कार्यकर्ताकाे दबाबमा एकजुट हुँदै शेखर-गगन

A+ A A-

नेपाली कांग्रेसका नेता डा. शेखर कोइरालाले आफूपक्षीय पदाधिकारी, केन्द्रीय सदस्य, प्रदेश सभापति, १४औँ महाधिवेशनमा पदाधिकारीका उम्मेदवार रहेकालगायतलाई मंगलबार छलफलमा बोलाएका थिए । भेला बोलाउँदा कोइरालाले महामन्त्री गगन थापासँग भने छलफल गरेका थिएनन् । किनकि महामन्त्री थापासँग छलफल गरेको भए मंगलबारको बैठक सार्नुपर्ने अवस्था आउने थिएन ।

मंगलबार महामन्त्री थापाको मधेशमा पूर्वनिर्धारित कार्यक्रम थियो । उनी उतै व्यस्त हुने भएपछि समूहको बैठकमा अनुपस्थित हुने नै थिए । १४औँ महाधिवेशनमा सभापतिमा शेरबहादुर देउवासँग पराजित भएपछि शेखरले विरलै राख्ने आफूपक्षीय भेलाको सूचीमा यो भेला थियो ।

संवादहीनताको अवस्थामा रहेका शेखर र महामन्त्री थापाबीच मंगलबार बिहान केन्द्रीय सदस्य अर्जुननरसिंह केसीको इटालीटारस्थित निवासमा तीन घन्टा छलफल भयो । सो छलफलबाट मिलेर अघि बढ्ने सहमति भएपछि शेखर समूहको भेला एक दिन पर धकेलियो र भेलामा थापा उपस्थित हुने भएका छन् ।

यसअघि पनि केन्द्रीय समिति बैठकअघि आफूपक्षीय भेलासमेत शेखरले कहिलेकाहीँ टार्दै आएका छन् । एकै विषयका लागि उस्तै बैठक गरेर औचित्य छैन भन्ने निष्कर्षमा पुगेपछि शेखरले बैठक गर्ने गर्दैनन् । योबीचमा शेखर सभापति देउवासँग काम गर्ने मामिलामा मिल्दै छन् भन्ने भाष्य सिर्जना भयो । शेखरले त्यसको प्रतिकार गरे र आफू देउवासँग सभापतिको नाताले काम गर्ने बताए ।

महामन्त्री थापासँग कार्यशैलीमा फरक रहने दुईवटा कारण थिए । पहिलो, संघीय सरकारको मन्त्री छनोट र दोस्रो, कोशी प्रदेश सरकार प्रकरण । संघ सरकारमा मन्त्री छान्दा शेखरले सभापति देउवालाई मन्त्री नाम दिएर धुम्बाराहीबाट विमानस्थलतिर लागेका थिए । उनी सिङ्गापुर उपचारका लागि गएका थिए ।

त्यसपछि, कोशीमा मध्यावधिअघिको अन्तिम विकल्पको सरकार बन्दै थियो । सत्ता गठबन्धन र सभापति देउवाले शेखर समूहलाई मुख्यमन्त्री दिनुभन्दा माओवादीलाई मुख्यमन्त्री दिन तयार भए । शेखरले विद्रोह गर्न मुख्यमन्त्रीमा दाबी गर्न केदार कार्कीलाई अह्राए । एमालेको सहयोगबाट मुख्यमन्त्री आफ्नो समूहमा ल्याउन सफल भए शेखर । सो समयमा उनले पार्टीका कुनै पनि नेतासँग छलफल गरेका थिएनन् ।

काम सही भए पनि तरिका गलत रहेको थापाले बताए भने शेखरले आवश्यक नरहेकाले छलफल नगरेको प्रस्टीकरण दिए । त्यसपछि उनीहरूबीच संवाद पातलिँदै गयो । महामन्त्री थापा १५औँ महाधिवेशनसम्म आफू कोइरालासँग रहने बताउँछन् । पार्टीभित्र सभापति देउवाविरुद्ध एकजुट भएर लड्नुपर्ने बेलामा आफैँमा लडेर उपलब्धि नहुने बुझाइमा दुवै नेता छन् । इतर समूहमा फाटो आउँदा समूह कमजोर हुने मात्र होइन, पार्टी नै कमजोर हुने भएकाले समूह एक हुनुपर्ने सहमतिमा शेखर-गगन छन् ।

यो पनि :