शिवम् होल्डिङ्सले १ करोड १६ लाख कित्ता आईपीओ प्रिमियम मूल्यमा निष्कासन गर्दै

शिवम् होल्डिङ्सले १ करोड १६ लाख कित्ता आईपीओ प्रिमियम मूल्यमा निष्कासन गर्दै

A+ A A-

शिवम् सिमेन्ट्स लिमिटेडको करिब ८५ प्रतिशत शेयर लगानी रहेको शिवम् होल्डिङ्स लिमिटेडले सर्वसाधारणका लागि साधारण शेयर (आईपीओ) प्रिमियम मूल्यमा निष्कासन गर्ने भएको छ । कम्पनीले जारी पुँजी ५ अर्ब ८० करोडको २० प्रतिशतले हुन आउने १०० रुपैयाँ अंकितदरको १ करोड १६ लाख कित्ता आईपीओ प्रिमियम मूल्यमा सर्वसाधारणका लागि निष्कासन गर्न लागेको हो ।

आईपीओ निष्कासनका लागि कम्पनीले नेपाल धितोपत्र बोर्डको स्वीकृतिमा प्रक्रिया अगाडि बढाएको छ । कम्पनीको आईपीओ निष्कासन तथा बिक्री प्रबन्धकमा सिद्धार्थ क्यापिटल नियुक्त भएको छ । सोसम्बन्धी सम्झौतापत्रमा शिवम् होल्डिङ्सका सञ्चालक अध्यक्ष शिवरतन शारदाको उपस्थितिमा सम्झौतासमेत भएको छ ।

२०७१ सालमा स्थापना भएको शिवम् होल्डिङ्स २०७९ सालमा पब्लिक लिमिटेडमा परिणत भएको कम्पनी हो । यस कम्पनीले नेपालको सबैभन्दा ठूलो सिमेन्ट तथा क्लिङ्कर उत्पादन क्षमता भएको अत्याधुनिक प्रविधियुक्त ग्रिनफिल्ड उद्योग सञ्चालन गरिरहेको छ । यस उद्योगले वेष्ट हिटको उपयोग गरी करिब १२ मेघावाट विद्युत्‌समेत उत्पादन गरी आफ्नै उद्योगमा प्रयोग गर्दै आएको छ ।

शिवम् होल्डिङ्सको अधिकृत तथा जारी पूँजी ५ अर्ब ८० करोडमध्ये संस्थापकहरूतर्फ ८० प्रतिशत अर्थात् ४ अर्ब ६४ करोड र सर्वसाधारणतर्फ १ अर्ब १६ करोड शेयर पुँजी छुट्याई प्रिमियम मूल्यमा निष्कासन गर्ने प्रक्रिया प्रारम्भ गरेको हो ।

यस कम्पनीका संस्थापकहरूमा शिवम् सिमेन्ट्स लिमिटेडको संस्थागत शेयर लगानी करिब ८५ प्रतिशत र अन्य १९ जना विभिन्न उद्योग, व्यापार र पेसा व्यवसायमा सफल व्यक्तिहरूको करिब १५ प्रतिशत शेयर लगानी रहेको छ । यस कम्पनीले आफ्नो शेयर रकम लगानी गरेको संस्थाबाट विगत २ वर्षदेखि मुनाफा समेत प्राप्त गरेको छ भने शेयर जारी गरी सर्वसाधारणबाट संकलन हुने प्रिमियम मूल्यसहितको रकम अन्य उपयुक्त परियोजनाहरू (जस्तै; हाइड्रोपावर, बैंक वित्तीय संस्था, टुरिज्म क्षेत्र र इन्फाष्ट्रक्चरका परियोजना तथा अन्य उद्योग लगायत) मा लगानी गर्ने बताइएको छ ।