकारले दिएको छ । जमिन पाएको छैन । पैसा छ भन्दैमा जे पायो त्यही गर्न भएन । नेपाली जनताले तिरेको ट्याक्स त्यसै खर्च गर्न पाइँदैन,’ उनले भने । सस्तोमा ठेक्का लगाएर काम भइरहेको प्रधान सेनापति शर्माको दाबी छ ।

‘अहिलेसम्म ठेक्का लगाएकोमा १२ अर्ब सस्तोमा काम गरेको छ,’ उनले भने । एउटा ठेकेदारले अर्को ठेकेदारलाई सकाउन लाग्ने हुँदा बाहिर नभएको हल्ला आएको उनले बताए । ‘एउटा ठेकेदारले अर्को ठेकेदारलाई कसरी सक्ने भन्ने हुन्छ । नियम कानुन हेरेर गरेको हुन्छ । बाहिर आएको हल्लाको पछि नलागौँ,’ उनले भने ।

विवादित कालिका कन्स्ट्रक्सनलाई ठेक्का दिएको विषयमा पनि सांसदहरूले प्रश्न गरेका थिए । जवाफमा सेनापति शर्माले आर्मीले नदिएको स्पष्ट पारे । ‘हामीले दिएको होइन । सरकारको निकाय पीपीआरसीले हो,’ उनले भने । सर्वोच्चमा मुद्दा परेपछि हटाएको पनि उनले बताए । ‘हामीले झिकेको पनि सर्वोच्चको मुद्दाले हो । पहिला फालेको हो,’ उनले भने ।

कांग्रेस सांसद हृदयराम थानीको आरोप- सरकारले सेनालाई ठेकेदार बनायो

सेनाको रेकर्डमा त्रुटि छैन, सेना न्वारन गर्ने संस्था होइन

सेनामा नागरिकताको जन्ममितिमा आइरहेको विवादको विषयमा पनि सांसदहरूले प्रश्न गरेका थिए । तर, उनले बढुवाका क्रममा रथीमा बढुवा गर्न ताराध्वज पाण्डेको जन्ममितिमा पनि त्रुटि नभएको उनले दाबी गरे । ‘हजुरहरूले बनाएको ऐनअनुसारको सात दिनको सूचना निकालेको हो । सिफारिस गरेको होइन । सात दिनको सूचना भनेको कसैको गोलमाल छ ? ल्याउनुहोस् पेस गर्नुहोस् । यसलाई कारबाही गर्छु भनेको । यो सिफारिस भएको होइन,’ उनले भने । बढुवामा उमेर मात्र नहेरिने उनले बताए । ‘ऊ कस्तो छ ? बोलाइ, खुवाइ, उसले मानीयज्यूसँग कुरा गर्न सक्छ सक्दैन ? भोलि जथाभावी बोल्छ कि ? साइक्रेटिक छ कि ? सबै हेर्ने काम हुन्छ,’ उनले भने । तर, नेपाली सेनालाई कमजोर बनाउने गिरोह रहेको उनले बताए । ‘एउटा तत्त्व छ नेपाली सेनालाई कमजोर बनाउने । अरुको अगाडि गिराउन खोज्ने । यो गिरोहको काम हो,’ उनले भने ।

सेनामा पनि जागिर खाने उमेर प्रमाणित गर्न एसएलसीको प्रमाणपत्र, नागरिकता र क्यारेक्टर सर्टिफिकेटलाई हेर्ने गरिएको उनले बताए । ‘यिनै तीनवटाका आधारमा रेकर्डमा जनाइएको हुन्छ । सम्बन्धित निकायले नदिईकन नेपाल आर्मीले न्वारन गर्दैन । नेपाल आर्मी न्वारन गर्ने संस्था होइन,’ उनले भने । जिल्ला प्रशासन कार्यालयलाई पाण्डेको नागरिकताको विषयमा दुईपटक सोधिएको समेत उनले बताए । ‘जिल्ला प्रशासनले ठीक भनेर पठाएको छ । युनिभर्सिटीलाई सोधेका छौँ । ठीक छ भनेर पठाएको छ । जागिर खान आउँदा भरेको फारम पनि चेक गरेका छौँ । सबै ठीक छ,’ उनले भने ।

नगरिकता ठीक हुँदैमा मात्र बढुवा नहुने उनले बताए । ‘जथाभावी बोल्दै हिँडेको । दूतावासबाट राजदूत आउँदा ऊसँग बोल्न सक्ने नसक्ने । कानुनको ज्ञान नहुनेलाई पनि माथि जान दिइँदैन,’ उनले स्पष्ट पारे, ‘कार्यसम्पादन हेरिन्छ । पेसागत क्षमता हेरिन्छ । मेडिकल पास हुनुपर्छ । होटलमा जाँड खाएर झगडा गरेको छ कि, माननीयसँग झगडा गरेको छ कि, त्यो पनि हेरिन्छ । सबै मिलेमा प्रमोसन हुन्छ ।’

बढुवाका क्रममा रातभर राखेको भन्नेमा सत्यता नरहेको उनले बताए । ‘आधा घण्टा राखेको हो । रातभर होइन । यस्तो चिफ भएपछि कसरी चलाउँछौ भनेर सोधेको हो । तपाईं मेरो बाउजस्तो मान्छे, म बस्न सक्दिनँ छोड्छु भनेर गएको हो, त्यसमा अन्यथा छैन,’ उनले भने ।

उनले प्रत्येकको नागरिकता विवादको कागजातसमेत सांसदहरूलाई देखाउँदै जवाफ दिइरहेका थिए । पाण्डेको राजीनामापछि रथीमा बढुवा भएका अशोक सिग्देलको नागरिकतामा विवाद नरहेको उनले बताए । तर, दुईवटा नगरिकता बनाएको स्वीकार गरे । ‘दुईवटा नागरिकता सही हो । वर्ष १७ को भनेको छ । एउटा रुपन्देहीबाट लिएको छ, त्यो हराएर अर्को जाजरकोटबाट लिएको छ । तर एउटै हो । ढाँटेको भए पो समात्ने ? सेनाको बेइज्जत गर्ने गरेको देख्छु । सेनाको रेकर्ड सिस्टम राम्रो छैन भन्ने तत्त्वको खेल हो,’ उनले भने, ‘यति गर्दा पनि कहिलेकाहीँ गाल खाइने रहेछ । यसलाई मैले प्रभुराम शर्मालाई होइन, मेरो कुर्सीलाई गरेको हो भन्ने मानेको छु ।’

1 (1)1703079631.jpg 1 (2)1703079645.jpg 1 (3)1703079669.jpg 1 (4)1703079680.jpg 1 (5)1703079693.jpg 1 (6)1703079707.jpg 1 (7)1703079719.jpg 1 (8)1703079728.jpg 1 (9)1703079739.jpg 1 (10)1703079760.jpg 1 (11)1703079771.jpg 1 (12)1703079782.jpg 1 (13)1703079795.jpg 1 (14)1703079806.jpg 1 (15)1703079818.jpg 1 (16)1703079829.jpg 1 (17)1703079839.jpg 1 (18)1703079851.jpg 1 (19)1703079862.jpg 1 (20)1703079873.jpg 1 (21)1703079887.jpg 1 (22)1703079896.jpg 1 (23)1703079906.jpg 1 (24)1703079916.jpg