माछापुच्छ्रे सेक्युरिटिज आयो सञ्चालनमा, धितोपत्र बोर्डका अध्यक्ष हमालद्वारा उद्घाटन

माछापुच्छ्रे सेक्युरिटिज आयो सञ्चालनमा, धितोपत्र बोर्डका अध्यक्ष हमालद्वारा उद्घाटन

A+ A A-

माछापुच्छ्रे सेक्युरिटिज लिमिटेड औपचारिक रूपमा सञ्चालनमा आएको छ । काठमाडौंको जमलस्थित नेपाल चेम्बर भवनमा कार्यालय रहने गरी सञ्चालनमा आएको उक्त कम्पनीको नेपाल धितोपत्र बोर्डका अध्यक्ष रमेशकुमार हमालले बिहीबार उद्घाटन गरेका हुन् ।

कार्य शुभारम्भ गरेको माछापुच्छ्रे सेक्युरिटिज माछापुच्छ्रे बैंकको सहायक कम्पनी हो ।

माछापुच्छ्रे सेक्युरिटिज कम्पनीको उद्घाटन गर्दै बोर्डका अध्यक्ष हमालले धितोपत्र बजारको विकास र विस्तारका लागि माछापुच्छ्रे सेक्युरिटिज लिमिटेडले महत्त्वपूर्ण भूमिका निर्वाह गर्ने विश्वास व्यक्त गरे । उनले भने, 'धितोपत्र बजारमा नयाँ सेक्युरिटिजको रूपमा उदय भएकोमा माछापुच्छ्रे सेक्युरिटिज लिमिटेडलाई स्वागत गर्दै लगानीकर्ताहरूमा धितोपत्र कारोबारको विश्वसनीयता बढाउँदै आगामी दिनमा कार्य सफलताका लागि शुभकामना व्यक्त गर्दछु ।' machhapuchhre security1701949534.jpg

कार्यक्रममा माछापुच्छ्रे बैंकका पूर्वअध्यक्ष एवं गैरआवासीय संघका संस्थापक अध्यक्ष डा. उपेन्द्र महतोले धितोपत्र बजारमा कारोबार गर्ने मुख्य उद्देश्यका साथ स्थापना भएको माछापुच्छ्रे सेक्युरिटिजले माछापुच्छ्रे बैंकले जस्तै देशको आर्थिक गतिविधिमा महत्त्वपूर्ण भूमिका खेल्ने विश्वास व्यक्त गरे ।

त्यस्तै, माछापुच्छ्रे बैंकका अध्यक्ष रोशन केसीले असल संस्थागत सुशासन, पूर्वाधार तथा नियमन व्यवस्थाहरूको पूर्ण परिपालना हुने गरी व्यावसायिक, पारदर्शी र विश्वसनीय तरिकाले धितोपत्र बजारको सेवाप्रदायकको रूपमा माछापुच्छ्रे सेक्युरिटिजले आफूलाई उभ्याउन सकोस् भन्ने शुभकामना व्यक्त गरे ।

कार्यक्रममा माछापुच्छ्रे बैंक, माछापुच्छ्रे क्यापिटल तथा माछापुच्छ्रे सेक्युरिटिज लिमिटेडका संचालक समितिका पदाधिकारीहरू, विभिन्न सेक्युरिटिज कम्पनीका पदाधिकारीहरू, माछापुच्छ्रे बैंकका प्रमुख कार्यकारी अधिकृत, उच्च व्यवस्थापन तहका कर्मचारीलगायतको उपस्थिति थियो ।

प्रकाशित मिति: बिहीबार, मंसिर २१, २०८० १७:३३