यो काम गर्ने अन्तिम अवसर हो, अब पनि प्रगति भएन भन्ने छुट छैनः प्रधानमन्त्री

A+ A A-

प्रधानमन्त्री पुष्पकमल दाहाल 'प्रचण्ड'ले प्रधानमन्त्री तथा मन्त्रिपरिषदको कार्यालय सिंहदरबारमा रहेको एक्सन रूमबाट निर्माणाधीन नारायणगढ–बुटवल सडकखण्ड र मुग्लिन–पोखरा सडकखण्डको भर्चुअल निरीक्षण गरेका छन् ।

सोमबार दिउँसो सिंहदरबारबाट प्रधानमन्त्रीले निर्माणाधीन २ सडकखण्डको भर्चुअल निरीक्षण गरेका हुन् । निरीक्षणपछि उनले भने, 'हाम्रा परियोजनाहरू भनेजस्तो जस्तो गरी अगाडि बढेनन् र जनताले महसुस गर्ने गरी कामको प्रगति भएन । यसबाट सन्तुष्ट हुन सक्ने अवस्था देखिँदैन । यसतर्फ हाम्रो भूमिका गुणात्मक रूपले बढाउनुपर्छ ।'

फिल्डमा रहेका कार्यालयले सम्बन्धित ठाउँमा नियमित रूपमा प्रतिवेदन दिनुपर्ने प्रचण्डको भनाइ छ । 'गिट्टी, बालुवा ढुंगा, विद्युतका सानातिना समस्याहरू समाधान गर्ने कुरा हाम्रो काबुमा छ, त्यो हाम्रो जिम्मेवारी पनि हो,' प्रधानमन्त्रीले भने, 'फिल्डका कार्यालयले समयमै सम्बन्धित ठाउँमा नियमित प्रतिवेदन गर्नुपर्‍यो । समयमै कुरा आए समाधान गर्न सजिलो हुन्छ । दिनहुँ जनताले समस्या भोग्नुपर्ने समस्या अन्त्य हुनपर्छ ।'

तोकिएकै समयमा काम सम्पन्न हुनुपर्नेमा उनले सचेत गराए । 'अब परियोजनाको माइलस्टोन सूचकका आधारमा प्रगति हुनुपर्छ । तोकिएको समयमा नै काम सकिनुपर्छ । यी कारणले काम भएन भन्न पाइने छैन,' प्रधानमन्त्रीले भने, 'यी दुई प्रजेक्ट महत्त्वपूर्ण छन् । समयमै सकिनुपर्छ । म पनि परियोजना निरीक्षणका लागि फिल्डमै आउँछु, अब धेरै समय विकासका कामलाई दिन्छु ।'

प्रचण्डले यो काम गर्ने अन्तिम अवसर भएको उल्लेख गर्दै सुधार र प्रगति भएन भन्ने छुट नरहेको बताए । 'यो काम गर्ने अन्तिम अवसर हो । सबैले एकपटक अवसर लिऔँ । अब पनि सुधार भएन र प्रगति भएन भन्ने छुट छैन । राष्ट्रिय गौरवका योजनामा काम दुई सिफ्टमा गराउनुपर्छ । यसका लागि गम्भीर गृहकार्य गरौं,' प्रधानमन्त्रीले भने ।