प्रधानमन्त्रीले एनसेल खरिदबिक्री हुँदा देशबाहिर थिएँ भनेपछि...

A+ A A-

एनसेल खरिदब्रिकी हुँदा आफू देशबाहिर रहेकाे बताएपछि प्रधानमन्त्री पुष्पकमल दाहाल प्रचण्ड सांसदका प्रश्नहरूकाे घेराबन्दीमा परेका छन् । संसदकाे राज्य व्यवस्था समितिकाे बैठकमा प्रचण्डले आफू देशबाहिर हुँदा एनसेल प्रकरण सञ्चारमाध्यमहरूबाट थाहा पाएकाे बताएका थिए ।

'सरकार यो विषयमा गम्भीर र संवेदनशील छ । कर छलीको विषय सञ्चारमाध्यममा आएपछि चासो व्यक्त गरिएको थियो । खरिदबिक्री अगाडि बढेको बेला म देश बाहिर थिएँ । फर्किएपछि दूरसञ्चार र मन्त्रालयलाई निर्देशन दिएकाे छु,' प्रधानमन्त्रीले भनेका थिए ।

प्रधानमन्त्रीले एनसेल खरिदबिक्री हुँदा आफू देशबाहिर रहेकाे बताएपछि सांसदहरूले आपत्ति जनाएका हुन् । राज्यव्यवस्था समिति बैठकमा सांसद चन्दा कार्कीले भनिन्, 'म बाहिर थिएँ भन्ने छुट प्रधानमन्त्रीलाई छैन । प्रक्रिया नमिलाउने, कर छली गर्ने, जिम्मेवारी सरकारले लिनुपर्छ ।'

सांसदहरूले एनसेल प्रकरणमा प्रधानमन्त्री स्वयम् र प्रधानमन्त्रीकाे परिवारका सदस्य नै मुछिएकाे कुरा बाहिर आएकाले सत्यतथ्य छानबिन हुनुपर्ने बताए । सांसद कृष्णगोपाल श्रेष्ठले भने, 'प्रधानमन्त्रीको परिवार र प्रधानमन्त्री जोडिएको भन्ने छ । हामीले बिरालोको रङबारे किन बहस गर्ने ? बहस बिरालोले मुसा मार्छ कि मार्दैन भन्ने हो । एउटापछि अर्को काण्ड आउँछ । अबको पाँच वर्षपछि एनसेल सरकारको स्वामित्वमा आउँछ कि आउँदैन ? बिरालोलेे मुसा मार्छ कि मार्दैन भनेको यही हो ।'

सांसद ईश्वरीदेवी न्यौपानेले प्रकरणमा प्रधानमन्त्रीको परिवारको नाम जोडिएकोबारे जवाफ दिन प्रचण्डलाई आग्रह गरिन् । 'प्रधानमन्त्रीको परिवारको नाम जोडिएको छ, के हो ? यो काण्डको वास्तविकता देख्न पाइयोस् । सरकारको जानकारीबिना खरिदबिक्री भएकाे छ । प्रधानमन्त्री नहुँदा कार्यवाहक प्रधानमन्त्री हुनुन्थ्यो । कानुन थियो । सबै बोकेर विदेश जानुभएको त होइन हाेला । दुई दिनमा बिक्री भयो भन्ने विश्वास छैन,' उनले भनिन् ।

प्रकाशित मिति: मंगलबार, पुस ३, २०८० १२:३८