सुदूरपश्चिममा ५ करोडको लागतमा अक्सिजन ग्यास उद्योग सञ्चालनमा

A+ A A-

कैलालीको धनगढीमा ५ करोड रूपैयाँको लागतमा अक्सिजन ग्यास उद्योग सञ्चालनमा आएको छ । हिक्मत शाहले आफ्नो एकल लगानीमा मालिका अक्सिजन ग्यास उद्योग सञ्चालनमा ल्याएका हुन् । उक्त उद्योगको धनगढी उपमहानगरपालिकाका प्रमुख नृपबहादुर वडले बुधवार उद्घाटन गरेका हुन् ।

अस्पताल तथा अन्य उद्योगहरूका लागि आवश्यक पर्ने अक्सिजनको आपूर्तिका लागि प्रदेशलाई नै आत्मनिर्भर बनाउने उद्देश्यले धनगढीमा अक्सिजन ग्यास उद्योग स्थापना गरिएको सञ्चालक शाहले बताए । प्रदेशमा एउटा पनि ग्यास उद्योग नभएकाले कतिपय बिरामीको अक्सिजनको अभावमा मत्यु हुने समस्या रहेकाले आफूले उद्योग सञ्चालन गरेको शाहको भनाइ छ ।

सुदूरपश्चिम प्रदेशमै पहिलो पटक धनगढीमा अक्सिजन ग्यास उद्योग सञ्चालन गरिएको शाहको दाबी छ । दैनिक २ सय सिलिण्डर ग्यास उत्पादन गर्ने उक्त उद्योगको क्षमता रहेको सञ्चालक शाहले बताए । दमका बिरामी, आईसीयूमा राखिएका बिरामी तथा निर्माण कार्यमा अक्सिजन ग्यासको प्रयोग हुने उनले बताए ।

‘सुदूर पहाडमा झोलुङ्गे पुल निर्माण भइरहेका छन्, एउटै पुलको निर्माणस्थलमा दैनिक ५ सिलिन्डर अक्सिजन आवश्यक हुन्छ, भारतबाट अक्सिजन सिलिन्डर ल्याउन पनि समस्या भएपछि धनगढीमै उद्योग सञ्चालन गरेको हुँ,’ शाहले भने । उद्योग सञ्चालनका लागि धनगढीको पुरानो भन्सार रोडमा १० महिनासम्म अध्ययन गरिएको तथा भारतबाट उपकरण खरिदका लागि ६ महिना लागेको उनले बताए ।

दैनिक ३ हजार अक्सिजन ग्यास सिलिण्डरको माग रहेको सुदूरपश्चिममा यस उद्योगबाट उत्पादित अक्सिजनले मागको १५ प्रतिशत धान्ने शाहको भनाइ छ ।

दुई महिनाभित्र मागको ५० प्रतिशत धान्ने गरी उत्पादन गर्ने लक्ष्य लिएका छौं,’ उनले भने । शाहले उद्योग सञ्चालनका लागि कुनै पनि निकायबाट अनुदान सहयोग पाएका छैनन् । सामान खरिदका १५ प्रतिशत भन्सार छुट भने पाएका छन् ।

आठ जनालाई रोजगारी दिन थालेको यस उद्योगले अहिले कैलालीको टिकापुर, लम्की, सुख्खड र अत्तरिया तथा कञ्चनपुरको महेन्द्रनगरमा आधिकारिक विक्रेतासमेत तोकिसकेको छ ।

उद्योगले औद्योगिक भन्दा मानवीय सेवामा बढी सहयोग पु¥याउने बताइएको छ । सुदूरपश्चिममा काठमाडौं, विराटनगर, भैरहवालगायत क्षेत्रबाट अक्सिजन ग्यास सिलिण्डर आयात हुँदै आएकोमा अब सुदूरपश्चिमलाई आवश्यक पर्ने अक्सिजन मालिका ग्यास उद्योगले आपूर्ति गर्ने शाहले बताए ।

प्रकाशित मिति: बुधबार, असोज १५, २०७६ १९:०३