प्रहरी समायोजनको लागि प्रदेशको गुहार, संघ सरकार पर सार्छ तिथिमिति

A+ A A-

मधेश प्रदेश सरकारले प्रहरी समायोजनलगायतका विभिन्न ६ बुँदे माग राखेर दिएको ३० दिने अल्टिमेटमको समय शनिबार सकिएको छ । प्रदेश राजधानी जनकपुरधामबाट प्रहरी समायोजनसहितका माग पूरा गराउन मुख्यमन्त्री सरोज कुमार यादवको टोली १५ दिनेको अल्टिमेटम दिने भनेर गत कात्तिकमा बालुवाटार पुगेको थियो । तर, बालुवाटरले १५ दिन कम भएको बताएपछि यादवले उक्त समय ३० दिन पुर्‍याएका थिए ।

त्यसबेला मुख्यमन्त्री यादवलाई लागेको थियो- प्रधानमन्त्री पुष्पकमल दाहाल प्रचण्डले १५ दिनको समय कम भन्नुको अर्थ उनी आफूहरूको मागलाई गम्भिरतापूर्वक लिइरहेका छन् । सोहीकारण समय बढाउन आग्रह गरेका छन् । यादवले पनि अन्य दलका नेताहरूसँग सल्लाह नै नगरी १५ दिन थपिदिए । ३० दिनमा पनि माग पूरा भएन ।

प्रदेश सकारका एक मन्त्री भन्छन्, ‘संघीय सरकारले हाम्रो मागका बारेमा कुनै चासो लिएको छैन । यो अवधिमा प्रधानमन्त्री प्रचण्डले कुनै दल तथा प्रहरीका उच्च अधिकारीहरूसँग छलफल नगर्नुले पुष्टि गर्छ । हाम्रो अल्टिमेटमको संघीय सरकारले वास्ता नै गरेको छैन ।’

३० दिने अल्टिमेट सकिएपछि मुख्यमन्त्री यादवसहित अन्य दलका नेताहरूले संयुक्त टोलीले आइतबार ध्यानकर्षण गरायो । प्रचण्डले पुरानै कुरा दोहोर्‍याएको भेटमा सहभागी एक नेता बताउँछन् । मुख्यमन्त्री यादव नेतृत्वको टोलीले शनिबार प्रचण्डलाई भेट्ने कार्यक्रम थियो । तर, प्रचण्ड शनिबार आफन्तको विवाहमा सहभागी हुन हिँडेपछि आइतबार मात्र छलफलको समय जुर्‍यो ।

भेटमा मुख्यमन्त्री यादवले आफूहरुले दिएको ३० दिनको समय शनिबार सकिएको बताउँदै अव संवैधानिक व्यवस्थाअनुसार कानुन निर्माणको लागि संघर्षमा जाने बताए । ‘अल्टिमेटमको समय सकियो, तर हाम्रो माग पूरा भएन, अब हामी संघर्षमा जान्छौँ भनेर भन्यौँ,’ यादवले भने, 'जवाफमा प्रधानमन्त्रीज्यूले तपाईंहरूको मागलाई सरकारले सकरात्मक रूपमा लिएको छ, दबाब बनाउनुपर्‍यो, थप केही समय दिनुपर्‍यो भन्नुभयो ।’

मुख्यमन्त्री नेतृत्वको टोलीमा सहभागी नेताहरूलाई प्रचण्डले आफ्नो दल तथा गठबन्धनका नेताहरूलाई भेटेर पनि प्रहरी समायोजनलगायतका कुरा राख्न सुझाएका भेटमा सहभागी एक नेताले बताए । केही समयअघि महोत्तरीको एक कार्यक्रम सहभागि हुन आउँदा पनि प्रचण्डले मुख्यमन्त्री यादवसँग यही कुरा गरेका थिए ।

यसले प्रस्ट हुन्छ कि प्रचण्ड यो सवालमा निरीह देखिएका छन् । उनले चाहेर पनि प्रहरी समायोजन अगाडि बढ्न सक्ने अवस्था छैन । अर्कातर्फ संघर्षको चेतावनी दिए पनि मुख्यमन्त्री यादव संघर्षमै गइहल्ने पक्षमा देखिएका छैनन् ।

‘मैले दलहरूको बैठकमै भनेका थिएँ- अल्टिमेटम दिए पनि उपलब्धि हुँदैन, बालुवाटारमै धर्ना दिएपछि मात्रै केही हुने हो । मेरो कुरा अन्य पार्टीका साथिहरूले समर्थन गर्नुभएन,’ प्रदेश सरकारमा सहभागी जसपाका मन्त्री भन्छन्, 'संघीय सरकार तथा उच्च पदस्थ कर्मचारीहरू नै प्रहरी समायोजन, निजामती कर्मचारी ऐन कार्यान्वयन होस् भन्ने चाहँदैनन् । जबसम्म मधेश तातिँदैन केही हुने छैन ।’

प्रचण्डलाई भेट्नुअघि प्रदेशसभाबाट संकल्प प्रस्ताव सर्वसम्मतिले पारित भएको थियो । त्यसको उद्देश्य थियो- प्रदेशका सबै दल प्रहरी समायोजनको पक्षमा छन् भन्ने सन्देश दिनु । आइतवार प्रधानमन्त्री प्रचण्ड, कांग्रेस सभापति शेरबहादुर देउवा, एकीकृत समाजवादीका अध्यक्ष माधवकुमार नेपाल, जसपा अध्यक्ष उपेन्द्र यादवसहितका शीर्ष नेताहरूलाई भेटेर मुख्यमन्त्री यादवले प्रदेशसभाबाट पारित संकल्प प्रस्ताव दिएका थिए ।

मुख्यमन्त्री यादव शीर्ष नेताहरू आफूहरूको मागमा सकरात्कमक देखिएको बताउँछन् । ‘हामीले सबै दलका शीर्ष नेताहरूलाई संकल्प प्रस्ताव र ६ सुत्रीय मागबारे ध्यानकर्ष गराएका छौँ । सबैले सकरात्मक रूपमा लिएका छन्,’ यादव भन्छन्, 'अहिले आन्दोलन गर्ने निर्णय गरेका छैनौँ । २/४ दिनमै यो विषयमा दलहरूको बैठक हुन्छ । त्यसबाट केही न केही निष्कर्ष निकलिन्छ होला । त्यसपछि मात्रै अगाडि के गर्ने भनेर निर्णय गर्छौं ।’

विश्लेषक चन्द्रकिशोर भने राष्ट्रिय पार्टीहरूको केन्द्रिकृत मानसिकता, कर्मचारीतन्त्रको असहयोग तथा प्रदेश सरकारको लबिङ गर्न नसक्दा प्रहरी समायोजनलगायतमा ढिलाइ भइरहेको बताउँछन् । 'प्रदेश संरचना विगत ६ वर्षदेखि अभ्यासमा छ । तर सबै काम काठमाडौंबाटै भइरहेको छ । सबै केन्द्रले नै चलाइरहेको छ,' उनी भन्छन्, 'अहिले जुन संरचनागत शक्तिहरूले केन्द्रले चलाइरहेका छन्, त्यो प्रदेशमा गएको खण्डमा शक्ति कमजोर हुने थ्रेट महशुस गरिरहेका छन् ।’

चन्द्रकिशोर प्रदेश सरकारले लबिङ गर्न नसक्नुलाई पनि यसको दोष दिन्छन् । 'प्रहरी समायोजनलगायतका विषयमा प्रदेश सरकार जुन हिसाबले अगाडि बढुनुपर्ने थियो त्यो हिसाबले अगाडि बढ्न सकिरहेको छैन । ज्ञापनपत्र, ध्यानकर्षण पत्र दिएर केही हुँदैन । मधेशबाट सार्थक लबिङको आवश्यकता छ,’ उनी भन्छन् ।

प्रकाशित मिति: आइतबार, मंसिर २४, २०८० २०:५०