जलेश्वर भन्सार कार्यालयले चार महिनामा उठायो १ अर्ब ७ करोड राजस्व

A+ A A-

मुलुकमा आर्थिक मन्दीका कारण व्यापार व्यवसाय सुस्त रहे पनि महोत्तरीको जलेश्वर भन्सार कार्यालयले भने लक्ष्यभन्दा बढी राजस्व उठाएको छ ।

जलेश्वर भन्सारले चालु आर्थिक वर्ष २०८०/८१ को पछिल्लो ४ महिनामा गत आर्थिक वर्षको सोही अवधिको भन्दा १० करोड बढी राजस्व संकलन गर्न सफल भएको छ । जलेश्वर भन्सार कार्यालयले चालु आर्थिक वर्षको चार महिनामा १ अर्ब ७ करोड ४९ लाख ४८ हजार १ सय ६४ रुपैयाँ राजस्व संकलन गरेको छ । यो अघिल्लो आर्थिक वर्षको सोही अवधिमा उठेको राजस्वभन्दा १० करोडले बढी हो ।

भन्सार विभागले सो भन्सार कार्यालयलाई चालु आर्थिक वर्षभरि ३ अर्ब ७६ करोड २३ लाख ६२ हजार ६ सय ७८ रुपैयाँ राजस्व उठाउने लक्ष्य दिएकोमा चालु आर्थिक वर्षको चार महिनामा ९२.८८५ प्रतिशत अर्थात् १ अर्ब ७ करोड ४९ लाख ४८ हजार १ सय ६४ रुपैयाँ राजस्व उठाउन सफल भएको छ ।

अघिल्लो वर्षभन्दा यस वर्ष कोइला र खरानी आउने क्रम बढेकाले राजस्वमा उल्लेखनीय प्रगति भएको राजस्व कार्यालयका सूचना अधिकारी सोमित गुप्ताले बताए । अघिल्लो वर्षभन्दा यस वर्ष भन्सार विभागले १२ करोड बढी राजस्व उठाउने लक्ष्य दिए पनि यही स्थिति रहेमा लक्ष्य प्राप्ति हुने उनले बताए । गत आर्थिक वर्षमा जलेश्वर भन्सार कार्यालयले आफ्नो वार्षिक लक्ष्य पूरा गर्न सकेको थिएन ।

आर्थिक मन्दीका कारण अन्य भन्सार कार्यालयको राजस्व प्रभावित भए पनि यो भन्सार कार्यालय लक्ष्यको नजिकनजिक पुगेको देखिन्छ । चालु आर्थिक वर्षको चार महिनामा पेट्रोलियम पदार्थबाट संकलित राजस्व ५६ करोड २ लाख ८ सय ६३ रहेको छ भने अन्य मालवस्तुको आयातबाट ५१ करोड २७ लाख ३३ हजार ३ सय १ रुपैयाँ राजस्व संकलन भएको पाइएको छ ।