एउटा समूहलाई पोस्ने गरी सरकारले नयाँ स्टक एक्सचेन्जको लाइसेन्स दिनु हुँदैनः गगन थापा

एउटा समूहलाई पोस्ने गरी सरकारले नयाँ स्टक एक्सचेन्जको लाइसेन्स दिनु हुँदैनः गगन थापा

A+ A A-

नेपाली कांग्रेसका महामन्त्री गगन थापाले कसैको निहीत स्वार्थका लागि नयाँ स्टक एक्सचेन्जको लाइसेन्स दिनु नहुने बताएका छन् ।

वर्तमान पुँजीबजारको अवस्थाबारेमा अध्ययन गरेर मात्रै नयाँ स्टक एक्सचेन्जको लाइसेन्स दिने सरकारको निष्कर्ष रहेकोसमेत उनले बताए । महामन्त्री थापाले संसदीय समितिको निर्देशनको आडमा दबाबमा परेर केही समूहलाई पोस्न मात्रै धितोपत्र बोर्डले नयाँ स्टक एक्सचेन्जको लाइसेन्स दिन नहुने बताए ।

महामन्त्री थापाले सरकारले केही समूहलाई पोस्ने गरी नयाँ स्टक एक्सचेन्जको लाइसेन्सको अनुमति दिने तयारी गरेको दाबी गरे । शुक्रबार न्युज एजेन्सी नेपालसँगको कुराकानीमा उनले कुनै एक समूहको स्वार्थ र फाइदाका लागि दबाब सिर्जना गरेर नयाँ स्टक एक्सेन्जको लाइसेन्स दिने तयारी सरकारले तत्काल बन्द गर्न आवश्यक रहेको बताए । उनले कुनै अध्ययन आधार बिना कुनै एउटा समूहको फाइदालाई नयाँ स्टक एक्सचेन्ज दिँदा कुशासनको अर्को प्रकरण सुरु हुने जिकिर गरे ।

महामन्त्री थापाले मुलुक एकपछि अर्को कुशासनबाट थला परेको भन्दै नयाँ स्टक एक्सचेन्जको लाइसेन्स अध्ययन नगरी जबरजस्ती दिने काम भयो भने अर्को दुर्भाग्य हुने चेतावनी दिए । उनले सरकारबाट भाषण सुशासनको र निर्णय कुसशासनको गर्ने काम हुनु नहुने बताए । उनले नयाँ स्टक एक्सचेन्जको विषयमा समयमा नै प्रधानमन्त्रीलाई सचेत गराएको भन्दै सचेत गराउँदा गराउँदै अनुमति दिए कुशासनको अर्को धब्बा लाग्ने दाबी गरे ।

महामन्त्री थापाले नयाँ स्टक एक्सचेन्जको लाइसेन्स अर्थ मन्त्रालय र धितोपत्र बोर्डले नभएर मन्त्रिपरिषद्ले निर्णय गर्नुपर्ने बताए । उनले कांग्रेसले सरकारले गरेका गलत कामलाई रोक्नुपर्ने बताए । उनले अहिले नागरिकहरू कुशासनबाट आजित भएको बताए ।