जातीय दुर्व्यवहार भोगेकी अनमी भन्छिन्- हदभन्दा बढी भएपछि बोल्न बाध्य भएँ (भिडियो)

जातीय दुर्व्यवहार भोगेकी अनमी भन्छिन्- हदभन्दा बढी भएपछि बोल्न बाध्य भएँ (भिडियो)

A+ A A-

सोमबारदेखि सामाजिक सञ्जालमा एक युवतीको भाइरल भिडियोले अझै पनि समाजको चेत फेरिन नसकेको देखाएको छ । उक्त भिडियोमा मुगुको सोरु गाउँपालिका– ९ को खनाया स्वास्थ्य चौकीमा कार्यरत अनमी तुलसाकुमारी विकले आफू दलित भएकै कारण कार्यालय प्रमुखदेखि स्थानीयहरूबाट अपहेलित हुनुपरेको गुनासो गरेकी छन् ।

दाङको तुलसीपुर उपमहानगरपालिका– ११ स्थायी घर भएकी २३ वर्षीया विकले पालिकाका जिम्मेवार व्यक्तिबाटै जातीय विभेदसँगै यौन हिंसामा परेको आरोप लगाएकी छन् ।

क्वार्टरमा बस्न खोज्दा तत्कालीन पालिकाका निमित्त प्रमुख प्रशासकीय अधिकृत वीरेन्द्र मल्लले आफ्नो काज पुनः फिर्ता भए त्यहाँबाट पनि निकालिदिने धम्कीपश्चात् आफू बस्न नसक्ने स्थिति भएपछि परिवारसँग कुरा गरेको तर गाउँ निकाला भने नगरेको विकले भिडियोमा भनेकी छन् ।

‘महिनावारी भएको समयमा त्यहाँका सबै युवतीहरू ७/८ दिनसम्म झ्याल ढोका नभएको घरमा सत्छन्, तिनीहरूलाई केही पनि नहुने तर, म त्यहाँको लोकल नभएर हो या म दलित भएर हो, मलाई चाहिँ त्यसरी टर्चर हुने के कारण हो ?,’ उनले भनिन् ।

स्थानीय युवाहरूले समेत आफूलाई नराम्रो दृष्टिकोणबाट फोन गर्ने, अपशब्दहरू प्रयोग गर्ने गरेको उनले बताइन् । आफू पालिका गएको बेला स्थानीय एक जनाको बर्थडे पार्टीमा निमित्त प्रमुख प्रशासकीय अधिकृत मल्लले चिसो पेय पदार्थमा मदिरा मिसाई खुवाएर अनावश्यक भिडियो रेकर्ड गरी आफ्नो मानहानि गरेको विकको आरोप छ ।

आफू आएदेखि नै यस्ता खालका दुर्व्यहारहरू धेरैपटक सहेर बसेको उल्लेख गर्दै हदभन्दा बढी हुन थालेपछि आफू बोल्न बाध्य भएको उनले बताइन् ।

९ माघ २०७९ मा कर्णाली प्रदेश लोक सेवा आयोगले खनाया स्वास्थ्य चौकीमा खटाएको थियो । उनी स्वास्थ्य चौकी इन्चार्ज सुरजकुमार शाहीको घरमा डेरा लिएर बस्दै आएकी थिइन् । स्वास्थ्य चौकी इन्चार्ज सुरजको परिवारले पनि आफू दलित भएको भन्दै ११ महिनापछि कोठा खाली गराउन दबाब दिएको उनको दाबी छ ।

कार्यालय प्रमुखबाट हिंसा र जातीय विभेद भएको, स्थानीय युवाहरूले बारम्बार फोन गरेर डिस्टर्व गरेकोलगायतका विषय पालिकालाई जानकारी गराएको तर न्याय नपाएपछि आफू सरुवा माग्न बाध्य भएको उनले गुनासो गरिन् ।

जिल्ला प्रहरी कार्यालय मुगुका प्रमुख प्रहरी नायब उपरीक्षक (डीएसपी) वीरेन्द्र थापाले पीडित भनिएकी युवतीका परिवारका सदस्य आएपछि मात्रै थप अनुसन्धान अगाडि बढाउने बताए । हालसम्म पीडित पक्षका तर्फबाट कुनै जाहेरी नआएको प्रमुख थापाले बताए ।

‘अहिलेसम्म कुनै जाहेरी र निवेदन आएको छैन, पीडितले मलाई अन्याय भयो भनेर जाहेरी दिएपछि न हामीले अनुसन्धान गर्ने हो, बुधबारसम्म उहाँका आफन्तहरू आइपुग्नुहुन्छ भन्ने छ, उहाँहरू आएर मुद्दा दर्ता गर्नुभयो भने थप अनुसन्धान प्रक्रिया अगाडि बढाउँछौँ,’ डीएसपी थापाले शिलापत्रसँग भने । उनका अनुसार पीडित किशोरी प्रहरीको संरक्षणमा छिन् ।

प्रकाशित मिति: बुधबार, पुस ४, २०८० २०:००