कांग्रेस पार्टी कार्यालय बनाउन पाँचथरका पालिकाले दिए लाखौँ बजेट

A+ A A-

स्थानीय तहले जनताको करको दुरुपयोग कसरी गरिरहेका छन् भन्ने थाहा पाउन पाँचथरका तीन स्थानीय तहले कांग्रेस पार्टी कार्यालय बनाउन दिएको बजेट हेरे पुग्छ । फिदिम नगरपालिका, तुम्बेवा गाउँपालिका र फालेलुङ गाउँपालिकाले कांग्रेस पार्टी कार्यालय बनाउन लाखौँ बजेट दिएका छन् ।

स्रोतका अनुसार फिदिम नगरपालिकाले १० लाख, तुम्बेवा गाउँपालिकाले ६ लाख र फालेलुङ गाउँपालिकाले ५ लाख रुपैयाँ दिएका छन् । यी सबै स्थानीय तहको प्रमुख/अध्यक्ष कांग्रेसबाट निर्वाचित भएका जनप्रतिनिधि हुन् । उनीहरूले पालिकाको बजेट दिएर बन्ने कांग्रेस पार्टी कार्यालयको नाम भने ‘हरिहंश स्मृति प्रतिष्ठान बहुउद्देशीय भवन’ हो ।

पाँचथर कांग्रेसका एक नेताका अनुसार ‘कांग्रेस पार्टी कार्यालय भवन’ राख्दा स्थानीय सरकार र संघ सरकारको शहरी विकास मन्त्रालयबाट बजेट नपाइने भएकाले ‘हरिहंश स्मृति प्रतिष्ठान बहुउद्देश्यीय भवन’ नाम राखिएको हो । पार्टी कार्यालय नभनी बहुउद्देशीय भवन उल्लेख गरिएपछि शहरी विकास मन्त्रालयले चालु आर्थिक वर्षमा ५० लाख रुपैयाँ बजेट विनियोजन गरेको छ ।

भवन निर्माणका लागि जग्गा तत्कालीन जिल्ला विकास समिति पाँचथरका पूर्वसभापतिको परिवारले उपलब्ध गराएका हुन् । स्थानीय कांग्रेस नेताका अनुसार पूर्वसभापति स्वर्गीय कांग्रेस नेता हरिश्चन्द्र नेम्वाङ र पत्नी हंशरानी नेम्वाङको परिवारले फिदिम नगरपालिका–२ को नेपालटारमा जग्गा उपलब्ध गराएको हो । उनीहरूकै नाममा कांग्रेस पार्टी कार्यालय निर्माण भइरहेको हो ।

भवन निर्माण समितिमा कांग्रेसको संस्थापन पक्षका नेता तथा कार्यकर्ताहरू छन् । संस्थापनइतर समूहका नेताहरू भने एकपक्षीय ढंगले भवन निर्माण समिति बनाइएको भन्दै असन्तुष्ट पनि छन् । भवन निर्माणका लागि पाँच लाख रुपैयाँ विनियोजन गरेको फालेलुङ गाउँपालिका अध्यक्ष वीरविक्रम थाम्सुहाङ भवन निर्माण समितिले बजेट मागेपछि दिएको भन्दै सहजै पन्छिए । तर, बजेट पालिकासँग अहिले नभएकाले पालिकाको हिउँदे अधिवेशनबाट संशोधन गर्नेबारे छलफलमा रहेको उनले बताए ।