‘अडिएका पाइला’ लेख्दालेख्दै विष्णु सापकोटाले जब सपनामा एक चित्र देखे (भिडियाे अन्तर्वार्ता)

‘अडिएका पाइला’ लेख्दालेख्दै विष्णु सापकोटाले जब सपनामा एक चित्र देखे (भिडियाे अन्तर्वार्ता)

A+ A A-

करिब दुई दशक विष्णु सापकोटाले अखबारमा राजनीति, समाज र साहित्यबारे लेखे । हालै मात्र उनले ‘अडिएका पाइला’ उपन्यास पाठकलाई सुम्पेका छन् । यसअघि दुई कृति सम्पादन गरेका सापकाेटाले लेखेको यो पहिलो पुस्तक हो ।

स्याङ्जा पुतलीबजार नगरपालिका- १३ का सापकोटा चार वर्षयता कम्बोडियामा एक अन्तर्राष्ट्रिय संस्थाको नेतृत्वदायी भूमिकामा कार्यरत छन् । र, केही वर्षलगत्तै नेपाल फर्किएर उनी यतै काम गर्ने योजनामा छन् । बेलायतको क्याम्ब्रिज विश्वविद्यालयबाट अंग्रेजी साहित्यमा एमफिल गरेका सापकोटा त्रिभुवन विश्वविद्यालय एमएमा २०५३ सालका गोल्ड मेडलिस्ट हुन् ।

उनले बेलायत जानुअघि डेढ/दुई वर्ष र पढेर फर्केपछि करिब ८ वर्ष त्रिवि र पोखरा विश्वविद्यालयमा पढाएका थिए । उनै सापकोटाले लेखेको उपन्यास ‘अडिएका पाइला’ प्रेम कथामा आधारित छ र यो त्रिभुवन विश्वविद्यालकै परिवेशबाट सुरु हुन्छ । भर्खरै विश्वविद्यालयमा पढाउन थालेका अस्तित्व र दर्शनमा रुचि राख्ने चिकित्सा शास्त्रकी विद्यार्थी अनसूयाबीचको प्रेमकथालाई उनले बौद्धिक र दार्शनिक शैलीमा प्रस्तुत गरेका छन् ।

‘क्याम्पस नोबेल हो, यो एउटा प्रेम कथा हो । यो उत्तरद्वन्द्वकथा हो, यस उपन्यासमा क्रान्तिपछिको युवापुस्ताले खोजेको परिवर्तन र उनीहरूमा रहेको दुविधाको राम्ररी चित्रण गरिएको छ, हाम्रो समाज कति तरल छ भनेर त्रिविका माध्यमबाट देखाइएको छ’, साहित्यकार मञ्जुश्री थापाले पुस्तक लाेकार्पण गर्दै भनेकी थिइन् ।

पुस्तकबारे प्रकाशक फाइनप्रिन्ट लेख्छ, 'अनौठो प्रेमकथालाई सूक्ष्म रूपमा बुनिएको उपन्यास अडिएका पाइलामा पात्रका सम्बन्ध पटाक्षेप हुँदै गर्दा पाठकले एउटा बौद्धिक उडान भरेको महसुस गर्नेछन् ।' हुन पनि, उपन्यासलाई बौद्धिक तहका युवाको एउटा पुस्ताको चित्रणका रूपमा लिन सकिन्छ ।

यसै सन्दर्भमा लेखक सापकोटासँग हामीले उपन्यास ‘अडिएका पाइला’बारे कुराकानी गरेका छौँ । यस क्रममा उनले उपन्यास लेख्दाका केही रोचक किस्सा पनि सुनाएका छन् ।

भिडियाेः