बाइडेन भन्छन्- अन्धाधुन्ध बमबारीका कारण इजरायलले विश्वव्यापी समर्थन गुमाएको छ (भिडियो)

बाइडेन भन्छन्- अन्धाधुन्ध बमबारीका कारण इजरायलले विश्वव्यापी समर्थन गुमाएको छ (भिडियो)

A+ A A-

इजरायल र हमासबीच दुई महिनाभन्दा बढी समययता युद्ध जारी छ । संयुक्त राष्ट्रसंघका अनुसार यो युद्धमा गाजातर्फ इजरायली बमबारीले ६ हजार घर क्षतिग्रस्त बनेका छन् ।

क्षतिग्रस्त बनेका घरमध्ये पनि दुई हजार घर पूर्ण रूपमा ध्वस्त भएको र खरानीमा परिणत भएको छ । हमासले हजारौँ रकेट आक्रमण गर्दै आफ्ना लडाकु दक्षिणी इजरायली क्षेत्रमा पठाएपछि इजरायलले हमास समाप्त गर्ने वाचा गर्दै व्यापक हवाई र थल आक्रमण गरिरहेको हो ।

इजरायलले सुरुङमा लुकेका हमासका लडाकुलाई अन्धाधुन्ध बम आक्रमण गरिरहँदा निर्दोष मानिसहरू मरिरहेको पनि टिप्पणी हुन थालेको छ । पछिल्लो जानकारीअनुसार इजरायली हमलाले झन्डै १८ हजार प्यालेस्टाइनीले गाजामा ज्यान गुमाएका छन्, जसमध्ये १० हजार बालबालिका, महिला र वृद्धवृद्धा भएको बताइएको छ ।

इजरायली हमलाले गाजा बस्न लायक छैन, पूर्ण रूपमा ध्वस्त बनिसकेको गाजामा कुनै समय २० लाख मानिस बसोबास गर्थे । यतिबेला इजरायली ट्यांकहरू नै गाजामा घुसिसकेका छन् र अन्धाधुन्ध बमबारी गरिरहेका छन् । २१औँ शताब्दीमा कुनै पनि देशको इलाकामा गरिएको यो नै भयावह हमला भएको बताउन थालिएको छ ।

यसबीचमा इजरायललाई हतियार सहयोग गर्ने वाचा गरेको अमेरिकाले नै इजरायलको आलोचना गरेको छ । अमेरिकी राष्ट्रपति जो बाइडेनले मंगलबार मात्र इजरायलले गाजामा गरेको ‘अन्धाधुन्ध बमबारी’का कारण विश्वव्यापी समर्थन गुमाउन थालेको बताएका छन् ।

बालबालिका र महिलाहरू पनि मारिन थालेपछि इजरायली प्रतिरक्षाले हमास समाप्त गर्ने नभएर गाजा नै समाप्त गर्ने सम्भावना बढेको टिप्पणी हुन थालेको छ । बाइडेनको यस्तो टिप्पणीलाई अमेरिकाबाट इजरायली नेतृत्वको अहिलेसम्मको सबैभन्दा कडा आलोचना भनिएको छ ।

तर, हालै मात्र अमेरिकाले राष्ट्रसंघ सुरक्षा परिषद्‌मा भिटो प्रयोग गर्दै गाजामा युद्धविराम गर्ने प्रस्ताव अस्वीकृत गरिदिएको थियो । यो कामले अमेरिकाले पनि चर्को विरोध खेपिरहेको छ ।

(भिडियो)