सरकारले धानको मूल्य कम तोकेपछि व्यापारीलाई धान बेच्दै किसान

A+ A A-

नेपाल सरकारको स्वामित्वमा रहेको खाद्य व्यवस्था तथा व्यापार कम्पनी लिमिटेड प्रादेशिक कार्यालय जनकपुरधामले यस वर्ष धानको खरिद मूल्य कम तोकेपछि किसानहरू व्यापारीलाई धान बेच्न बाध्य भएका छन् ।

यस वर्ष संघीय सरकारले सोना मनसुली धानको प्रतिक्विन्टल ३ हजार ३६२ रुपैया खरिद मूल्य तोके पनि निजी क्षेत्रका गल्ला व्यापारीहरूले सोही धान प्रतिक्वीन्टल ३ हजार ६ सयमा किन्न थालेपछि किसानहरूले व्यापारीहरूलाई धान बेच्न थालेका छन् । किसानहरूले व्यापारीलाई धान बेच्न थालेपछि चालु आर्थिक वर्षमा पनि सो कम्पनीको धान खरिदको लक्ष्य पूरा नहुने देखिएको निमित्त प्रादेशिक प्रमुख गंगा प्रसाद साहले बताए ।

सो कम्पनीले चालु आर्थिक वर्षमा सोना मनसुली ३० हजार क्विन्टल तथा बासमती ११ हजार क्विन्टल खरिद गर्ने लक्ष्य लिएकोमा सोमबारसम्म ४१ क्विन्टल मात्र धान किनेको जनाएको छ । अघिल्लो वर्ष ३४ लाख १२० रुपैया मूल्य बराबरको १ हजार ९३.५ क्विन्टल धान खरिद गरेको थियो । अघिल्लो वर्ष १५ हजार क्विन्टल धान खरीद गर्ने लक्ष्य राखेकोमा झञ्झटिलो प्रक्रियाका कारण लक्ष्य पूरा हुन सकेको थिएन ।

वडा कार्यालयको सिफारिसमा कार्यालयले एक किसानसँग १०० क्वीन्टल तथा अधियाँमा खेती गर्ने किसानसँग प्रतिकिसान २५ क्विन्टल धान खरीद गर्ने नीति लिए पनि झञ्झटिलो प्रक्रिया तथा व्यापारीलाई बेच्दा बढी मूल्य पाउने भएपछि किसानहरूले व्यापारीलाई धान बेचेका हुन् ।

कार्यालयका सूचना अधिकारी रामपुकार मण्डल संघीय सरकारले किसानसँग धान खरिद गर्दा समर्थन मूल्य न्यून तोकेकोकाले निजी क्षेत्रका व्यापारीसँग प्रतिस्पर्धा गर्न नसक्ने भएकोले चालु आर्थिक वर्षमा लक्ष्य पूरा हुन नसक्ने बताउँछन् ।

त्यस्तै वीरगञ्ज शाखाले पनि यस वर्ष सोनामनसुली ३५ हजार क्विन्टल र कतर्नी १० हजार क्विन्टल धान खरिद गर्ने भएको छ भने लहान शाखाले सोनामनसुली १८ हजार क्विन्टल र कतर्नी १२ हजार क्विन्टल खरीद गर्ने लक्ष्य लिएको छ । खाद्य व्यवस्था तथा व्यापारी कम्पनी लिमिटेड जनकपुरधामले यसवर्ष मंसिर २० देखि धान खरिद गर्न थालेको हो ।

प्रकाशित मिति: सोमबार, मंसिर २५, २०८० २०:४६