१३औं निर्जीवन बीमा कम्पनी प्रुडेन्सियलको समग्र विश्लेषण

A+ A A-

निर्जीवन बीमा क्षेत्रको मध्यम खेलाडी
अग्रवाल र संघाइ समूहको पकड
५ वर्षको औसत लाभांश १०.४२ प्रतिशत
६० प्रतिशत हकप्रद आउँदै
घटेर सेयर बेच्न बिक्रीकर्ता तयार देखिँदैनन्

६ असार, २०५९ सालमा स्थापना भएको प्रुडेन्सियल इन्स्योरेन्स निजी क्षेत्रबाट स्थापित १३ औं निर्जीवन बीमा कम्पनी हो ।

कम्पनीले गत आवको चौथो त्रैमाशमा १३ करोड १७ लाख नाफा कमाएको छ । यो नाफा अघिल्लो आवको भन्दा १७ प्रतिशतले कम हो ।

१ अर्ब ११ करोड आम्दानी गरेको कम्पनीले ९६ करोड खर्च गरेसँगै नाफा नोक्सान हिसाबमा १४ करोड रुपैयाँ सारेको छ । लगानी तथा अन्य आयबाट ७ करोड, पहिले गरेको व्यवस्थाबाट १ करोड ७३ लाख फिर्ता ल्याएसँगै २४ करोड आम्दानी गरेको छ । व्यवस्था र खर्चमा गएको १० करोड पछि १३ करोड १७ लाख नाफा भएको हो । यो सँगै बीमा कोष १६ प्रतिशतले वृद्धि भएर ४६ करोड रुपैयाँ पुगेको छ ।

कम्पनीको महाविपत्ती कोषमा ४ करोड १८ लाख छ । यो कोष जति वृद्धि हुँदै गयो, कम्पनीबाट पुनर्बीमाको नाममा बाहिरीने रकममा कटौती गर्न थप सहयोग पुग्दै जानेछ । कम्पनीसँग आफैले दायित्व लिन सक्ने (बीमा शुल्क रिटेन गर्ने) क्षमता बढ्दै जान्छ । तर, कम्पनीको यस्तो कोष बढ्न सकेको छैन । २०७२ सालको भूकम्पपछि यो क्षेत्रमा ठूलो दाबी परेको थियो । त्यसैले पनि निर्जीवन बीमा कम्पनीमा यस्तो कोषको अझ बढि महत्व हुन्छ ।

१ अर्ब २४ करोड रुपैयाँ कुल बीमा शुल्क आर्जन गरेको कम्पनीले १ लाख २६ हजार बढी लेख जारी गरेको छ । नविकरण गरिएको बीमालेखको संख्या भने २५ हजारबाट घटेर २४ हजारमा सिमित भएको छ ।

कम्पनीले हालसम्म ६ हजार ७ सय २८ बीमालेखको दाबी भुक्तानी गरेको छ । यसमार्फत कम्पनीबाट १ अर्ब ४ करोड रुपैयाँ ग्राहकले लगिसकेका छन् । कम्पनीमा परेका दाबीमध्ये ५१ करोड ८९ लाख रुपैयाँ भुक्तानी हुन बाँकी रहेको छ ।

कम्पनीले हालै १७ औं वार्षिक साधारणसभा सम्पन्न गरेको छ । सभामा कम्पनीले आव २०७४/७५ को नाफाबाट लाभांश भने घोषणा गरेन । विगत ५ वर्षमा कम्पनीले ३ वर्ष मात्रै सेयर लगानीकर्तालाई लाभांश दिएको छ । ५ वर्षको औसत लाभांश १०.४२ प्रतिशत रहेको छ ।

ढिलो साधारणसभा गर्ने, समयमा नै लाभांश घोषणा नगर्ने प्रवृत्तिकै कारण पछिल्लो समय बीमा कम्पनीहरु प्रति लगानीकर्ताहरुको विश्वास घट्न थालेको हो । १ अर्ब चुक्ता पुँजी हुनुपर्ने प्रावधान अनुसार कम्पनीले ६० प्रतिशत हकप्रद सेयर जारी गर्ने भएको छ । कुनै समय हकप्रदकै कारण समेत सेयर मूल्य बढी तिर्न चाहने लगानीकर्ताहरु अहिले भने चुक्तापुँजी वृद्धि पछि घट्न सक्ने प्रतिफललाई लिएर चिन्तित हुन थालेका छन् ।

कम्पनीको प्रतिसेयर आम्दानी २० रुपैयाँ ५३ पैसा छ । यो पाँच वर्षयताकै न्यून हो । मूल्य आम्दानी अनुपात २७.०३ छ । यसले कम्पनीले कमाएको एक रुपैयाँलाई लगानीकर्ताहरुले करीब २७ रुपैयाँ सम्म तिरेको देखाउँछ । यो दर २० देखि ३० सम्म हुनु उचित मानिन्छ ।

हाल कम्पनीको प्रमुख कार्यकारी अधिकृतमा बिके महर्जन छन् । कम्पनीको अध्यक्षता श्रवण कुमार अग्रवालले गरिरहेका छन् । २०७३÷७४ को वार्षिक विवरण अनुसार कम्पनीमा अग्रवाल र संघाइ समूहको पकड छ ।

इक्रा नेपालले करिब ४ महिनाअघि कम्पनीको हकप्रदलाई ४ प्लस ग्रेड दिएको छ । कम्पनीको समग्र अवस्थाको आधारमा गरिएको विश्लेषण अनुसार यसले आधारभुत पक्ष औसतभन्दा केही कम रहेको संकेत गर्छ ।

इक्राको महत्वपूर्ण टिप्पणी:

प्रिमियम रिटेन्सन रेसियो ४ वर्षमा ६० प्रतिशतबाट ३७ प्रतिशतमा, आफैले दायित्व सकार्नेभन्दा पुनर्बीमामा बढि भर
यस क्षेत्रको मध्यम खेलाडी, ग्रस प्रिमियम रिर्टन ५ प्रतिशत र नेट प्रिमियम रिटर्नको आधारमा ४ प्रतिशत हिस्सा
बजार हिस्सा घट्दो
ग्रस प्रिमियम रिटर्न ७ प्रतिशतबाट ५ प्रतिशतमा सिमित
नेट प्रिमियम रिटर्नको आधारमा मोटर बीमामा ६५ प्रतिशत हिस्सा, विविध ९ प्रतिशत, मरिन क्षेत्रको ४ प्रतिशत हिस्सा
मोटर बीमामा उच्च केन्द्रीकरण, ५ वर्षयता यसमा अन्डरराइटिङ सरप्लस छ तर यसमा दाबी बढेको छ, पुनर्बीमाको कमिसन र खुद प्रिमियम आम्दानीमा कमि

सन्तुलित क्षेत्रमा

कम्पनीको सेयर मूल्य एक वर्षयताकै न्यून विन्दु ४ सय २२ रुपैयाँबाट बढ्ने क्रममा छ । हाल मूल्य ४ सय ४८ रुपैयाँ रहेको छ । कम्पनीको मूल्यले लगभग डबल बटम आकृति (अंग्रेजी अक्षर डब्लु) बनाएको छ । यसले मूल्य बढ्ने संकेत गर्छ । तर, नजिकै प्रतिरोध बिन्दु रहेकोले सफल हुन सकिरहेको छैन । रेखा चित्रमा च्यानल डाउन प्यार्टन बन्दै गएकोले मूल्य बढ्ने सम्भावना देखिँदैछ ।

१४ दिने आरएसआई सूचक स्केल ५२ मा आएको छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

२१ दिने र ७ दिने सिम्पल मुभिङ एभरेज केही समयको दूरीपछि पुनः नजिकिने क्रममा छ । यसअघि नजिकिए पनि यी रेखा एकआपसमा क्रस–ओभर हुन सकेनन् । यसपटक पनि ७ दिने रेखाले २१ दिने रेखालाई काटेर माथि लग्ने प्रयासमा छ । यसो भएमा मूल्य बुलिश प्रवृत्तिमा जाने छ ।

मूल्य घट्दो क्रममा रहेको कम्पनीको एक महिना अवधिको पिभट विश्लेषणले भने अब आगामी एक महिनामा ४ सय २७ मा पहिलो टेवा पाउन सक्नेछ र मूल्य बढ्न थालेमा भने ४ सय ६५ मा पहिलो प्रतिरोध पाउनेछ ।

कम्पनीको सेयर मूल्यले अन्तिम चार दिनमा दोस्रो दिनमा डोजी आकृति बनाएको छ । यसले मूल्य घट्न सक्ने संकेत गर्छ । यो संकेत कमजोर मानिएपनि तेस्रो दिन कालो मैनबत्ति बनेको छ । यसले मूल्य घट्न सक्ने सम्भावनालाई बलियो रुपमा देखाएको छ ।

तर, यसमा ध्यान दिनुपर्ने के छ भने कालो मैनबत्ति बनेपनि सो दिनको मूल्य अघिल्लो दिनको भन्दा माथि खुलेर बन्द हुँदा अघिल्लो दिनको अन्तिम मूल्य बराबर नै छ । अन्तिम दिन समेत सुरु मूल्य बढेको र दिनभर त्यही मूल्यमा कारोबार भएको छ । मूल्यलाई लिएर लगानीकर्तामा अन्योल नै रहेको देखिन्छ । तर, घट्न भने बिक्रीकर्ता तयार नभइरहेको देखिन्छ । लगानीको लागि आगामी दिनको कारोबार हेर्नु सही हुन्छ ।

प्रकाशित मिति: बिहीबार, असोज १६, २०७६ १४:५७