‘आईएफएस योङ्ग एचिभर्स’ अवार्ड हात पार्ने पहिलो नेपाली चिकित्सक बनिन् डा. अस्मिता पाण्डे

‘आईएफएस योङ्ग एचिभर्स’ अवार्ड हात पार्ने पहिलो नेपाली चिकित्सक बनिन् डा. अस्मिता पाण्डे

A+ A A-

वात्सल्य आईभीएफ सेन्टरकी युवा प्रजनन् रोग विशेषज्ञ डा. अस्मिता पाण्डेले प्रतिष्ठित अन्तर्राष्ट्रिय अवार्ड हात पारेकी छन् । भारतको नयाँ दिल्लीमा भएको इन्डियन फर्टिलिटी सोसाइटी (आईएफएस) को १९औँ वार्षिक कंग्रेसमा डा. अस्मिता पाण्डेले ‘आईएफएस योङ्ग एचिभर्स’ अवार्ड हात पारेकी हुन् ।

इन्डियन फर्टिलिटी सोसाइटीले प्रदान गर्ने उक्त अवार्ड हात पार्ने ३४ वर्षीया डा. पाण्डे पहिलो नेपाली चिकित्सक हुन् । प्रजनन् स्वास्थ्य अनुसन्धान, लेखन र सम्पादनजस्ता एकेडेमिक काममा खेलेको भूमिकाका कारण उनले उक्त अवार्ड हात पारेकी हुन् ।

डा. पाण्डेका अनुसार मुम्बईको लीलावती अस्पताल एण्ड रिसर्च सेन्टरमा एकवर्षे फेलोसिपका क्रममा आईभीएफसम्बन्धी अनुसन्धानात्मक लेखहरू लेखेकी थिइन् । ‘मेरो अनुसन्धान र एकेडेमिक कामहरूको मूल्यांकन गर्दै उक्त संस्थाले ‘आईएफएस योङ्ग एचिभर्स’ अवार्ड प्रदान गरेको छ । यो अवार्डले मलाई अझ उत्साहित तुल्याएको छ ।’

Dr. Ashmita Pandey- 11702624414.jpg डा. पाण्डे अन्य दुईवटा अन्तर्राष्ट्रिय जर्नलको सम्पादकीय टिममा समेत छिन् । उनी अमेरिकन कलेज अफ अब्स्टेटेरिसियन एण्ड गाइनोकोलोजिस्टको ‘द ग्रीन जर्नल’ र युरोपियन सोसाइटी अफ ह्युमन रि–प्रोडक्सन एन्ड इम्ब्रोलोजीको ‘ह्युमन रि–प्रोडक्सन’ जर्नलको सम्पादकीय टिममा रहेर अनुसन्धानात्मक लेखहरूको सम्पादनमा पनि सक्रिय छिन् ।

काठमाडौंकी डा. पाण्डेले ढाका युनिभर्सिटीबाट एमबीबीएस गरेकी हुन् । उनले काठमाडौं विश्वविद्यालय (केयू) अन्तर्गतको काठमाडौं मेडिकल कलेज (केएमसी) बाट स्त्री तथा प्रसूति रोगमा विशेषज्ञता हासिल गरेकी हुन् । उनले भारतको लीलावती अस्पतालबाट इनफर्टिलिटीमा एकवर्षे फेलोसीप गरेकी छन् । हाल उनी वात्सल्य आईभीएफमा सेवारत छिन् ।