युक्रेनी सेनाको नियन्त्रणमा रहेका ढकाललाई उद्धार गर्न के गर्दै छ सरकार ?

A+ A A-

रुसी सेनामा कार्यरत काभ्रेका सिद्धार्थ ढकाललाई युक्रेनी सेनाले नियन्त्रण लिएको भिडियो सार्वजनिक भएको छ । भिडियो सार्वजनिक भएपछि काभ्रेको मन्डनदेउपुर नगरपालिका- ६ का अध्यक्ष सोमप्रसाद ढकालले थाहा पाएका थिए ।

दुई महिनाअघि अध्ययन गर्न भनेर रुस गएका सिद्धार्थ युक्रेनी सेनाको नियन्त्रणमा परेको आफूले केही दिनपहिला जानकारी पाएको र उनको घरपरिवारलाई पनि आफूले नै जानकारी गराएको वडाध्यक्ष ढकालले बताए । ‘मेरो वडाबाट चार जना रुस अध्ययन भिसामा गएका रहेछन् । तीन जना अध्ययन गरिरहेका र होटलमा काम गरिरहेका छन् भने सिद्धार्थ आर्थिक कारणले सेनामा भर्ना भएका रहेछन्,' उनले भने, 'उनलाई युक्रेनी सेनाले नियन्त्रणमा लिएको थाहा पाएपछि परराष्ट्रमन्त्रीज्यूलाई भेटेर निवेदन दिएका छौँ । छिट्टै कूटनीतिक पहलबाट स्वदेश फिर्ता गराउँछु भन्नुभएको छ ।’

सिद्धार्थसँगै उनकै वडाका चार जना 'स्टुडेन्ट भिसा'मा रुस गएका हुन् । त्यहाँ पुगेर विश्वविद्यालयमा बुझ्दा दलालले विश्वविद्यालयमा पैसा नतिरेपछि नेपाल फर्कनुपर्ने कि सेनामा जानुको विकल्प नभएपछि बाध्य भएर सिद्धार्थ सेनामा गएको उनका दाइ नवराज ढकालले बताए । ‘भाइ रुस गएको ५२ दिन भयो । अस्ति मैले युक्रेनको सेनाले नियन्त्रणमा लिएको थाहा पाएँ । उसले पठाएको भिडियो रुसकै उसको साथीले मलाई पठाएको रहेछ,' नवराजले भने, 'त्यसपछि मैले थाहा पाएको हुँ । मेरो भाइसँग कुरा भएको होइन । उसको रुसी साथीले मलाई ह्वाट्सएपमा पठाएको रहेछ ।’

सिद्धार्थ उदयपुरको मनोज केसी भन्ने व्यक्तिलाई ९ लाख तिरेर रुस गएको नवराजको भनाइ छ । त्यहाँ फिस नतिरेको पाइएपछि सेनामा भर्ती भएर लडाइँमा गएको भन्ने थाहा भएको उनी बताउँछन् । ‘यो नेपाली हो । यसको उद्धार गर्न पहल गर्नू भन्ने भिडियो सामाजिक सञ्जालमा आएको छ । नियन्त्रणमा भएको कुरा मस्को टाइममा पनि छापिएको छ । यसैबाट हामीले थाहा पाएका हौँ,’ नवराज भन्छन् ।

नवराजले परराष्ट्रमन्त्री एनपी साउदलाई भेटेर भाइको सकुशल उद्धार गरेर स्वदेश फिर्ता गरिदिन आग्रह गरेको बताए । ‘भाइका बारेमा भिडियोबाट थाहा पाएको दोस्रो दिन परराष्ट्र मन्त्रालयमा निवेदन दिएको छु । मन्त्रीज्यूले कूटनीतिक रूपमा छिट्टै पहल गरेर उद्धार गर्ने प्रतिबद्धता जनाउनुभएको छ । राम्रो कुरा गर्नुभएको छ । हामीले भाइको भिडियो पनि देखाएका छौँ । छिट्टै पहल गर्ने भन्नुभएको छ,’ नवराज भन्छन् ।

परराष्ट्रमन्त्री साउदले पनि सिद्धार्थका दाजुले यसबारेमा आफूलाई जानकारी गराएको र कूटनीतिक रूपमा कुरा भइरहेको बताए । ‘उहाँहरू आएर सबै कुराको जानकारी गराउनुभयो । नोटिसमा आएको छ । उद्धार गरेर स्वदेश फर्काउने कुरा भइरहेको छ,’ साउद भन्छन् ।

सिद्धार्थको उद्धारका लागि प्रधानमन्त्रीलाई ज्ञापनपत्र बुझाउने तयारी गरेको मन्डनदेउपुर नगरपालिकाका मेयर टोकबहादुर वाइबा बताउँछन् । ‘हाम्रो नगरपालिकाका सिद्धार्थ ढकाल रुसी सेनामा भर्ना भएका रहेछन् । उनी अहिले युक्रेनको सेनाको नियन्त्रणमा रहेको जानकारी भिडियोमार्फत पाएका छौँ । आजै प्रधानमन्त्रीलाई उद्धारका लागि ज्ञापनपत्र बुझाउन जाँदै छौँ,’ उनले भने ।

युक्रेनी सेनाको नियन्त्रणमा रहेको सार्वजनिक भएका ढकाल दोस्रो नेपाली हुन् । गत २७ असोजमा विवेक खत्री आफैँले भिडियो कल गरेर घरपरिवारलाई राहदानीको फोटोकपी पठाइदिन आग्रह गरेका थिए । त्यतिबेला विवेकले आफू युक्रेनी सेनाको नियन्त्रणमा रहेको बताएका थिए । त्यसपछि उनी अहिलेसम्म पनि कस्तो अवस्थामा छन्, कहाँ छन् भन्नेबारेमा सरकार जानकार छैन ।

खत्रीलाई गत ३ कात्तिकमा युक्रेनी सेनाले नियन्त्रणमा लिएको सार्वजनिक भएको थियो । उनलाई अभ्दिभ्का शहरबाट युक्रेनी सेनाले नियन्त्रणमा लिएको थियो । खत्रीलाई युक्रेनी सेनाले नियन्त्रणमा लिएको भिडियो युक्रेनका पूर्वआन्तरिक मामिला उपमन्त्री एन्टोन हेरासचेन्कोले एक्स (ट्विटर) मार्फत सार्वजनिक गरेका थिए । त्यसयता खत्रीको अवस्था सार्वजनिक भएको छैन । सामाजिक सञ्जालमा खत्रीलाई युक्रेनी सेनाले यातना दिएर बयान लिँदै गरेको भिडियो पनि सार्वजनिक भएको थियो ।

सोमबार परराष्ट्र मन्त्रालयले नै रुसी सेनामा कार्यरत ६ जना नेपालीको मृत्यु भएको पुष्टि गरेको छ । विज्ञप्ति जारी गर्दै मन्त्रालयले मृत्यु हुने छ जनाको नाम सार्वजनिक गरेको छ । मृत्यु हुनेमा गोरखाका सन्दीप थपलिया, कपिलवस्तुका रूपक कार्की, कस्कीका देवान राई, स्याङ्जाका प्रितम कार्की, दोलखाका राजकुमार रोका र इलामका गंगाराज मोक्तान रहेको मन्त्रालयले जनाएको छ ।

परराष्ट्रले छ जनाकै शव यथाशीघ्र नेपाल पठाइदिन रुसी सरकारलाई आग्रह गरेको छ ।

प्रकाशित मिति: बिहीबार, मंसिर २१, २०८० २०:०२