त्रिवि–आरआरको लापर्वाही : विद्यार्थीको प्रयोगात्मकको नम्बरै गायब

A+ A A-

प्रदर्शनीमार्गस्थित रत्न राज्यलक्ष्मी क्याम्पसमा स्नातक तह मानविकी संकायको दोस्रो वर्षको नतिजामा गम्भीर त्रुटि भएको पाइएको छ । प्रयोगात्मक परीक्षामा विषय शिक्षकले दिएको नम्बरभन्दा कम नम्बर राखेर त्रिभुवन विश्वविद्यालय परीक्षा नियन्त्रण कार्यालयले नतिजा प्रकाशित गरेको विद्यार्थीहरूको गुनासो छ ।

क्याम्पस नआउने र प्रयोगात्मक अभ्यासमा सहभागी नभएका विद्यार्थीले धेरै नम्बर पाएपछि नियमित कक्षामा आउने विद्यार्थीहरू आश्चर्यमा परेका छन् । नियमित क्याम्पस आउने र शिक्षकले दिएको भन्दा कम नम्बर पाउनेमा १ सय जनाजति विद्यार्थी छन् । तीमध्येकी एक हुन्– गरिमा खनाल । ‘विषय शिक्षकले नेपालीमा २५ दिएकोमा प्रमाणपत्रमा १५ आएको छ । पत्रकारिता विषयमा २९ दिएकोमा १८ आयो । क्याम्पस प्रशासनले नम्बर घटाएर पठायो,’ उनले गुनासो गरिन् ।

हाल उनी स्नातक चौथो वर्षमा अध्ययनरत छिन् तर दोस्रो वर्षको नतिजामा क्याम्पस प्रशासनले गम्भीर लापर्वाही गरेपछि मानसिक तनावमा छिन् । ‘नियमित कक्षामा आएको छु । मेरो ६ प्रतिशत नम्बर गायब भयो । पहिलो वर्षमा ६९ प्रतिशत आएको थियो । ६ प्रतिशत नम्बर गायब नभएको भए ७२ प्रतिशतभन्दा माथि पुग्थ्यो,’ उनी भन्छिन् ।

नतिजा आएकै दिन उनले आफ्नो प्रयोगात्मक परीक्षामा कम नम्बर आएको थाहा पाएकी थिइन् । तत्कालीन क्याम्पसका सहायक प्रमुख गोविन्दप्रसाद आचार्यलाई जानकारी गराइन् । उनले मार्कसिटमा सच्याएर आउने वचन दिए, उनी ढुक्क भएर बसिन् ।

तर, गत बुधबार मार्कसिट आउँदा नम्बर नसच्चिई आयो । फेरि शिक्षक आचार्यलाई फोनबाट जानकारी गराइन् । ‘कन्ट्रोलरलाई भनेको थियो । सच्चिएर आएनछ भनेर फोन राख्नुभयो । त्यसपछि सम्पर्कमा आउनुभएको छैन,’ उनी भन्छिन् । विद्यार्थी भने तत्कालीन सहायक प्रमुख आचार्यलाई खोजेर हिँडिरहेका छन् । ‘त्यतिबेला सहायक प्रमुख हुनुहुन्थ्यो । प्रयोगात्मक परीक्षाको नम्बर सिटमा हस्ताक्षर उहाँले गरेर पठाउने हो । अहिले शिक्षक मात्र हुनुहुन्छ । उहाँ सम्पर्कमै आउनु हुन्न,’ खनाल भन्छिन् ।

क्याम्पस प्रमुख जीवनधर ज्ञवाली त्रुटि भएको स्वीकार गर्छन् तर सच्याउन पनि नसकिने उनको भनाइ छ । ‘१ हजार ८ सय विद्यार्थीमा १० जनाजतिकोमा समस्या आएको हो । टेक्निकल त्रुटि हो । त्रिविमा जानकारी गराएका छौँ । हेर्छु भनेको छ,’ ज्ञवाली भन्छन् ।

उनले १० जनाको समस्या भने पनि विद्यार्थीहरू कम्तीमा १ सय जना पीडित रहेको दाबी गर्छन् । कोभिडको समयमा कक्षा धेरै नभएकाले पनि नम्बर कम आएको हुन सक्ने बताउँछन् ज्ञवाली । त्रुटि भएको स्वीकार गरे पनि यसबारे उनले स्पट जवाफ दिन आनाकानी गरिरहेका छन् । पीडित विद्यार्थीहरू दिनैपिच्छे क्याम्पस प्रशासन कक्षमा पुग्छन् तर प्रशासनले अनेक बहाना देखाएर टारिरहेको छ ।

‘कहिले के भन्नुहुन्छ, कहिले के भन्नुहुन्छ । शिक्षकले दिएको नम्बरको सिट मागिरहेका छौँ । दिन मानेको छैन । सिट लिएर त्रिविमा जान खोजेका छौँ तर प्रशासन दिन मान्दैन,’ उनी भन्छिन् । गरिमाको जस्तै समस्या छ अमिता राईको पनि । ‘सरले दिएको एउटा छ । मार्कसिटमा अर्कै नम्बर आएको छ । विषय शिक्षक सरले २८ र २९ सम्म नम्बर दिएको भन्नुहुन्छ तर नतिजा आउँदा १५–१६ नम्बर आएको छ,’ उनी भन्छिन्, ‘क्याम्पस नजाने र प्रयोगात्मक अभ्यासमा सहभागी नहुनेको नम्बर कसरी धेरै आयो ? हामी पीडामा परेका छौँ ।’ क्याम्पस प्रमुखसँग शिक्षकले दिएको नम्बर माग गर्दा उपलब्ध नगराएको गुनासो उनको छ ।

धेरै नम्बर पाउने नियमित क्याम्पस नआउने । थोरै भएको नियमित आउने विद्यार्थीको प्रमाणपत्र ।

अर्का विद्यार्थी रामविलास बुढा (सिद्धान्त) पनि आफूहरू मारमा परेको बताउँछन् । ‘शिक्षकले राम्रो नम्बर दिएको छ भन्नुहुन्छ । मार्कसिटमा थोरै आएको छ । शिक्षकले दिएको आधिकारिक नम्बर मागिरहेका छौँ । प्रशासनले दिन मानेको छैन,’ उनी भन्छन् ।

क्याम्पस नआउने र प्रयोगात्मक अभ्यासमा भाग नलिएका कतिपय विद्यार्थी आफूहरूको नम्बर देखेर छक्क परेका छन् । ‘कोभिडको समयमा अनलाइन कक्षमा पनि जोडिन सकिनँ । भौतिक रूपमा पनि कक्षामा आएको थिइनँ तर प्रयोगात्मकमा सहभागी भएको थिएँ । रेगुलर आउने साथीको भन्दा मेरो धेरै नम्बर आएको छ,’ ती विद्यार्थीले भने ।

ती विद्यार्थीका अनुसार कक्षामा पनि नआउने र प्रयोगात्मक पनि नगर्नेको झन् धेरै नम्बर आएको छ । ‘चलखेल भएको हुन सक्छ । क्याम्पसमै नटेकेको विद्यार्थीको कसरी धेरै नम्बर आयो ? गम्भीर अनुसन्धान हुनुपर्छ,’ उनी भन्छन् ।

त्यति मात्र होइन, क्याम्पस प्रशासनले सर्टिफिकेटसमेत तीन महिना लुकाएर राखेको विद्यार्थीहरूको आरोप छ । ‘भदौमा आएको सर्टिफिकेट अस्ति बुधबार वितरण गरियो,’ पीडित विद्यार्थीहरूले क्याम्पस प्रमुख ज्ञवालीलाई सोधे । तर, ज्ञवाली समस्या सुल्झाउनका लागि प्रमाणपत्र ‘होल्ड’ गरिएको तर्क गर्छन् । ‘करेक्सन हुन्छ कि भनेर हो,’ प्रमुख ज्ञवालीले भने ।

त्रिभुवन विश्वविद्यालय परीक्षा नियन्त्रण कार्यालयले क्याम्पसले पठाएको आधिकारिक नम्बरका आधारमा नतिजा प्रकाशित गरेको बताएको छ । ‘कलेजले आधिकारिक जे पठाएको हो, त्यही हुन्छ । हामीले चलाउन मिल्दैन । विद्यार्थीको दबाबमा नम्बर फेरि थप गर्न मिल्दैन,’ परीक्षा नियन्त्रक पुष्पराज जोशी भन्छन् ।

क्याम्पस र परीक्षा नियन्त्रण कार्यालयबाट त्रुटि नसच्चिने भएपछि पीडित विद्यार्थीहरू अदालत र अख्तियार दुरुपयोग अनुसन्धान आयोग जाने तयारीमा छन् । ‘हामीमाथि अन्याय भएको छ । नम्बर गायब पार्नु भनेको अनियमितता हो । अख्तियार र अदालत दुवै निकायमा जान्छौँ,’ पीडित विद्यार्थीहरूले भने । बीए दोस्रो वर्षको परीक्षा २०७९ साउनमा भएको थियो । नतिजा गत असारमा सार्वजनिक भएको थियो ।

गत वर्ष पहिलो वर्षको नतिजामा पनि त्रुटि भएको थियो । अधिकांश विद्यार्थी प्रयोगात्मक परीक्षामा अनुपस्थित रहेको नतिजा आयो । विद्यार्थीहरूले आफूहरू परीक्षामा सामेल भएर पनि नतिजामा अनुपस्थित (एब्सेन्ट) आएको भन्दै नतिजा सच्याउन माग गरेका थिए । आरआरमा यस्तो समस्या लगातार देखिन थालेको छ ।

सम्बन्धित समाचार