प्रधानसेनापतिलाई सांसदहरूले भने– फास्ट ट्र्याकले सेनाको इमेज बिग्रियाे, भद्रगोल छ, मनपरी छ

प्रधानसेनापतिलाई सांसदहरूले भने– फास्ट ट्र्याकले सेनाको इमेज बिग्रियाे, भद्रगोल छ, मनपरी छ

A+ A A-

प्रधानसेनापति प्रभुराम शर्मालाई सांसदहरूले सेनाका गतिविधिबारे प्रश्न गरेका छन् ।

राज्य व्यवस्था समितिको बैठकमा सहभागी भएका प्रधानसेनापति शर्मालाई सांसदहरूले काठमाडौं-निजगढ फास्ट ट्र्याक, दार्चुलामा सेनाले बनाइराखेको तुसर पानी-कोठेधार-तिंकर सडक तथा सेनाकाे अधिकारीहरूकाे जन्ममिति विवादबारे प्रश्न साेधेका हुन् ।

समिति बैठकमा सांसद बुद्धिमान तामाङले नेपाली सेनाले राष्ट्रकाे सेवा गर्ने हो कि ठेक्कापट्टाको काम गर्ने हाे भन्दै प्रश्न गरे । 'नेपाली सेनाको विश्वास कम भएकाे जस्ताे देखियाे । जिम्मा लिएकाे काम छिटो गर्नुपर्छ । लागत बढेकोबढ्यै हुने भो, छिटो सक्नुपर्‍यो', उनले भने ।

सांसद राजेन्द्र पाण्डेले सेनाले निर्माण गरिरहेको तराई मधेश फास्ट ट्रयाक कामकाे प्रगति सन्ताेषजनक नरहेकाे बताए । 'योजना २०८३ अन्तिममा सक्ने छ । यो थपेको मिति हो । यो मितिमा पूरा गर्न सक्छौँ कि सक्दैनौँ ? फास्ट ट्रयाकले सेनाको इमेज बिग्रेको छ । २०८३ सालमा सम्पन्न हुन्छ ? खोकनामा विवाद छ । वन काट्नु पर्नेछ । समयमा सकिन्छ जस्तो लाग्दैन । भद्रगोल छ मनमरी छ । यो हो कि होइन? गल्तीलाई ढाक्छोप गर्न मिल्दैन', उनले भने ।

सांसद पाण्डेले सेनाका अधिकारीहरूमा देखिएकाे नागरिकता तथा जन्ममिति विवाद के हो भनेर पनि प्रश्न गरे ? उनले भने, 'यहाँहरूको पनि विवाद आयो । यो के हो ?' सांसद दीलेन्द्रप्रसाद बडूले पनि उद्देश्य अनुसार सेनाले काम गर्न नसकिरहेकाे बताए । 'राष्ट्रको महत्त्वपूर्ण योजना सेनालाई दिने गरेका छौँ । आर्मीलाई दियो भने युद्धस्तरमा हुन्छ, समयमा सकिन्छ भनेर हो । तर उद्देश्यअनुसार काम हुन सकेको छैन । ढिलाइ भएको देखियो । नेपाल सरकारले अन्य निकायले पनि समन्वय गर्नुपर्ने देखियो', उनले भने ।