परीक्षा दिएका आरआरका विद्यार्थीको नतिजा जब अनुपस्थित भनेर आयो...

A+ A A-

त्रिभुवन विश्वविद्यालयले १० वैशाखमा स्नातक तह मानविकी संकायको पहिलो वर्षको नतिजा सर्वजनिक गर्‍यो । तर, रत्नराज्य लक्ष्मी क्याम्पसका अधिकांश विद्यार्थी प्रयोगात्मक परीक्षामा अनुपस्थित रहेकाे नतिजा आयाे । विद्यार्थीहरूले आफूहरू परीक्षामा सामेल भएर पनि नतिजामा अनुपस्थित (एब्सेन्ट) आएकाे भन्दै नतिजा सच्याउन माग गरेका छन् ।

‘९० प्रतिशत विद्यार्थीको नतिजामा एब्सेन्ट देखाएको छ । प्रयोगात्मक पीक्षामा सामेल भएका थियौँ । प्रोजेक्ट वर्क पनि बुझाएका छौँ,’ विद्यार्थी संगम राईले भने । प्रयोगात्मकमा शिक्षकले २५ नम्बर दिएकोमा क्याम्पसले १० हालेर पठाएको र फेरि त्रिविले १२ नम्बर दिएको गुनासो विद्यार्थीहरूको छ । विशेष गरी अंग्रेजी विषयमा यस्तो समस्या देखिएको हो । ७० प्रतिशत बोर्ड परीक्षा हुने र ३० प्रतिशत प्रयोगात्मक हुने व्यवस्था छ ।

‘अंगेजी विषयमा धेरै समस्या देखिएको छ । अन्य विषयमा पनि छ,’ राईले भने । विद्यार्थीले शिक्षकले बुझाएको नम्बर र त्यसको आधारमा कलेजले बनाएको मार्कसिट माग्दा पनि उपलब्ध नगराएको उनीहरूको गुनासो छ । विद्यार्थी परीक्षामा सहभागी भएर पनि अनुपस्थित देखाएको र दिएको नम्बरभन्दा फरक आएपछि अंगेजी विषयका शिक्षक लोकनाथ कोइरालाले राजीनामा दिएका छन् । राजीनामा दिएका शिक्षक कोइरालाले विद्यार्थीहरूमाथि अन्याय भएको बताएका छन् ।

विद्यार्थीले आरआर क्याम्पस प्रमुख जीवनधर ज्ञवालीसँग छानबिनको माग गरे । तर, माग सम्बोधन नभएपछि उनीहरूले प्रयोगात्मक परीक्षाको नतिजामा गयल देखाएको भन्दै क्याम्पस प्रमुख ज्ञवालीलाई फूलमाला लगाएर विरोध गरेका छन् । यस विषयमा सम्पर्क कुरा गर्न खोज्दा क्याम्पस प्रमुख ज्ञवाली सम्पर्कमा आएका छैनन् । पीडित विद्यार्थीहरू २०७७ सालमा भर्ना भएकाहरू हुन् ।