झुलाघाट–चिवाभञ्ज्याङ यात्रामा निस्केको एमालेलाई कर्णालीका कांग्रेस–माओवादीले देखाएको ‘उच्च राजनीतिक संस्कार’

झुलाघाट–चिवाभञ्ज्याङ यात्रामा निस्केको एमालेलाई कर्णालीका कांग्रेस–माओवादीले देखाएको ‘उच्च राजनीतिक संस्कार’

A+ A A-

जाजरकोट र रुकुम पश्चिम जोड्ने सीमामा पर्छ– रिम्ना गाउँ । त्यही सीमामा एमाले अध्यक्ष केपी ओलीसहितका नेताहरूको स्वागतका लागि एमालेले ‘स्वागतद्वार’ बनाएको थियो । १९ मंसिरमा त्यही द्वारमा उभिएका थिए, माओवादी केन्द्रका उपमहासचिव जनार्दन शर्मा । जाजरकोट भुईंचालोदेखि रुकुम पश्चिममै रहेका शर्मा त्यस दिन जाजरकोटको सीमासम्म आए । शर्मा त्यस दिन सीमाको स्वागतद्वारमा आउनुको कारण थियो– अध्यक्ष ओलीलाई स्वागत गर्न ।

एमालेले बनाएको स्वागतद्वारमा उभिएर माओवादीका उपमहासचिव शर्माले एमाले अध्यक्ष ओलीसहितको टोलीलाई गरेको स्वागत धेरैका लागि आश्चर्य लाग्ने परिघटना थियो ।

ओलीलाई स्वागत गर्न रुकुम पश्चिमबाट रिम्ना पुगेका शर्मा सर्वसाधारणको लाइनमा उभिएका थिए । शर्माको यो परिघटनालाई एमालेसँग राजनीतिक वैरभाव नरहेको पुष्टि मात्र गरेनन्, उच्च राजनीतिक संस्कार देखाएको भन्दै प्रशंसासमेत बटुलिरहेका छन् । शर्माले समृद्धिका लागि राजनीतिक वैरभाव नभएको सन्देश दिन शीर्ष नेता आउँदा स्वागत गर्नु कर्तव्य भएको बताए ।

‘देशको शीर्षस्थ नेतृत्व जिल्लामा आएको बेला म हार्दिकताका साथ स्वागत गर्न आएको हुँ, देशको ठूलो पार्टीको केन्द्रीय हेडक्वार्टर नै यहाँ आएपछि म साथीहरूसहित स्वागत गर्न आएको हुँ,’ शर्माले भने ।

केही बेर शर्मासँग कुराकानी गरेका ओलीले एमालेले थालेको अभियानको मूल उद्देश्य राजनीतिक मात्र नभई देशको समृद्धिसँग जोडिएको बताए । भूकम्पपीडितका लागि सरकारले प्रभावकारी काम गर्न नसकेको बताउँदै सबै दलले एक भएर राहत, पुनर्निर्माण तथा अन्य व्यवस्थापनका काममा जुट्नुपर्ने उनले बताए । भूकम्प प्रभावित क्षेत्रमा शर्मासहितका राजनीतिक नेतृत्वले खेलेको भूमिकाको प्रशंसा ओलीले गरे ।

१९ मंसिरमै कांग्रेसका केन्द्रीय सदस्य राजीवविक्रम शाह पनि ओलीको स्वागतको लाइनमा उभिएका थिए । एमाले नेता/कार्यकर्तासँगै लाइनमा उभिएर शाहले ओलीको स्वागतमा माला लगाइदिए, दह्रोसँग हात मिलाए । जाजरकोटबाट प्रदेशसभा सदस्यसमेत रहेका शाह र रुकुम पश्चिमबाट प्रतिनिसधा सदस्य रहेका शर्मासँगको लाइनमा थिए, विभिन्न पालिका प्रमुखहरू । कांग्रेस र माओवादी केन्द्रबाट निर्वाचित ती पालिका प्रमुखहरू पनि हार्दिकतापूर्वक एमाले अध्यक्ष ओलीको स्वागतमा उभिए । एमालेबाट निर्वाचित पालिका प्रमुखझैँ शर्मा र शाहको लाइनमा आठबिसकोट नगरपालिकाका मेयर रवि केसी, चौरजहारी नगरपालिकाका मेयर पुष्प वादी, सानीभेरी गाउँपालिकाका अध्यक्ष बिर्खबहादुर विष्टसहितका अन्य पार्टीका नेता तथा कार्यकर्ताहरू रिम्ना पुगेका थिए ।

रुकुमपश्चिम र जाजरकोटको सीमामा विपक्षी दलका नेताहरू जसरी एमाले अध्यक्ष ओलीको स्वागतमा उभिए, त्यसकै लाइनमा नेपाल कम्युनिस्ट पार्टी (नेकपा) का प्रवक्ता खड्ग विश्वकर्मा (प्रकाण्ड) पनि थिए । मध्यपहाडी लोकमार्गको बाटो भएर दैलेखदेखि जाजरकोट जाँदा प्रकाण्डले लोकमार्गलाई थप प्रभावकारी रूपमा अघि बढाउन यस क्षेत्रका अगुवा, राजनीतिक दल र नागरिकहरूसँगको छलफलले जनतालाई सहज हुने र स्वयम् एमाले पार्टीलाई पनि मध्यपहाडको विकासमा स्थापित हुन सहज हुने बताए ।

ओलीलाई जाजरकोट र रुकुम पश्चिममा माओवादी नेता शर्मा र कांग्रेस नेता शाहले स्वागत गर्नुभन्दा केही दिनअघि डडेल्धुराबाट ओलीले कांग्रेस सभापति शेरबहादुर देउवालाई फोन गरेका थिए । झुलाघाट–चिवाझञ्ज्याङ संकल्प यात्राका क्रममा देउवाको गृहजिल्ला पुगेर ओलीले असल मित्रलाई सम्झिएको भन्दै फोन गरेका थिए ।

ओलीले कांग्रेस सभापति देउवाको गृहजिल्ला अछामबाट राजनीतिक वैरभाव बिर्सिएर देउवालाई टेलिफोन गरेको भिडियो सामाजिक सञ्जालमा साझा गरे । अभियानको उद्घाटनसँगै गठबन्धनमा आबद्ध दलहरूको चर्को विरोध गरेका ओलीको सो भिडियो संवादमा कुनै राजनीतिक विषय नसमेटिए पनि राजनीतिमा कोही पनि स्थायी शत्रु र मित्रु हुँदैन भन्ने भाव भने प्रस्ट देख्न सकिन्थ्यो ।

छोटो संवादमा ओलीले त्यताको खबर के छ ? भन्दै देउवालाई गृहजिल्ला पुगेर सम्झेको भनेका छन् । ‘मेरा मित्र शेरबहादुर देउवाको गृहजिल्ला, यहाँ आएपछि उहाँलाई कल गरौँ भन्ने लाग्यो । उहाँले आफू काठमाडौंमा भए पनि डडेल्धुरामा स्वागत छ भन्नुभयो, धन्यवाद शेरबहादुरजी !,’ सो भिडियो संवाद सामाजिक सञ्जालमा पोस्ट गर्दै ओलीले लेखेका छन्, ‘सचिवालयले गुडविल कलका रूपमा यसको भिडियो पनि बनाएको रै'छ । त्यसैले यसलाई पोस्ट गरेको छु ।’

ओली–देउवा संवाद राजनीतिक वृत्तमा चर्चाको विषय बनेको थियो । त्यसरी नै चर्चा र विश्लेषणको विषय बनेको छ– शर्मा र शाहको स्वागत । राजनीतिक विश्लेषकहरू दलहरूबीचमा देखिन थालेका राजनीतिक संस्कारको रूपमा अर्थ्याउन थालेका छन् ।

शर्मालगायतका नेताहरूले एमाले अभियानलाई स्वागत गर्दा भूकम्पले थलिएको जाजरकोट र रुकुम पश्चिमका नागरिकको घाउमा मलम लगाउन दलहरूप्रति कुनै मनमुटाव नभएर राजनीतिक सद्भाव प्रवाह गर्न खोजेको राजनीतिक वृत्तमा चर्चा भइरहेको छ ।

एमालेले १४ मंसिरबाट सुरु गरेको पुष्पलाल मध्यपहाडी लोकमार्ग समृद्धिको यात्राका क्रममा केही फरक राजनीतिक दृश्यहरू देखा परे । सिङ्गो एमालेको केन्द्रीय कमिटी लिएर ‘झुलाघाट–चिवाभञ्ज्याङ, समृद्धिका लागि संकल्प यात्रा’का लागि संघीय राजधानी काठमाडौंबाट बाहिरिएका ओली सुदूरपश्चिम र कर्णाली प्रदेशमा पुष्पलाल लोकमार्गले छोएका जिल्लाहरूमा विभिन्न कार्यक्रममा सहभागी भएर बुधबारबाट लुम्बिनी प्रदेश प्रवेश गरेका छन् । सात दिनको अवधिमा ८ सय ५२ किलोमिटर पार गरेर आज नै एमालेको ‘संकल्प यात्रा’ गण्डकी प्रवेश गर्दै छ ।

सुदूरपश्चिममा मात्रै होइन, कर्णालीका अन्य जिल्लामा पनि एमालेको अभियानलाई अन्य पार्टीले स्वागत गरेका थिए । एमालेको अभियानलाई स्वागत गरेर नेताहरूले समृद्धिको पक्षमा राजनीतिक वैरभाव नरहेको सन्देश दिएका छन् । दैलेखको जम्बुकाँधमा आयोजित सभालाई सम्बोधन गर्न पुगेका अध्यक्ष ओलीलाई नेपाली कांग्रेसबाट निर्वाचित दैलेख क्षेत्र नम्बर २ का संघीय सांसद दिक्पालकुमार शाहीले स्वागत गरे ।

दैलेख सदरमुकाममा एमाले अभियानलाई सर्वदलीय समितिले स्वागत गर्‍यो । उक्त सर्वदलीय स्वागत कार्यक्रममा नेकपा एकीकृत समाजवादीका कर्णाली प्रदेश अध्यक्ष एवं दैलेख क्षेत्र नम्बर २ का प्रतिनिधिसभा सदस्य अमरबहादुर थापाले ओलीलाई अभिनन्दन गरेर समृद्धिको यात्रामा सामूहिकताको भाव जनाए ।

कोशी प्रदेशमा एमालेको यो संकल्प यात्रामा अवरोध गर्ने पहिचान पक्षधरहरूको तयारी हुँदै गर्दा कर्णाली र सुदूरपश्चिममा देखिएको परिदृश्यले भने दलहरूको फेरिँदो मनोविज्ञानको अर्थमा पनि विश्लेषण हुन थालेको छ । ओली र शर्माको भेट देशको पूर्वप्रधानमन्त्री र दोस्रो ठूलो दलको अध्यक्षको हैसियतले स्वाभाविक रहेको र यसले राष्ट्रिय राजनीतिमा कुनै असर नपर्ने राजनीतिक विश्लेषक पीताम्बर ढकाल बताउँछन् । ढकाल भन्छन्, ‘दलहरूबीचको राजनीतिक संस्कारको अर्थमा पनि यसलाई विश्लेषण गर्न सकिन्छ ।’

प्रकाशित मिति: बुधबार, मंसिर २०, २०८० १९:१७