भोलोदिमिर जेलेन्स्की- सबैले बिर्सिएका मान्छे

युक्रेनका राष्ट्रपति भोलोदिमिर जेलेन्स्की

A+ A A-

युक्रेनका राष्ट्रपति भोलोदिमिर जेलेन्स्की ती बेवास्ता गरिएका व्यक्ति हुन्, जसले सबैले बिर्सने युद्ध लडिरहेका छन् । उनी कुनै बेला उदाउँदो तारा थिए, पश्चिमा राष्ट्रहरूबाट लगातार शक्तिशाली हतियारहरू पाइरहँदा उनी भन्थे कि– अन्तिम सास रहुञ्जेलसम्म रुसविरुद्ध युद्ध लडिरहन्छु ।

यतिबेला युक्रेनमा रुसी आक्रमणको दुई वर्ष नजिकिँदै गर्दा अब उनी आफूलाई सबैले बिर्सिए भन्ने आभास गर्छन् । उनी सबैले बेवास्ता गरिरहेको युद्धको चुनौतीहरूसँग लडिरहेका छन् । पश्चिमा राष्ट्रबाट हतियार सहयोग नपाएपछि युक्रेनको प्रतिरोधको उत्साह घटेको छ, जसले जेलेन्स्कीलाई अनिश्चित अवस्थामा छोडेको छ ।

सुरुमा आक्रामक यस युद्ध अहिले लामो गतिरोधमा परिणत भएको छ, जसमा अपेक्षित सफलताहरू अधुरै छन् । आफ्नो अपरम्परागत दृष्टिकोणका लागि परिचित युक्रेनी राष्ट्रपतिले अन्तर्राष्ट्रिय समर्थनमा गिरावट देखेका छन् । एकपटक उनको साहसको प्रशंसा गर्ने स्तम्भकारहरू अहिले आलोचनात्मक बनेका छन्, र विश्वव्यापी रूपमा विभिन्न देशले सम्बोधनका लागि गर्ने निमन्त्रणाहरू घटेका छन् ।

कुनै समय रुसविरुद्ध प्रतिरोधको प्रतीक मानिएका जेलेन्स्कीमा युद्ध लम्बिँदै जाँदा संसारको चासो घट्दै गइरहेको अवस्था छ । युक्रेनको पक्षमा सामूहिक प्रदर्शनहरू पनि घटेका छन् भने युक्रेनबारे समाचार कसैलाई चासो छैन ।ह्वाइट हाउसबाट हालैका खुलासाहरूले युक्रेनमा भ्रष्टाचारको बारेमा बढ्दो चिन्तालाई संकेत गर्दछ जसले जेलेन्स्कीको नेतृत्वका लागि विगतको प्रशंसालाई ओझेलमा पार्छ ।

रुसविरुद्धको युद्धमा अर्बौं खर्च भइसकेको छ, उसले यतिबेला अमेरिकासहित आफ्ना सहयोगी राष्ट्रलाई सहायता मागिरहेको छ जसले युक्रेनमा आर्थिक तनाव बढ्दो रूपमा स्पष्ट पनि हुँदै गइरहेको छ । तर, अमेरिका र युरोपेली संघबाट निरन्तर समर्थनको सम्भावना अनिश्चित छ । पछिल्लो समय अमेरिकी सिनेटले युक्रेनलाई आर्थिक र सैन्य सहयोग गर्ने कोष अस्वीकृत गरिदिएको थियो । अमेरिकी सांसदहरूको अनिच्छाले अमेरिकी सरकारको युक्रेनलाई सहयोग गर्ने प्रतिबद्धता लोप हुने देखिन्छ ।

युरोपेली र अमेरिकी सहयोगीहरूको समर्थन गुमाउने जोखिमको सामना गरिरहेका जेलेन्स्की समय आफ्नो पक्षमा छैन भनी सचेत छन् । विश्वको ध्यान युक्रेनबाट पर–पर सर्दै जाँदा युक्रेनको रक्षाका लागि पहिले बढेका हातहरू छुट्दै गएका छन् । त्यसमाथि अमेरिकामा डोनाल्ड ट्रम्प सत्तामा फर्किने खतराले जेलेन्स्कीको दुर्दशामा अनिश्चितताको अर्को तह थपिएको छ ।

स्रोतको अभावका सम्भावित नतिजाहरूले रुसको आक्रमणको प्रतिरोध गर्ने युक्रेनको क्षमतालाई असर गर्न सक्छ । युक्रेनका विदेशमन्त्री, दिमिट्रो कुलेबाको निराशाजनक बयानका बावजुद अमेरिकी सिनेटमा युक्रेनका लागि छुट्याइएको बजेट पारित हुन सकेन । जसले रुसको आक्रामकताविरुद्धको एकताबद्ध मोर्चा टुक्रिने संकेत देखाउँछ । कुलेबाले सहयोगीबाट हतियार नपाए रुसले युद्ध जित्ने बारम्बार बताउँदै आएका छन् ।

जेलेन्स्कीले यी चुनौतीहरूबारे बारम्बार विश्वलाई बताइरहेका छन् तर अन्तर्राष्ट्रिय मञ्चमा समानान्तर संकट देखा परेको छ, हमास र इजरायलबीचको युद्ध । युक्रेनमा रुसको कारबाहीलाई गाजामा इजरायलको कारबाहीले ओझेलमै पारेको छ । यस विकसित घटनाक्रमले यही देखाउँछ कि जेलेन्स्कीले उदासीनता र अस्पष्टताको डरलाग्दो वास्तविकताको सामना गर्नुपर्छ ।

मध्यपूर्वमा चलिरहेको द्वन्द्वसहित विश्वले धेरै संकटहरूसँग जुधिरहेको बेला जेलेन्स्की र उनको राष्ट्रको दुर्दशा अवश्य छायामा परेको छ । युक्रेन युद्धमा व्यापक उदासीनताले विश्वव्यापी नेतृत्वको असफलता र अन्तर्राष्ट्रिय कार्यहरूलाई मार्गदर्शन गर्ने सिद्धान्तहरूको अवहेलनालाई झल्काउँछ ।

जेलेन्स्कीको संघर्ष युक्रेनका चुनौतीहरूको प्रतिबिम्ब मात्र होइन, यो भूराजनीतिक गणना र कूटनीतिक गलत गणनाका परिणामहरूको फराकिलो मुद्दाहरूको प्रमाण पनि हो । युक्रेनको भाग्य कुनै समय विश्वव्यापी चिन्ताको अग्र भागमा पर्थ्यो भने अब त्यो अस्पष्टताको छेउमा छ । जसले अन्तर्राष्ट्रिय प्राथमिकताहरूको पुनः मूल्याङ्कन र अटुट सिद्धान्तहरूप्रति समर्पणको आवश्यकतालाई जोड दिन्छ ।

अल जजिरामा प्रकाशित सामग्रीको शिलापत्रका सविन राईले भावानुवाद गरेका हुन् ।

प्रकाशित मिति: सोमबार, मंसिर २५, २०८० ०८:२१