रास्वपा असमावेशी, खस आर्यको वर्चस्व, पार्टी समावेशी नभएको रविको स्वीकार

A+ A A-

वैकल्पिक राजनीतिक शक्तिका रूपमा देखा परेको रवि लामिछाने नेतृत्वको राष्ट्रिय स्वतन्त्र पार्टी (रास्वपा) असमावेशी देखिएको छ । लामिछानेले पनि आफ्नो पार्टी समावेशी नभएको स्वीकारेका छन् । खस आर्य समुदायको बाहुल्य भएको दल भएको भन्दै यसलाई उनले कमजोरी भनेका छन् ।

मधेशको जलेश्वरमा भएको पार्टी केन्द्रीय समिति र संसदीय दलको बैठकमा लामिछानेले पेस गरेको राजनीतिक प्रतिवेदनमै उल्लेख छ, ‘समावेशितालाई व्यवहारमा लागू गर्न नसक्नु हाम्रो ठूलो कमजोरी हो ।’

रविले आगामी दिनमा पार्टीमा यस्तो कमजोरी हुन नदिने प्रतिबद्धता जनाएका छन् । जानेर वा नजानेर समावेशितालाई उपेक्षा गर्ने कार्यले लोकतन्त्रको उपहास गर्छ’, प्रतिवेदनमा भनिएको छ, ‘आगामी दिनमा यस्तो कमजोरी नहुने प्रतिबद्धता म सबै साथीहरूबाट चाहन्छु ।’

रवि नेतृत्वको रास्वपाको पदाधिकारीदेखि संसदीय दल, केन्द्रीय समितिहुँदै वडा तहसम्मकै पार्टी संरचनामा खस आर्य समुदायको एकल वर्चस्व छ । तर, राजनीतिक प्रतिवेदनमा पार्टी असमावेशी भएको भन्दाभन्दै फेरि उनले छनोट गरेका पदाधिकारीमा खस आर्य समुदायको एकल वर्चस्वलाई कायमै राखेका छन् ।

१२ जना पदाधिकारी रहेको रास्वपामा खस आर्य समुदायका सभापति रवि लामिछाने, उपसभापतिहरू डोलप्रसाद (डीपी) अर्याल र स्वर्णिम वाग्ले, महामन्त्री मुलुक ढकाल, सहमहामन्त्रीहरू कवीन्द्र बुर्लाकोटी र विपिन आचार्य, कोषाध्यक्ष लिमा अधिकारी, सहकोषाध्यक्ष दीपका बोहरा, सहप्रवक्ताहरू रमेश प्रसाईं र प्रतिमा रावल गरी नौ जना छन् ।

यो संख्या पदाधिकारीमा खस आर्य समुदायको सहभागिता ७५ प्रतिशत हो । फेरि, पदाधिकारीमध्ये पनि मुख्य पदीय भूमिकामा खस आर्य समुदायकै प्रतिनिधित्व छ ।

आदिवासी जनजाति समुदायकी सुमना श्रेष्ठ सहमहामन्त्री र बसुमाया तामाङ सहकोषाध्यक्ष छन् । मधेशी समुदायका मनिष झा सहप्रवक्ता छन् । खस आर्यबाहेकका समुदायको रास्वपाको पदाधिकारीमा २५ प्रतिशत छ ।

दलित, थारु र मुस्लिमको प्रतिनिधित्व शून्य छ । जबकि, नेपाली समाजको चरित्र समावेशी खालको छ । सोहीअनुसार राज्यसत्तादेखि हरेक संरचनामा समावेशी प्रणालीअनुसार समुदायगत प्रतिनिधित्वलाई संविधानले सुनिश्चित गरेको छ । तर, रवि नेतृत्वको दल रास्वपाले पनि व्यावहारिक रूपमा समावेशितालाई अस्वीकार गरेको देखिएको हो ।

प्रकाशित मिति: शुक्रबार, मंसिर १५, २०८० १३:५२