जनकपुरको बाह्र विघामा बनाइयो अनाजबाट रामसीताको संसारकै ठूलो प्रतिमा

A+ A A-

यसवर्षको विवाहपञ्चमी महोत्सवको मुख्य आकर्षणको रुपमा अनाजबाट संसारकै ठूलो रामसीताको प्रतिमा बनाइएको छ ।

जनकपुरकाे बाह्र विघामा १ सय ११ क्वीन्टल अनाजको प्रयोग गरी ११ हजार ११ स्क्वायर फिटको रामसीताको प्रतिमा बनाउने कार्य शुक्रबार साँझ सम्पन्न हुँदै छ । विगत ५ दिनदेखि उक्त प्रतिमा निर्माण कार्य स्थानीय रंगभूमि मैदान बाह्र विघामा भइरहेको थियो ।

धान, गहुँ, मकै, बदाम, चना, अडहरको दाल, मसुरोको दाल, चामल, मासको दालसहितका अनाज प्रयोग गरी रामसीता, राजा जनक र लक्ष्मणको आकर्षक प्रतिमा बनाइको जनकपुरधाम उद्योग वाणिज्य संघका अध्यक्ष जीतेन्द्र महासेठले जानकारी दिए । उनले याे प्रतिमा संसारकै ठूलाे भएकाे दाबी गरे ।

प्राचिन मिथिलाको राजधानी जनकपुधाम यति बेलामा रामजानकी विवाहपञ्चमी महोत्सवको रौनकले झकिझकाउ छ ।
हिन्दु धर्मप्रति अस्था राख्ने नेपाल तथा भारतका विभिन्न स्थानबाट श्रद्धालुहरू भागवान राम र सीताको विवाहमा सहभागी हुन जनकपुरधाम आउँदै छन् । २६ मंसिरदेखि सुरु भएको सप्ताहव्यापी महोत्सवमा दिनदिनै श्रद्धालु भक्तजनहरूको सहभागिता पनि बढ्दै गएको छ ।

खुब खाउँ वो दुल्हा,खुब मोटाऊको दुल्लाह । अपन चोटक चोकल गालको फुलाउ वो दुल्हा ।। आजु मिथिला नगरीया नेहाल सखिया । चारो दुल्हामे बरका बबाल सखिया ।। जस्ता मधुर स्वरमा दिनभरि लाउडिस्पीकरमा बच्ने गीतले महोत्सवमा उल्लास थपिदै गएको छ ।

महोत्सवको आज चौथो दिन तिलकोत्सव मनाइँदै छ । तिल्कोत्सवलाई मैथिलीमा छेका भन्ने चलन छ । विवाह हुनुअघि बेहुली पक्षले बेहुला अर्थात् वरको कोसेली (भार) लिएर पुगी तिल्काउने (टीकाटालो) गर्ने विधि हुन्छ ।

तिलकोत्सवकै लागि शुक्रबार जानकी मन्दिरका महन्थ, साधुसन्त तथा नागरिक समाजका व्यक्तिहरूले दहीचुरा, खिरपुरी, विभिन्न मिठाई, फलफूल, लत्ताकपडासहित कम्तिमा १०१ भार (कोसेली) सहित बाजागाजसहित जनकपुरधामकै राममिन्दरमा पुगेका थिए ।

त्यहाँ पुगेपछि तिलोत्सव कार्यक्रम सुरु हुन्छ । तिलोत्सवमा जानकी मन्दिरका महन्थ रामपपेश्वर दास सीताको बुवाको रुपमा र राम मन्दिरका महन्थ राम गिरी रामको बुवाको रुपमा सम्धी मिलान पछि तिलोत्सव सम्पन्न हुन्छ । तिलोत्सव उत्सवको क्रममा मिथिलाकी महिलाहरू व्यंगात्यम तथा ठ्ठौली लोक गीतहरू गायर बेहुला पक्षलाई जिस्काउने गरिन्छ ।