नवराज विकसहित ६ जना हत्या प्रकरणः २४ जनालाई जिल्ला अदालतले जन्मकैद सुनाएको घटना के हो ?

नवराज विकसहित ६ जना हत्या प्रकरणः २४ जनालाई जिल्ला अदालतले जन्मकैद सुनाएको घटना के हो ?

A+ A A-

मंगलबार जिल्ला अदालत रुकुमपश्चिमले नवराज विकसहित ६ जनाको हत्या प्रकरणमा २४ जनालाई दोषी ठहर गर्दै जन्मकैदको सजाय सुनाएको छ ।

चौरजहारी नगरपालिका- ८, सोती गाउँमा जाजरकोटका नवराज विकसहित ६ जनाको हत्या प्रकरणमा जिल्ला अदालतका न्यायाधीश खड्गबहादुर केसीको इजलासले २४ जनालाई दोषी ठहर गर्दै जन्मकैदको सजाय सुनाएको हो । जिल्ला अदालतका सूचना अधिकारी गोविन्दप्रसाद कोइरालाका अनुसार यसअघि धरौटीमा छुटेका ८ जनाले भने सफाइ पाएका छन् ।

जाजरकोटबाट प्रेमिका लिन गएका नवराज विकसहित ६ जनाको १० जेठ २०७७ मा भेरी नदीमा बगाएर हत्या भएको थियो । विककी प्रेमिकाका बाबु र आमालाई जातीय छुवाछुतको अभियोगमा दुई/दुई वर्ष कैद र ५० हजार रुपैयाँ जरिवाना असुल्ने फैसला भएको सूचना अधिकारी कोइरालाले जानकारी दिए ।

के थियो घटना ?

१० जेठ २०७७ मा जाजरकोटको भेरी नगरपालिका–४ रानागाउँका २१ वर्षीय नवराज विक आफ्ना साथीहरू लिएर मल्ल थरकी प्रेमिकालाई भगाएर बिहे गर्न सोतीगाउँ पुगेका थिए । त्यहीबेला उनीहरूमाथि सोती गाउँका स्थानीयले योजनाबद्ध आक्रमण गर्दा नवराजसहित ६ जनाको ज्यान गएको थियो भने अरू १२ जना घाइते भएका थिए ।

नवराजसँगै २० वर्षीय टीकाराम नेपाली, १९ वर्षीय गणेश बुढा, १८ वर्षीय लोकेन्द्र सुनार, २० वर्षीय सञ्जु विक र १७ वर्षीय गोविन्द शाही मारिए । गाउँलेको कुटपिट र लखेटाइबाट भेरी नदीमा पसेका ६ जनाको ज्यान गएको थियो । १२ जना घाइते भएका थिए । जिल्ला सरकारी वकिल कार्यालयले घटनामा संलग्न भएको भन्दै ३४ जनाविरुद्ध जिल्ला अदालत रुकुमपश्चिममा ३२ जेठ २०७७ मा अभियोग दर्ता गरेको थियो । फरक–फरक समयमा गरेर ३४ जना प्रक्राउ परेका थिए । उनीहरूविरुद्ध तीनपटक थुनछेक आदेश भएको थियो ।

१० असार २०७७ मा भएको थुनछेक आदेशले एक नाबालिका र एक नाबालकलाई सुधारगृहमा पठाएको थियो भने बालिकाकी आमा एक लाख धरौटीमा रिहा भएकी थिइन् । अदालतको थुनछेक आदेशमा तुलबहादुर मल्ल, इन्द्रबहादुर मल्ल र दिपेन्द्र चन्द साधारण तारेखमा छुटेका थिए । २३ जनालाई भने पुर्पक्षका लागि थुनामा पठाइएको थियो ।

२८ असार २०७७ मा भएको थुनछेक आदेशबाट एक जना र ३१ असारको आदेशबाट थप चार जनालाई पुर्पक्षका लागि कारागार चलान गरिएको थियो ।

थुनछेक आदेशप्रति अभियुक्तहरू पुनरावलोकनका लागि उच्च अदालत गएका थिए । उच्च अदालत सुर्खेतमा राय बाझिएपछि सो मुद्दा सर्वोच्च अदालतसमा पुगेको थियो । सर्वोच्चले ६ वैशाख २०७८ मा सौरभ घर्ती, डिल्ली घर्ती, लोकेन्द्र घर्ती र भीमबहादुर बुढासहित पाँच जनालाई साधारण तारेखमा रिहा गरेको थियो ।

प्रकाशित मिति: मंगलबार, मंसिर १९, २०८० १९:२९