कर्णालीका विपन्न विद्यार्थीलाई ग्लोबल कलेजको पूर्ण छात्रवृत्ति

A+ A A-

काठमाडौंको ग्लोबल कलेज इन्टरनेसनलले दुर्गम क्षेत्रका विपन्न परिवारका विद्यार्थीलाई लक्षित गरी खाने, बस्ने सुविधासहितको पूर्ण छात्रवृत्ति घोषणा गरेको छ । सुर्खेतस्थित मध्यपश्चिम विश्वविद्यालयबाट सम्बन्धनप्राप्त कलेजले ब्याचलर अफ बिजनेस एड्मिनिस्ट्रेसन (बीबीए), ब्याचलर अफ होटल म्यानेजमेन्ट (बीएचएम) र ब्याचलर अफ ट्राभल एण्ड टुरिजम म्यानेजमेन्ट (बीटीटीएम) पढ्ने विकल्पसहित पूर्ण फण्डिङको छात्रवृत्ति घोषणा गरेको हो । मध्यपश्चिम विश्वविद्यालयका डीन डा. दीपबहादुर रावलले कर्णाली प्रदेशका बादी विद्यार्थीलाई लक्षित गरी ग्लोबल कलेजले छात्रवृत्ति उपलब्ध गराएको जानकारी दिए ।

सम्बन्धित समाचार

जापानमा ग्लोबल कलेजलाई 'बेस्ट विजनेस स्कुल अफ द इयर अवार्ड'

छात्रवृत्तिका लागि इच्छुक विद्यार्थीले शैक्षिक प्रमाणपत्र र नागरिकताको प्रतिलिपी समावेश गरी ४ पुससम्म आवेदन दिन पाउने मध्यपश्चिम विश्वविद्यालयले जारी गरेको सूचनामा उल्लेख छ ।

इन्टरनेसनल वर्ल्ड बुक रेकर्डमा सूचीकृत ग्लोबल कलेजले उदाहरणीय कार्य गर्दै अगाडि बढ्ने आफ्नो योजनाअनुसार नै विपन्न विद्यार्थीका लागि छात्रवृत्तिको सुविधा उपलब्ध गराएको बताएको छ ।

काठमाडौंको बानेश्वरमा रहेको कलेजलमा समेस्टर प्रणालीको माध्यमबाट अध्ययन, अध्यापन हुँदै आएको छ । कलेजले मध्यपश्चिम विश्वविद्यालयको सम्बन्धनमा एमबीए, बीबीए, बीएचएम र बीटीटीएम जस्ता लोकप्रिय शैक्षिक कार्यक्रमहरू सञ्चालन गरिरहेकाे छ ।

युरोपियन युनियनमा आबद्ध इरास्मस प्लस कार्यक्रमको साझेदार सदस्यसमेत रहेकाे कलेजले इरास्मस कार्यक्रमअन्तर्गत विद्यार्थीलाई उद्यमशीलता, पर्यटनलगायतका क्षेत्रमा अनुसन्धान एवम् क्षमता अभिवृद्धि र अभिमुखीकरण तालीमहरू प्रदान गरिरहेकाे छ ।