मनाङेलाई मन्त्री बनाउन गण्डकीका मुख्यमन्त्रीलाई माधव नेपालको दबाब

A+ A A-

मनाङ (ख) बाट निर्विरोध चुनाव जितेपछि एकीकृत समाजवादी प्रवेश गरेका राजीव गुरुङ (दीपक मनाङे) गत वैशाखमा मन्त्रिपरिषद् विस्तार हुनेबेला मन्त्री बन्ने चर्चा थियो । तर, मन्त्री बन्ने चर्चाबीच उनी मन्त्रिपरिषदमा अटाएनन् ।

एकीकृत समाजवादीका अध्यक्ष माधवकुमार नेपालले मनाङेलाई मन्त्री बनाउन गण्डकीका मुख्यमन्त्री सुरेन्द्रराज पाण्डेलाई निरन्तर दबाब दिइरहेका छन् । अध्यक्ष नेपालले पाण्डेसँगको भेटमा मात्र होइन, फोनमार्फत नै विगतको समझदारीअनुसार आफ्नो पार्टीलाई मन्त्री दिइनुपर्ने बताउँदै आएका छन् ।

अध्यक्ष नेपालले वैशाखमा मन्त्रिपरिषद् विस्तार हुँदा मनाङे किन अटाएनन् र पार्टी सरकारमा गएन भन्ने खुलासा ६ महिनापछि शनिबार प्रदेश राजधानी पोखरामा गरेका छन् ।

आफूहरू गठबन्धन रहेको सबै प्रदेश सरकारमा सहभागी हुने र नीति तथा योजना आयोगको सदस्य पाउने सहमति भएको उनले खुलाए । अन्य प्रदेश सरकारमा सहभागी भए पनि गण्डकीका मुख्यमन्त्रीले आलटाल गरेको अध्यक्ष नेपालले दुखेसो पोखे । 'योजना आयोगमा सदस्य हुनुहुन्छ । अर्को सहमति कार्यान्वयन भएको छैन,' नेपालले भने, 'यहाँका मुझ्यमन्त्रीले आलटाल गर्नुभएको छ । अस्ति पनि उहाँलाई भनेको थिएँ । आज पनि उहाँलाई फोन गर्छु ।'

गण्डकी प्रदेशको योजना आयोगमा एकीकृत समाजवादीको कोटाबाट समाजशास्त्री अञ्चला चौधरी सदस्य छिन् । गत १६ असारमा सदस्य नियुक्त भएकी चौधरी अध्यक्ष नेपालको गृहजिल्ला रौतहटकी (माइत) हुन् । पोखरा विश्वविद्यालय, गण्डकी विश्वविद्यालय र पृथ्वीनारायण क्याम्पसमा समाजशास्त्र प्राध्यापन गरेकी चौधरी पोखरा-२१ कृष्तिकी बासिन्दा हुन् ।

एकीकृत समाजवादीलाई मन्त्रिपरिषद् विस्तार गर्दा सरकारमा सहभागी गराउने सहमति भए पनि मुख्यमन्त्री पाण्डे विवादित छवि र आफूलाई नै भारी हुने देखेपछि मनाङेलाई ल्याउन चाहँदैनन् ।

गठबन्धनको सदस्य हुँदै मन्त्री बन्ने लक्ष्य लिएर मनाङे गत वर्ष चुनावपछि १९ मंसिरमा नेकपा एकीकृत समाजवादी प्रवेश गरेका थिए । तर, त्यतिबेला माओवादी केन्द्रले एमालेलाई समर्थन गर्दा परिस्थिति फेरिएपछि उनी प्रतिपक्षमा बसे ।

कांग्रेस संसदीय दलका नेता पाण्डेको नेतृत्वमा १४ वैशाखमा सरकार गठन भयो । त्यतिबेलै मन्त्री बन्ने दाउ हेरिरहेका उनलाई तत्काल सरकारमा नल्याउने केन्द्रीय तहमै सहमति गराए । मनाङे पार्टीका गतिविधिमा कम, आफ्नो व्यक्तिगत सम्बन्ध भएका र खेलकुदसम्बद्ध कार्यक्रममा धेरै देखिन्छन् । एकीकृत समाजवादीका स्थायी कमिटी सदस्य तुलबहादुर गुरुङसँग मनाङेको सम्पर्क भैरहन्छ । तर, उनी पार्टीका प्रदेश, जिल्लाका कार्यक्रम र बैठकमा देखिँदैनन् ।

मनाङेलाई मन्त्री बनाउने विषयमा तुलबहादुर आफैँले पनि मुख्यमन्त्रीसामु जिज्ञासा राखेका थिए । शीर्ष नेतृत्व सहमति कार्यान्वयन गर्न तयार भए पनि मुख्यमन्त्री पाण्डेले नचाहेको तुलबहादुर बताउँछन् । 'यो विषयमा माथि नै कुरा मिलिसकेको छ । तर, मुख्यमन्त्रीले हुन्छ-हुन्छ भन्नुहुन्छ । हुँदैन,' उनले शिलापत्रसँग भने ।

गण्डकीमा मुख्यमन्त्री तथा मन्त्रिपरिषद कार्यालयसहित सात वटा मन्त्रालय छन् । त्यसमा मुख्यमन्त्रीसहित कांग्रेसका ५ र माओवादी केन्द्रका २ जना मन्त्री छन् । मनाङेलाई मन्त्री बनाउन कांग्रेसका एक जना फिर्ता बोलाउनुपर्छ वा मन्त्रालय फुटाउनुपर्छ ।

मुख्यमन्त्री पाण्डेको सचिवालयले सबै मन्त्रालय पूर्ण रहेकाले मन्त्री तत्काल थप नहुने बताएको छ । शिलापत्रसँगको कुराकानीमा सचिवालयका एक सदस्यले मन्त्री थप्ने सम्भावना नरहेको र मुख्यमन्त्री र अध्यक्ष नेपालबीचको फोन वार्ताबारे आफूलाई जानकारी नभएको बताए ।

प्रकाशित मिति: शनिबार, मंसिर २३, २०८० १७:१४