के हो क्यापिटल हिल दंगा ? जसले ट्रम्पलाई राष्ट्रपतिको चुनाव लड्नबाट वञ्चित गर्‍यो (भिडियो)

के हो क्यापिटल हिल दंगा ? जसले ट्रम्पलाई राष्ट्रपतिको चुनाव लड्नबाट वञ्चित गर्‍यो (भिडियो)

A+ A A-

क्यापिटल हिल दंगामा जिम्मेवार ठहर गर्दै कोलोराडो राज्यको सर्वोच्च अदालतले पूर्वअमेरिकी राष्ट्रपति डोनाल्ड ट्रम्पलाई चुनाव लड्नबाट वञ्चित गरेको छ । अदालतले ट्रम्पलाई राष्ट्रपतिको चुनावको प्रारम्भिक मतदानबाटै अयोग्य ठहर गरिदिएको हो ।

अमेरिकी संविधानको १४औँ संशोधनको धारा ३ को प्रयोग गरी राष्ट्रपति चुनावका लागि अयोग्य ठहर गरिएको यो पहिलो पटक हो । तर मंगलबारको निर्णय कोलोराडो राज्यमा मात्र लागू हुनेछ । अदालतको यस निर्णयमा पुनरावेदन विचाराधीन छ, त्यसैले यसलाई अर्को महिनासम्म स्थगित गरिएको छ । यसको अर्थ यो निर्णयमा ट्रम्पले अपिल गर्न पाउनेछन् ।

सन् २०२१ मा क्यापिटल हिल दंगामा ट्रम्प संलग्न भएको आरोप छ । क्यापिटल हिल अमेरिकी संसदीय भवन हो । त्यहाँ तल्लो सदन हाउस अफ रेप्रिजेन्टेटिभ्स र सिनेट दुवैको भवन छ ।

सन् २०२० को राष्ट्रपतीय निर्वाचनमा ट्रम्प वर्तमान अमेरिकी राष्ट्रपति जो बाइडेनसँग पराजित भएका थिए । चुनाव हारे पनि ट्रम्पले भने चुनावमा धाँधली भएको अभिव्यक्ति दिँदै हिँडेका थिए । चुनावी मत परिणाममा आफू हार्ने देखिएपछि उनले चुनावमा धाँधली भएको बताउन थालेपछि उनका समर्थकले रुष्ट बन्दै अमेरिकी संसद भवनभित्रै घुसेर तोडफोड मच्चाएका थिए ।

जनवरी ६ मा क्यापिटल हिलमा तोडफोड मच्चिँदा पाँच जनाको मृत्यु भएको थियो । यो घटनालाई अमेरिकी लोकतन्त्रमाथिकै प्रहारको रूपमा हेर्ने गरिएको छ । ट्रम्पकै उत्तेजक अभिव्यक्तिका कारण उनका समर्थकले तोडफोड मच्चाएका थिए जसकारण उनलाई उक्त घटनाको जिम्मेवार मानिएको हो । ट्रम्प अहिलेसम्म पनि उक्त निर्वाचनमा धाँधली भएको बताउने गर्दछन् ।

क्यापिटल हिलमा आक्रमण भएपछि नै फेसबुक, ट्वीटर, युट्युबजस्ता सामाजिक सञ्जालले ट्रम्पलाई लामो समयसम्म आफ्ना प्लेटफर्ममा प्रतिबन्ध लगाएका थिए । अमेरिकामा भएका विभिन्न सर्वेक्षणहरूले आउँदो वर्ष हुने राष्ट्रपति चुनावमा ट्रम्प बलिया दाबेदार रहेका देखाएको थियो । यस्तोमा कोलोराडोको निर्णयले उनलाई झट्का लागेको छ ।

सम्बन्धित समाचार

फेरि अमेरिकाको राष्ट्रपति बने ट्रम्पको आप्रवासी नीति कस्तो होला ? (भिडियो)

ट्रम्पले कोलोराडोको अदालतको फैसलालाई राष्ट्रपति जाे बाइडेनको प्रपञ्च भनेका छन् । उनले बुधबार एक कार्यक्रममा भनेका छन्,‘यो फैसलामा बाइडेनको हात छ । उनी चुनावमा बाधा पुर्‍याउन चाहन्छन् । बाइडेनलाई थाहा छ कि उनले चुनाव हार्नेछन् जसकारण उनी आफ्नो जितको लागि अमेरिकी संविधान उल्लंघन गर्नसम्म तयार छन् ।’

ट्रम्पले थप भनेका छन्, ‘बाइडेन अमेरिकी लोकतन्त्रका लागि खतरा छन् । उनी र उनकाे पार्टी मलाई राष्ट्रपति बन्नबाट रोक्न चाहन्छन् । डेमोक्रेटिक पार्टी हाम्रो रिपब्लिकनसँग नराम्ररी चुनाव हार्दैछ जसकारण बाइडेन चुनावमा बाधा पुर्‍यारहेका छन् ।’