सुुदूरपश्चिममा फोरजी सेवा सुरु, मुख्य मन्त्रीले गरे उद्घाटन

A+ A A-

नेपाल टेलिकमले बुधबारदेखि सुदूरपश्चिममा पनि फोरजी सेवाको शुभारम्भ गरेको छ । कम्पनीले सुदूरपश्चिमको कैलाली र कञ्चनपुरका विभिन्न शहरमा फोरजी सेवा विस्तार गरेको हो । उक्त सेवाको सुदूरपश्चिम प्रदेशका मुख्य मन्त्री त्रिलोचन भट्टले उद्घाटन गरेका हुन् ।

नेपाल टेलिकम क्षेत्रीय निर्देशनालय सुदूरपश्चिमका अनुसार दुई जिल्लाका विभिन्न शहरमा दसैंअगाडि नै फोरजी सेवा विस्तारको कार्यतालिका अनुसार आज उद्घाटन गरिएको हो । त्यसका लागि १२ वटा टावरको निर्माण गरिएको थियो ।

नेपाल टेलिकम क्षेत्रीय निर्देशनालय सुदूरपश्चिमका प्रमुख नामाकरण न्यौपानेले कैलाली र कञ्चनपुरमा पूर्वपश्चिम राजमार्गमा रहेका शहरसँगै हुलाकी राजमार्गमा रहेको धनगढी र फुलबारी क्षेत्रमा फोरजी सेवा सुरु भएको बताए ।

धनगढी, महेन्द्रनगर, टीकापुर, चिसापानी, लम्की, सुख्खड, अत्तरिया, झलारी, फुलबारीलगायतका शहरमा आजदेखि फोरजी सेवा सुरु भएको उनको भनाइ छ । अहिले कैलाली र कञ्चनपुर जिल्लाका मुख्य शहरमा मात्रै फोरजी सेवा विस्तार गरिएको बताउँदै उनले माघ मसान्तसम्ममा सुदूरपश्चिमभरि नै फोरजी सेवा विस्तार हुने टेलिकमको योजना रहेको उनले बताए ।

सुरुमा सबै महानगरपालिका, उपमहानगरपालिका र धेरै जनसंख्या भएका नगरपालिकामा फोरजीको व्यावसायिक सेवा सुरु गर्ने लक्ष्यअनुसार कैलाली र कञ्चनपुरमा १२ वटा टावर निर्माण गरी सेवा विस्तार गरिएको हो । आगामी माघभित्र सुदूरपश्चिमका तीन सय ६१ स्थानमै फोरजी सेवा विस्तार गर्ने लक्ष्य रहेको नेपाल टेलिकम क्षेत्रीय निर्देशनालय अत्तरियाले जनाएको छ ।

यस्तै, नेपाल टेलिकमले कैलाली, कञ्चनपुर सहित अन्य देशका ३० जिल्लामा आजदेखि नै फोरजी सेवा विस्तार गरेको छ । यसअघि काठमाडौं र पोखरामा मात्र उपलब्ध फोरजी सेवा हाल सातै प्रदेशका कुल ३२ जिल्लाका प्रमुख शहरमा विस्तार गरिएको हो ।

मुलुकभर नै फोरजी सेवा उपलब्ध भएपछि उच्च गतिको मोबाइल ब्रोडब्याण्डमार्फत श्रव्यदृश्य तथा विद्युतीय माध्यमबाट शिक्षा, स्वास्थ्य, सामाजिक सेवाहरू र मनोरञ्जनलगायत विविध सेवा प्रवाहमा बृहत् सुधार हुने अपेक्षा गरिएको छ । चौथो जनेरेसनको मोबाइल डाटा सेवा (फोरजी) उच्च गतिको हुन्छ । नेपाल टेलिकमका अनुसार, यसको न्यूनतम गति नै ३५ एमबी प्रतिसेकेन्ड छ ।

प्रकाशित मिति: बुधबार, असोज १५, २०७६ १९:२२