अखिल गण्डकी अधिवेशन : नेताको नाममा कसरी बाँडिदै छन् विद्यार्थी ?

A+ A A-

नेकपा एमालेनिकट अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)को गण्डकी प्रदेश अधिवेशन आगामी ६ र ७ पुसमा पोखरामा हुँदैछ । बाहिर हेर्दा सामान्य देखिए पनि अखिलकै गत फागुनको २३ औं केन्द्रीय महाधिवेशन, पार्टीको गत असोजमा भएको प्रदेश कमिटी अधिवेशनको दरिलो प्रभाव यो अधिवेशनमा रहने छ ।

अधिवेशन गर्ने जिम्मा पाएका तनहुँका रमाकान्त पोखरेल (आर.के) सँगै गोरखाका प्रबिन श्रेष्ठ अध्यक्षका बलिया दाबेदार छन् । यी दुईबाहेक कास्कीका सञ्जय पौडेल बैरागी र सुशन घिमिरे पनि आकांक्षी छन् । स्याङ्जाका विश्वदर्शन पराजुली अध्यक्ष नभए उपाध्यक्ष वा सचिव बन्ने योजनामा छन् ।

गण्डकीमा पार्टी उपमहासचिव पृथ्वीसुब्बा गुरूङ र स्थायी कमिटी सदस्य खगराज अधिकारीको समूह छ । यी दुई नेताकै नाममा विद्यार्थीहरू पनि विभाजित छन् । अनेरास्ववियुका केन्द्रीय सचिवद्वय प्रकाश पौडेल र आशीर्वाद सुवेदीले विद्यार्थीतर्फ क्रमशः पृथ्वीसुब्बा र खगराज समूहको अघोषित नेतृत्व गर्छन् । सर्वसम्मत नभए प्रकाश र आशीर्वादले रोज्ने उम्मेद्वारबीच नै मुख्य प्रतिस्पर्धा हुनेछ । तर, दुवैले कसलाई प्रदेश कमिटीको नेतृत्व सुम्पिने भनेर केही बोलिसकेका छैनन् ।

अनेरास्ववियुका एक विद्यार्थी नेताले बताएअनुसार प्रकाश र आशीर्वाद गोरखाका प्रबिनको नाममा सर्वसम्मत गर्न तयार छन् । ‘प्रबिन नेताको हिसाबले खगराजलाई मान्छन् । तर, उनलाई प्रकाशले समर्थन गर्छन्,’ ती विद्यार्थीले भने, ‘सर्वसम्मत भए उनकै नाममा हुन्छ । नभए चुनाव हुन्छ ।’

अनेरास्ववियु गण्डकीको अधिवेशन गत १० असोजमै गर्ने तयारी थियो । पार्टी प्रदेश कमिटीको अधिवेशन १५ देखि पार्टी प्रदेश कमिटीको अधिवेशन तय भएपछि त्यतिबेला स्थगित गरिएको थियो । अधिवेशन सम्मुखमा प्रकाशले प्रबिनलाई अध्यक्षमा समर्थन गर्ने वचन दिएका थिए ।

अध्यक्षका दाबेदार आर.के पोखरेल, सञ्जय पौडेल बैरागी पार्टीको प्रदेश अधिवेशन र अखिलको केन्द्रीय महाधिवेशनबाट पृथ्वीसुब्बा समूहसँग नजिकिएका छन् । खगराजनिकट कास्कीका सुशन घिमिरे पार्टीका नेता र टिमले के निर्णय गर्छ ‘पर्ख र हेर’को अवस्थामा छन् ।

आर.के एमाले स्थायी कमिटी सदस्य किरण गुरूङ गण्डकी सरकारको अर्थमन्त्री हुँदा स्वकीय सचिव थिए । पार्टीको प्रदेश अधिवेशनमा किरणले खगराजलाई मौन समर्थन गरिदिए । टोपबहादुर रायमाझी सचिवबाट निलम्बनमा परेपछि खाली रहेको ठाउँमा लैजाने भनेर महासचिव शंकर पोखरेलले वचन दिएपछि उनले प्रदेश अधिवेशनमा खगराजलाई समर्थन गरेको बुझिन्छ । त्यसयता किरणसँग आर.केको दूरी टाढिएको छ र आर.के पृथ्वीसुब्बा क्याम्पमै यथावत छन् ।

पृथ्वीसुब्बा समूहबाट उम्मेदवार बनेर प्रदेश अध्यक्ष निर्वाचित नवराज शर्मा र सचिव धनञ्जय दवाडीको साथ पाउने विश्वास रमाकान्तको छ । त्यसबाहेक आफूले संगठनको प्रदेश सचिव भएर काम गरेको र जिल्ला–जिल्लासम्म पुगेकाले पनि अध्यक्ष लड्ने र जित्ने दाबी उनले गरे । ‘म सचिव भएर काम गर्दा मनाङ र मुस्ताङबाहेक ९ जिल्लाका हरेक गतिविधिमा सक्रिय थिएँ । कुन जिल्लामा समस्या के छन् भन्ने मलाई राम्रोसँग थाहा छ,’ उनले भने, ‘मैले संघीयता पनि राम्रोसँग बुझेको छु ।’

संगठनका केन्द्रीय महासचिव नरेश रोकाया आर.केसँगको पुरानो व्यक्तिगत रिसइवीका कारण उनलाई कुनै पनि हालतमा अध्यक्ष हुन नदिन कस्सिएका छन् । आर.के अहिले प्रदेश अध्यक्ष बनेमा आफूलाई भोलि अध्यक्ष लड्दा गण्डकीबाट घाटा हुने हिसाबकिताब रोकायाको छ । त्यसैले रोकायाले गोरखाका प्रबिन श्रेष्ठलाई अध्यक्ष बनाउन खोजेका छन् । रोकाया गण्डकी छिरेपछि एमाले नेता खगराज अधिकारीले भने विपरीत जाँदैनन् । प्रबिन खगराज समूहको भनेर नखुलेकाले उनको नेतृत्वमा टिम बनाउन नचाहने खगराजनिकट विद्यार्थी पनि छन् ।

पृथ्वीसुब्बानिकट प्रकाशले प्रबिनलाई केन्द्रीय महासचिव नरेशको दबाबमा साथ दिइरहेका छन् । तर, पृथ्वीसुब्बा समूह र आफू नेतृत्वको कमिटीलाई सफल बनाउने सचिव आर.केलाई छोडेर उनी अन्तिमसम्म प्रबिनको पक्षमा नरहने सम्भावना रहेको एक विद्यार्थी नेता बताउँछन् । ‘प्रबिन प्रकाशको क्याम्पबाट केन्द्रीय महाधिवेशनमा स्थायी कमिटी लडेका थिए । पृथ्वीसुब्बा समूहको नभएकाले उनलाई अन्तिमसम्म साथ नदिने सम्भावना छ,’ ती नेताले भने, ‘दुई जनाबीच चुनाव हुने भयो भने प्रकाश मौन बस्न सक्छन् । पृथ्वीसुब्बा समूहकै भएकाले आर.केलाई छोड्दैनन् ।’

प्रकाश गण्डकीमा विद्यार्थीमाझ निकै लोकप्रिय मानिन्छन् । त्यसैले उनको साथ कसलाई रहन्छ भन्नेले यो अधिवेशनमा निर्णायक अर्थ राख्छ । पृथ्वीसुब्बा समूहकै आर.केलाई हराउने वा संगठनका केन्द्रीय महासचिवले चाहेको उम्मेदवारलाई जिताउने भन्नेमा प्रकाश दोधारमा छन् । कतिसम्म भने प्रकाशले आर.केलाई पार्टीको प्रदेश कमिटी सदस्य मनोनित गराएर प्रबिनलाई अध्यक्ष बनाउने बाटो खाली गराउन खोजेका थिए । पार्टी प्रदेश अध्यक्ष नवराज शर्माले पनि उनलाई प्रदेश कमिटीमा मनोनीत गर्ने वचन दिएका थिए । उनले त्यसलाई अस्वीकार गरेको र चुनाव जितेपछि प्रदेश कमिटीमा ल्याउन भनेको अखिल स्रोत बताउँछ ।

अर्का, आकांक्षी सञ्जय पौडेल बैरागीको किस्सा झनै रोचक छ । सञ्जयका बुवा दामोदर पौडेल बैरागी प्रतिनिधिसभा सदस्य छन् । उनी खगराज अधिकारीनिकट हुन् । अहिले बुवा एउटा खेमामा छन्, छोरा त्यसबाट टाढिएका छन् । बुवाले खगराज अधिकारीको पछि लागेर आफ्नो राजनीतिक भविष्य सकेको र आफूलाई पनि अखिलको गत अधिवेशनमा असहयोग गरेको भन्दै उनी खगराज समूहसँग असन्तुष्ट छन् । त्यसैले उनले अहिले खगराज समूहबाट ‘विद्रोह’ गरेका छन् । पृथ्वीसुब्बा समूहमा नगए पनि उनले खगराजनिकट समूहले उठाएकालाई जित्न नदिने कसरतमा रहेको बुझिन्छ ।

अखिलको केन्द्रीय महाधिवेशन हुँदासम्म सञ्जय खगराज क्याम्पमा थिए । तर, त्यो महाधिवेशनमा स्थायी कमिटी लड्न खोज्दा उनलाई गण्डकीका विद्यार्थी नेताले साथ दिएनन् । उनकी श्रीमती शोभिना सुवेदी केन्द्रीय सदस्य बन्न खोज्दा पनि खगराज समूहका नेताहरूले अस्वीकार गरे । त्यतिबेला पृथ्वीसुब्बानिकट प्रकाश, आर.केले श्रीमती शोभिनालाई आफ्नो टिमबाट केन्द्रीय सदस्यको सूचीमा राखेका थिए । शोभिना निर्विरोध केन्द्रीय सदस्य बनिन् । केन्द्रीय महाधिवेशनमा आफूलाई असहयोग गरेकाले खगराजनिकट समूहबाट जो उठ्छ उसलाई प्रदेश अधिवेशनमा साथ नदिने योजनामा बैरागी छन् । उनले यी कुरा अस्वीकार गरे र अनेरास्ववियुमा गुट नरहेको दाबी गरे । ‘पार्टीमा होला तर विद्यार्थीमा गुट छैन । म अध्यक्ष लड्ने नै हो,’ सञ्जयले शिलापत्रसँग भने ।

अर्का आकांक्षी प्रबिन एमालेको ‘१० भाइ’ समूहका हुन् । उनी अखिलको गत वर्ष फागुनमा भएको महाधिवेशनमा स्थायी कमिटी सदस्य हारेका थिए । गण्डकीका दुवै गुटसँग नजिक प्रबिनलाई अध्यक्ष बनाएर सचिव पृथ्वीसुब्बा समूहलाई छोड्दा भोलि प्रबिनले गुट फेरेमा के गर्ने भन्ने डर खगराजनिकट विद्यार्थीमा छ । अखिल गण्डकीको नेतृत्वमा सकेसम्म कास्कीकै वा पोखरा बस्ने व्यक्ति हुनुपर्ने एकथरी मत छ । यसको अर्थ प्रबिन अध्यक्ष बन्नु हुँदैन भन्ने हो । यो मत पृथ्वीसुब्बा र खगराज दुवैनिकट विद्यार्थीबाट सुनिन्छ ।

अहिले अध्यक्षबारे चर्चा भए पनि केही नेता उपाध्यक्ष र सचिव बन्न पनि कसरत गरिरहेका छन् । आर.के उठेको हकमा उनको प्यानलबाट नवलपुरका सुरज सापकोटालाई सचिवको उम्मेदवार बनाउने तयारी छ । उनी अहिले प्रदेश कमिटी सहसंयोजक छन् ।

प्रबिन अध्यक्ष उठेमा उनको प्यानलबाट कास्कीका सुशन घिमिरे उपाध्यक्ष वा सचिवको उम्मेदवार बन्ने छन् । सुशन पनि प्रदेश कमिटी सहसंयोजक हुन् । उपाध्यक्ष वा सचिवमा हालका दुई सहसंयाेजक सुरज र सुशनको प्रतिस्पर्धा हुने पक्कापक्की छ ।

कास्कीकी कृति भट्टराई सर्वसम्मत कोषाध्यक्ष बन्ने सम्भावना छ । पर्वतका मोहनविक्रम पौडेललाई पनि पदाधिकारीमा समेट्न दुवै धारका विद्यार्थी नेता तयार छन् । आफूहरू पछि केन्द्रीय महाधिवेशन लड्दा पर्वतको साथ खोजिरहेका केन्द्रीय सचिव प्रकाश र आशीर्वाद पौडेललाई पदाधिकारीमा रोक्ने पक्षमा छैनन् ।

अखिलको प्रदेश अधिवेशनमा करिब ३ सय जना प्रतिनिधि आउने छन् । जिल्ला कमिटी, भूगोल कमिटी, क्याम्पस कमिटी, स्ववियु भएको क्याम्पसबाट प्रतिनिधि आउने व्यवस्था छ । अधिवेशन पोखराको पृथ्वीनारायण क्याम्पसमा गर्ने तयारी छ ।

प्रकाशित मिति: बुधबार, मंसिर २७, २०८० १७:५२