धितोपत्र बोर्डले आईपीओ, हकप्रद, एफपीओ निष्कासन स्थगन तत्काल खोल्नुपर्छः अध्यक्ष ढकाल

धितोपत्र बोर्डले आईपीओ, हकप्रद, एफपीओ निष्कासन स्थगन तत्काल खोल्नुपर्छः अध्यक्ष ढकाल

A+ A A-

नेपाल उद्योग वाणिज्य महासंघका अध्यक्ष चन्द्रप्रसाद ढकालले आईपीओ, हकप्रद, एफपीओ निष्कासन रोक्न नहुने बताएका छन् ।

महासंघका अध्यक्ष ढकालले पछिल्लो दुई महिनादेखि धितोपत्र आईपीओ, हकप्रद, एफपीओ निष्कासनलाई स्थगित गर्नु बजारका लागि राम्रो नभएको भन्दै तत्काल खोल्न आवश्यक रहेको बताएका हुन् । अध्यक्ष ढकालले सरकार वर्तमान अर्थतन्त्रलाई चलायमान बनाउन र लगानी जुटाउन लगानी सम्मेलन गर्ने तर लगानी सञ्चिति हुने आईपीओ निष्कासन स्थगित गर्न नहुने बताए ।

शुक्रबार न्युज एजेन्सी नेपालसँग कुराकानी गर्दै अध्यक्ष ढकालले संघीय, प्रदेश र स्थानीय सरकारले समेत लगानी सम्मेलन गरिरहेको बताए । उनले तीनै तहका सरकारको लगानी भित्र्याउन पहल भइरहेको अवस्थामा रियल क्षेत्रका कम्पनीहरू आईपीओ निष्कासनको तयारी पूरा हुँदासमेत अनुमति नपाउनु राम्रो नभएको बताए । अध्यक्ष ढकालले सरकार र धितोपत्र बोर्डले रियल क्षेत्रलाई प्रोत्साहन गरी आईपीओ निष्कासन तत्काल अनुमति दिन आवश्यक रहेको बताए ।

अध्यक्ष ढकालले सबै प्रक्रिया र मापदण्ड पूरा गरेर आईपीओ निष्कासनका लागि तयारी गरेका कम्पनीलाई अटो पाइलटका रूपमा आईपीओ निष्कासनमा जाने व्यवस्था गर्नुपर्ने बताए । उनले सरकारले लगानी वृद्धि गरी रोजगारी सिर्जना गर्ने र राजस्व बढाउने प्राथमिकता दिएको बताए । उनले सर्वसाधारणलाई कम्पनीको शेयर मालिक बनाउन अटोपाइलटका रूपमा आईपीओ निष्कासन अनुमति दिन आवश्यक रहेको बताए ।

उनले समग्र लगानी र सरकारले लिन खोजेको उद्योग व्यवसायी बढाउने नीतिमा समेत आईपीओ निष्कासन रोक्दा गलत सन्देश जान लागेको बताए । अध्यक्ष ढकालले आईपीओ निष्कासन रोक्दा आन्तरिक मात्रै नभएर अन्तर्राष्ट्रिय लगानीमा समेत गलत सन्देश जाने भन्दै सरकारले तत्काल प्रक्रिया पूरा गरेका कम्पनीलाई आईपीओको अनुमति दिन आवश्यक रहेको बताए ।