कर्णालीमा उत्साहित कार्यकर्ताका माझ जनमासले साथ दिँदा हौसिएका ओली

A+ A A-

अहिले नेकपा एमाले पुष्पलाल मध्यपहाडी लोकमार्गको यात्रामा छ । १४ मंसिरमा बैतडीको झुलाघाटबाट एमालेले सुरु गरेको ‘झुलाघाट–चिवाभञ्ज्याङ, समृद्धिका लागि संकल्प यात्रा’ अभियानको नेतृत्व गर्दै अध्यक्ष केपी शर्मा ओली सिंगो केन्द्रीय कमिटीलाई साथमा लिएर मध्यपहाडी राजमार्गले छोएका जिल्लाका नागरिकसँग भेटघाटमा व्यस्त छन् ।

१ फागुन २०७३ मा पूर्व–पश्चिम महेन्द्रराजमार्गमा मेची–महाकाली यात्रा गरेको एमालेले दोस्रोपटकमा भने मध्यपहाडको यात्रा सुरु गरेको हो । पूर्वको चिवाभञ्ज्याङदेखि पश्चिमको झुलाघाटसम्मको १ हजार ७ सय किलोमिटरको यात्राका क्रममा सुदूरपश्चिम र कर्णाली प्रदेशमा विभिन्न सभा, कोणसभा, अन्तर्क्रिया तथा छलफलमार्फत जनतासँग साक्षात्कार गरी उनीहरूका समस्या ओलीले सुन्ने प्रयास गरे ।

झुलाघाटमा नेपालको झण्डा फहराएर ‘सम्बन्ध स्थानीय, सन्देश राष्ट्रिय’ नारासहित सुदूरपश्चिममा विभिन्न कार्यक्रममा सहभागी भएर आइतबार ओली कर्णाली प्रवेश गरे । सुदूरपश्चिममा रहँदा ओलीले डडेल्धुरामा कांग्रेस सभापति शेरबहादुर देउवासँगको टेलिफोन वार्ता सामाजिक सञ्जालमा राखेर असल राजनीतिक संस्कारको सन्देश दिने प्रयास गरे ।

आफू सहभागी हुने कार्यक्रममा जनमास उतार्न ओलीले सांस्कृतिक कार्यक्रमलगायतका विभिन्न रणनीतिहरू अपनाइरहेका छन् । बालबालिकादेखि बृद्धबृद्धासम्मलाई समय दिएका छन् ।

यसका साथै एमालेमा भूमिकाविहीन बनाइएका भिम रावलको गृहजिल्ला पुगेर ओलीले १७ जेठ २०७९ मा हत्या गरिएका विनोद शाहलाई शहीद घोषणा गर्नेदेखि नेपालको पहिलो शहीद बाँकावीर भएको दाबीसहित दिएको अभिव्यक्तिले आम नागरिकको ध्यान तान्यो ।

आफ्ना हरेक सम्बोधनमा गठवन्धनले देश संकटतर्फ धकेलिँदै गएको भन्दै सरकारको खरो आलोचना गरिरहेछन् ओली । तर, कुनै पार्टीका नेता विशेष टिप्पणी र विरोध भने उनले खासै गरेनन् । राजनीतिक अभियानका क्रममा उनले मन्दिरमा गरेका पूजापाठका केही तस्वीरले उनको आलोचना भयो ।

भारत भ्रमणका क्रममा प्रधानमन्त्री पुष्पकमल दाहाल प्रचण्ड र मन्त्रीहरूले गेरुबस्त्र धारण गरेको प्रसंगमा चर्को आलोचना गरेका ओली स्वयम् मध्यपहाडी यात्रामा नबिराई पूजापाठ गरिरहेका तस्वीर सार्वजनिक भएका छन् ।

ओलीले तय गरेको सम्बन्ध स्थानीय, सन्देश राष्ट्रिय नारामा भने अन्य क्षेत्रका नेता तथा कार्यकर्ताका कारण स्थानीयस्तरका नेता तथा कार्यकर्ताले उनीसामु परिचित हुने मौका खासै पाउन नसकेको बताइन्छ ।

दैलेखको राकम कर्णालीबाट कर्णाली प्रवेश गरेको अभियानको दुई दिने दौरानमा ओलीले उत्साही कार्यकर्ताका बीच हजारौँ नागरिकसँग प्रत्यक्ष भेट्ने, कुराकानी गर्नेदेखि फोटो सेसनमार्फत अरु नेताभन्दा आफू भिन्न रहेको अनुभुति दिलाउन प्रयास गरे ।

अभियानको क्रममा धार्मिक एवम् ऐतिहासिक महत्त्व बोकेको दैलेखका विभिन्न स्थानहरूमा पुगेका ओलीले सम्बोधन पनि गरे । दैलेख सदरमुकाममा उनले आफ्नो अभियानलाई सर्वदलीय बनाएर एकताको सन्देश प्रवाह गर्ने प्रयास गरे ।

दैलेख समृद्धिका लागि सर्वदलीय समितिले तयार पारेको ध्यानाकर्षणपत्र ग्रहण गर्दै उनले आफ्नो नेतृत्वको सरकारले अगाडि सारेको पेट्रोलियम पदार्थ अन्वेषणको विकल्प नरहेको बताए । अन्वेषणस्थलमा पुगेका उनले कार्यप्रगतिका बारेमा जानकारी लिँदै परियोजनाले छिट्टै मूर्तरूप लिने आवश्वासन दिए ।

दक्षिण एसियामा फिरन्ते जीवन बिताइरहेको एक मात्र लोपोन्मुख जाति राउटे समुदायका कुरा सुनेर ओलीले राउटेको मनसमेत जित्ने कोसिस गरे । सोमबार दैलेखको गुराँस गाउँपालिकाको प्रशासकीय भवनको उद्घाटनमा सहभागी हुन पुगेका ओलीले राउटे मुखिया सूर्यप्रकाश शाहीको हातबाट कोसी उपहार ग्रहण गर्दै जिविकोपार्जनमा सहयोग गर्ने विश्वास दिलाए ।

बिहानै देखि परेको झरी र चिसोको परवाह नगरी गुराँसेमा पर्खिएका नागरिकका हातबाट फूलमाला र अभिनन्दन ग्रहण गरेका ओलीले गुराँस गाउँपालिकामा एमालेको सरकारले सुशासन र समृद्धिको प्रत्याभूति गरिरहेको दाबी गरे ।

केही समय त्यहाँ रहेका ओली सुर्खेतमा आयोजित सभालाई सम्बोधन गर्न साँझ ४ बजे वीरेन्द्रनगर पुगे तब झरीको परवाह नगरी दिउँसो १ बजेबाट प्रतिक्षामा बसेका हजारौँ नागरिकबाट घेरिँदा सुरक्षाकर्मीलाई भीड थाम्न हम्मेहम्मे पर्‍यो ।

एमाले पार्टी कार्यालयअगाडि भएको सभालाई सम्बोधन गरे । उनको भाषण सुन्न लुम्बिनी प्रदेशबाटसमेत समर्थक सुर्खेत पुगेका थिए । अभियानका क्रममा ओलीले सरकारका गतिविधिको चर्को आलोचना गरे । गठबन्धनले देशलाई निकास दिन नसक्ने दाबी गर्दै मिसन २०८४ मा एकल बहुमतको सरकारको नेतृत्व गर्ने उद्घोष गरे ।

सुर्खेतको प्रमुख ऐतिहासिक महत्त्वको पर्यटकीय स्थल काँक्रेबिहार पुगेर उनले थारु समुदायको संस्कृतिको अवलोकन गरे । तत्कालीन प्रधानमन्त्री रहेका बेला आफैँले ३ वैशाख २०७६ मा ब्रेकथ्रु गरेको राष्ट्रिय गौरवको परियोजना भेरी–बबई डाइभर्सनको आयोजनास्थलमा पुगे । परियोजना निर्माणको भौतिक प्रगतिको निरीक्षण गरे, आयोजना प्रभावित क्षेत्रका नागरिकको गुनासो सुने, गुनासो सम्बोधन गर्न सरकारलाई जिम्मेवार बनाउने प्रतिबद्धता जनाए ।

मंगलबार सुर्खेतबाट सल्यान, जाजरकोट हुँदै रुकुमपश्चिममा आयोजित कार्यक्रममा सहभागी हुन जानेक्रममा सरकारका उपप्रधान तथा रक्षामन्त्री पूर्णबहादुर खड्काको पकड क्षेत्र सुर्खेतको गुर्भाकोट पुगेका ओलीले ९ वर्षीय बालक किशोर पौडेलले लेखेको पत्र बुझे । पौडेलले आफू जस्ता बालबालिकाहरू युवा अवस्थामा पुग्दा पेट पाल्नका लागि विदेश जानैपर्ने अवस्थाको अन्त्य गरेर स्वदेशमै कमाइको वातावरण बनाउन आग्रह गरेका थिए ।

बालक पौडेललाई जवाफ दिँदै ओलीले भने, ‘हामीले मध्यपहाडी राजमार्ग निर्माण थालेको पनि त्यसैका लागि हो, भेरी बबई डाइभर्सन पनि कृषि उत्पादन बढाउनकै लागि हो, यसलाई छिटो सम्पन्न गर्नुपर्छ । ग्रामीण विद्युतीकरण, इन्टरनेट विस्तार पनि यसैका लागि गरेका हौँ । सुर्खेत, सल्यान, जाजरकोट, रुकुममा चिल्ला सडकहरू बनेका छन् । यसले तिम्रो सपना पूरा गर्न सघाउँदै जान्छ ।’

१७ कार्तिकमा भूकम्पले थला परेको जाजरकोट र रुकुमपश्चिममा भएका छुट्टाछुट्टै कार्यक्रममा प्रभावित नागरिकलाई भेटे । भूकम्पले पुर्‍याएको क्षतिको जानकारी लिए । चिसोमा रात काट्न बाध्य नागरिकलाई सुरक्षित आवासको व्यवस्थापनमा सरकारी भूमिकाप्रति प्रश्न उठाउँदै एमालेले स्वयमसेवकमार्फत पीडामा मलहम लगाउने प्रयास गरिरहेको बताए ।

माओवादीका प्रभावशाली नेताद्वय जनार्दन शर्मा र शक्तिबहादुर बस्नेतको क्षेत्रमा पुगेर ओलीले संक्रमणकालीन न्यायको पर्खाइमा बसेका नागरिकलाई एमाले न्यायको पक्षमा रहेकाले न्याय दिलाएरै छाड्ने प्रतिबद्धता जनाए । देश शान्ति प्रक्रियामा गएको दुई दशक पुग्दासमेत संक्रमणकालीन न्याय टुङ्गोमा पुग्न नसक्नु दर्भाग्य भएको अभिव्यक्ति दिए । दोषीलाई उम्कन नदिने आवश्वासन बाँडे ।

अनि ओली कर्णाली प्रदेश अभियानको समापन गर्दै लुम्बिनी प्रदेशतर्फ लागे ।

तुलनात्मक रूपमा मध्यपहाडका बासिन्दा अहिले बढी निराश छन् भनिन्छ । कारण, यस क्षेत्रमा ठूला उद्योग स्थापना भएका छैनन् । रोजगारीका अवसर सीमित छन् । कृषि उत्पादन दैनिक घट्दो मात्रामा छ ।

मानिसहरू सुविधा र अवसरको खोजीमा शहर र तराईतिर बसाइँ सर्दै छन् । युवाहरू रोजगारीका लागि खाडीका देश र भारतमा जाने लर्को मध्यपहाडकै छ । यो क्षेत्रले राज्यबाट पनि एक्लिएको महसुस गरेको छ ।

अभियानका क्रममा यिनै विषयवस्तुलाई केन्द्रमा राखेर सिङ्गो एमालेलाई मध्यपहाडमा केन्द्रित गराएका अध्यक्ष ओलीले यहाँका नागरिकहरूलाई समर्गमा सकरात्मक सन्देश दिएर फर्किएको चर्चा भईरहेको छ ।

प्रकाशित मिति: मंगलबार, मंसिर १९, २०८० २२:०५