कोअर्डिनेटर हटाएको निहुँमा नाथमका विद्यार्थी आन्दोलित, कोअर्डिनेटर विनोद अर्याल विवादमा

कोअर्डिनेटर हटाएको निहुँमा नाथमका विद्यार्थी आन्दोलित, कोअर्डिनेटर विनोद अर्याल विवादमा

A+ A A-

नेपाल पर्यटन तथा होटल व्यवस्थापन प्रतिष्ठान (नाथम) को ब्याचलर अफ होटल म्यानेजमेन्ट (बीएचएम) र ब्याचलर अफ ट्राभल एण्ड टुरिज्म म्यानेजमेन्ट (बीटीटीएम) कार्यक्रममा कोअर्डिनेटरको जिम्मेवारी हेरफेर गरेपछि विद्यार्थी आन्दोलित भएका छन् । ती कार्यक्रममा कोअर्डिनेटरले आफ्नो जिम्मेवारी खोसिएको विषयलाई विद्यार्थीसम्म पुर्‍याएर आन्दोलित गराएको आरोप लागेको छ ।

ब्याचलर अफ होटल म्यानेजमेन्ट (बीएचएम) कार्यक्रममा कोअर्डिनेटर विनोद अर्याल विवादमा तानिएपछि नाथम प्रशासनले उनको जिम्मेवारी खोस्ने निर्णय गरेको थियो । २२ मंसिरमा नाथम प्रशासनले गरेको निर्णय २४ मंसिरमा उनीहरूलाई जानकारी गराइएको थियो । अर्यालले जानकारी पाएको भोलिपल्ट नै विद्यार्थीलाई आन्दोलित गराएर कोअर्डिनेटर जिम्मेवारी हेरफेर गर्न नपाइने माग राखेका छन् । अहिले नाथमको बीएचएम र बीटीटीएमका केही विद्यार्थी उक्त आन्दोलनमा सक्रिय रहेका छन् । अर्यालसहितको टोली पर्दापछाडि रहेर विद्यार्थीहरू नाथमका कार्यकारी निर्देशक, प्रिन्सिपल र प्रशासन प्रमुखविरुद्ध आन्दोलन भइरहेको छ ।

कोअर्डिनेटर हटाउने २२ मंसिरको निर्णयअघि नाथममा प्रिन्सिपल राम कैलाश विच्छाको शैक्षिक प्रमाणपत्र विवादमा रहेको विषय उठेको थियो । विच्छाको शैक्षिक प्रमाणपत्र नक्कली रहेको भन्दै नाथमका केही शिक्षक तथा कर्मचारीले प्रश्न उठाएका थिए । भारतमा पढेका विच्छाको उक्त शैक्षिक प्रमाणपत्रका विषय टुंगो नलाग्दै अर्को बीएचएमका कोअर्डिनेटर अर्यालको विवाद सार्वजनिक भएको हो ।

यता, अर्याल केही वर्षदेखि ब्याचलर अफ होटल म्यानेजमेन्ट (बीएचएम) कार्यक्रमको कोअर्डिनेटरको रूपमा रहेका थिए । कोअर्डिनेटर भएसँगै उनले बीएचएमका विद्यार्थीलाई पढाउन छोडेर ब्याचलर अफ ट्राभल एण्ड टुरिज्म म्यानेजमेन्ट (बीटीटीएम) का विद्यार्थीलाई पढाउँथे । त्यसरी आफ्नो कार्यक्रममा कक्षा नलिँदा बीएचम कार्यक्रममा अन्य कार्यक्रमका शिक्षक तथा बाहिरबाट आफन्त ल्याएर कक्षा सञ्चालन गर्दा अर्यालले दोहोरो सुविधा लिइरहेका थिए ।

एकातिर आफन्तलाई सुविधा दिएका थिए भने अर्कातिर नाथमबाट वर्षमा २२ महिनाको तलब सुविधा लिइरहेका थिए । कोअर्डिनेटर भएर बीएचएमको सेवा सुविधा लिने अनि बीटीटीएमका विद्यार्थीबाट अर्को सुविधा लिइरहेका थिए । नाथममा कोअर्डिनेटरले कार्यक्रममा कक्षा नलिने भन्ने व्यवस्था नभएको नाथम प्रशासनको भनाइ छ । नाथम प्रशासनको भनाइमा कोअर्डिनेटर भएर सेवा सुविधा लिने अनि अर्को कार्यक्रममा कक्षा लिँदा नाथमले दोहोरो सुविधा दिनुपर्ने बाध्यता आइलागेको थियो । त्यही कारण कोअर्डिनेटरले आफ्नो कार्यक्रम छोडेर अन्य कार्यक्रमको कक्षा लिन नपाउने र आफ्नो कार्यक्रमअन्तर्गतको कक्षा अनिवार्य रूपमा लिनुपर्ने व्यवस्था गरेको छ । उक्त व्यवस्थामा पनि अर्याल नाथम प्रशासनसँग रुष्ट भइरहेका थिए ।

त्यसबीचमा उनीमाथि अर्को गम्भीर आरोप आइलाग्यो । नाथम प्रशासनले विद्यार्थी प्रशिक्षार्थीको रूपमा विदेश पठाउने निर्णय प्रशासनलाई जानकारी नदिई अर्याल आफैँले गरेको गम्भीर रहस्य खुल्यो । छैटौँ र सातौँ सेमेस्टरमा अध्ययनरत विद्यार्थीलाई नाथमले प्रशिक्षार्थीको रूपमा विदेश पठाउने गरेको थियो । चालु आर्थिक वर्षमा अर्यालको एकल निर्णयबाट केही विद्यार्थीलाई अमेरिका पठाउने लागेको रहस्य खुल्यो । एक कन्सल्टेन्सीसँग मिलेर अर्यालले विद्यार्थीलाई जे वान भिसामा अमेरिका पठाउन सिफारिसपत्र दिएका हुन् ।

अर्याल र कन्सल्टेन्सी मिलेर एक जना विद्यार्थीबराबर १० लाख रुपैयाँ लिएर सिफारिस गरेको त्यतिबेला खुल्यो, जतिबेला अर्यालको सिफारिसमा अमेरिका उड्न लागेका विद्यार्थी त्रिभुवन अन्तर्राष्ट्रिय विमानस्थलबाट फिर्ता भए । विमानस्थलबाट फिर्ता भएपछि नाथम प्रशासनले गर्नुपर्ने सिफारिस कोअर्डिनेटरको हैसियतमा अर्यालले गरेको पाइएको हो ।

तीन महिनाअघिको उक्त घटनापछि नाथम प्रशासनले कडाइ सुरु गरेको थियो । नाथम प्रशासनले निर्णय गरी सिफारिसपत्र नभई विद्यार्थी पठाउन नपाउने निर्णय मात्र गरेन, कोअर्डिनेटरलाई उक्त सिफारिस नगर्न कडाइ पनि गरेको थियो । अर्यालको उक्त प्रकरणपछि भिसाका लागि पहिला नाथमको सिफारिसपत्र भए पुग्नेमा अब भने दूतावासहरूले नो अब्जेक्सन लेटरसमेत माग्न थालेका छन् ।

नाथमले चालु आर्थिक वर्षमा विद्यार्थीहरू विदेश पठाउनका लागि कम्पनी छनोटका लागि आह्वान गरेको थियो । त्यस क्रममा जापान र खाडी क्षेत्रका देशमा विद्यार्थी पठाउनका लागि दुईवटा कम्पनी छनोट भइसकेका छन् । नाथमले विद्यार्थीलाई अमेरिका भने पठाउने गरेको थिएन । विद्यार्थीको परिवारले फर्किने जिम्मा लिएपछि मात्रै विद्यार्थी अमेरिका पठाउने गरेको थियो । तर, अर्यालले भने नाथम प्रशासनलाई जानकारीसमेत नदिई सिफारिस गरेका थिए । यो आर्थिक वर्षमा करिब ८० जना विद्यार्थी प्रशिक्षार्थीको रूपमा विदेश गएका बताइएको छ ।

उनीहरू प्रशिक्षणलगत्तै नेपाल फर्किने र आठौँ सेमेस्टरको परीक्षामा सहभागी हुने गर्दछन् । भिसाका लागि अमेरिका विद्यार्थी पठाउन गरिएको सिफारिस र विद्यार्थी विमानस्थलबाट फर्किएको सन्दर्भमा चाहिँ अर्यालले आफूले राम्रैका लागि गरेको र अधिकार क्षेत्रभित्र रहेर सिफारिस गरेको दाबी गरे । अर्यालले भने, ‘पहिला हामीलाई कोअर्डिनेटरले सिफारिस गर्ने अधिकार दिएको थियो, त्यही आधारमा मैले अमेरिका जान चाहेका विद्यार्थीलाई सिफारिस गरेको हुँ ।’

प्रशासनको जानकारीबिना कोअर्डिनेटरले सिफारिस गरेपछि विवाद बढ्न थालेको थियो । त्यही कारण प्रशासनले अहिलेसम्म कति जनालाई अमेरिकाका लागि सिफारिस गरेको छ ? भनेर अर्यालसँग विवरण मागेको छ । प्रशासनले विवरण मागेको १० दिन भइसक्दा पनि अर्यालले विवरण दिएका छैनन् । विवरण दिन आनाकानी गरेका अर्याललाई नाथम प्रशासनले २२ मंसिरमा कोअर्डिनेटरबाट पनि हटाएको छ ।

हटाइएकाहरूमा आर्यालसहित बीटीटीएमका कोअर्डिनेटर शुभम पौडेल, बीएचएमका सहकोअर्डिनेटर अशोक उपाध्याय, समिक शर्मा र बीटीटीएमका सहकोअर्डिनेटर मनोज प्रजापति रहेका छन् । कोअर्डिनेटरबाट हटाएपछि विद्यार्थीलाई उचालेर नाथम कलेज प्रशासन, प्रिन्सिपल र कार्यकारी निर्देशकविरुद्ध आन्दोलन गराएका छन् । २५ मंसिर अर्थात् आजबाट विद्यार्थीले कोअर्डिनेटर फेर्न नपाइने भन्दै आन्दोलन गर्न थालेका हुन् ।

२२ मंसिरमा कोअर्डिनेटरबाट हटाइएका अर्यालले भने प्रशासनले हचुवाको भरमा कोअर्डिनेटर हटाएका कारण विद्यार्थीहरू आन्दोलित भएको बताए । शिलापत्रसँगको कुराकानीमा अर्यालले भने, ‘प्रशासनले बिनाकारण र हचुवाको भरमा कोअर्डिनेटर र सहकोअर्डिनेटर गरी ५ जनालाई एकसाथ हटाउने निर्णय गर्‍यो, त्यसको विरोध विद्यार्थीले गरेका हुन् ।’

त्यसो त अर्यालले केही महिना लोकसेवा आयोगको विज्ञापनविरुद्ध आन्दोलन गरेका थिए । नाथमले लोकसेवा आयोगमार्फत आठौँ तहको कर्मचारी खुला प्रतिस्पर्धाबाट पूर्ति गर्ने गरी विज्ञापन खुलाएको थियो । सातौँ तहका अर्याल उक्त विज्ञापनविरुद्ध नाथम परिसरमा एक्लै अनशन बसेका थिए । बुटवल उपमहानगरपालिकाकी उपमेयर सावित्री अर्यालका छोरा विनोद अर्यालले राजनीतिक शक्ति प्रदर्शनको अभ्यास पनि गरेका छन् ।

अनशनको बेलामा पनि उनले नाथम प्रशासनलाई त्यही राजनीतिक शक्ति प्रयोग गरेर दबाब दिएका थिए । कतिसम्म भने एमाले उपाध्यक्ष विष्णु पौडेलबाट समेत नाथम प्रशासनलाई दबाब दिन लगाएका थिए । आन्तरिक बढुवा गर्नुपर्ने मागसहित आन्दोलन गरेका अर्यालको माग नाथम प्रशासनले पूरा गरिदिएन । त्यही बेलादेखि रुष्ट अर्याल अहिले भने विद्यार्थीलाई प्रयोग गरेर आन्दोलनको मोर्चामा लागेका हुन् ।

प्रकाशित मिति: सोमबार, मंसिर २५, २०८० १६:१५