ऊर्जा उत्पादकको मागः घोषणा गरेका सुविधा देऊ, नभए आयोजनाको चाबी लेऊ

A+ A A-

निजीक्षेत्रबाट संचालिन जलविद्युत आयोजनाका प्रवद्र्धकले सरकारले गरेको प्रतिवद्धता र घोषणाअनुसारको सुविधा उपलब्ध गराउन माग गरेका छन् । सरकारले विभिन्न समयमा दिन्छु भनेका सुविधा नदिएको र आफूहरूलाई अप्ठेरो पार्ने काम मात्रै भएकाले आयोजना संचालन गर्न नै कठिन भएको भन्दै साना जलविद्युत आयोजना निर्माण र सञ्चालन गरिरहेका उद्यमीले सरकारलाई चाबी बुझाउने चेतावनी दिएका हुन् ।

सरकारले विभिन्न समयमा घोषणा र प्रतिवद्धता व्यक्त गरेका सुविधा र सहुलियतका विषय पूरा गरिदिन मात्रै माग गरिएको स्वतन्त्र ऊर्जा उत्पादकहरूको संस्था (इप्पान) का उपाध्यक्ष कुमार पाण्डेले बताए ।

‘हामीले सरकारसँग नयाँ र थप केही मागेका छैनौं, यसअघि गरिएका घोषणा र प्रतिवद्धता पूरा होस् भन्ने मात्रै हाम्रो माग हो, सरकार तथा अन्य सरोकारवाला निकायको व्यवहार र गतिविधिका कारण हामीले आयोजना सञ्चालन गर्नै नसक्ने अवस्था आएकाले आन्दोलित हुनुपरेको हो,’ उपाध्यक्ष पाण्डेले दोस्रो चरणको आन्दोलन घोषणा गर्न आयोजित पत्रकार सम्मेलनमा भने ।

आन्दोनका कार्यक्रम

इप्पानले नेपाल उद्योग वाणिज्य महासंघ र नेपाल उद्योग परिसंघसमक्ष समस्या र समाधानका सम्बन्धमा छलफल गर्ने, सत्तारुढ दल नेपाल कम्युनिष्ट पार्टीका अध्यक्ष र प्रमुख प्रतिपक्षी दलका सभापतिसमक्ष समस्या र समाधानका सम्बन्धमा छलफल गर्ने, सरकारका अर्थमन्त्री, ऊर्जा जलस्रोत तथा सिँचाइमन्त्री, नेपाल राष्ट्र बैंकका गभर्नर, विद्युत् नियमन आयोगका अध्यक्ष, नेपाल विद्युत् प्राधिरणका कार्यकारी निर्देशक, विद्युत् विकास विभागका महानिर्देशकसमक्ष समस्या र समाधानका सम्बन्धमा छलफल गर्नेजस्ता कार्यक्रम सार्वजनिक गरेको छ ।

यस्तै, प्रधानमन्त्रीसमक्ष ज्ञापनपत्र बुझाउने, विद्युत् नियमन आयोग, विद्युत् विकास विभाग र नेपाल विद्युत् प्राधिरणमा १ घण्टा धर्ना दिने, आयोजनास्थलमा आफूहरूका मागहरूका सम्बन्धमा जानकारीसहितको कालो ब्यानर राख्ने र माग पूरा नभएसम्म कालो पट्टी बाँधेर काम गर्ने कार्यक्रम रहेको छ । त्यति गर्दा पनि माग पूरा नभएमा ऊर्जा जलस्रोत तथा सिँचाइमन्त्रीसमक्ष कात्तिक १ गते रुग्ण २५ जलविद्युत् आयोजनाहरूको चाबी बुझाउनेसम्मका कार्यक्रम रहेको इप्पानको भनाइ छ ।

प्रकाशित मिति: बुधबार, असोज १५, २०७६ १८:०१