कांग्रेस नेता प्रदीप पौडेललाई प्रश्न- गणतन्त्र किन खतरामा पर्‍यो ? (भिडियो)

A+ A A-

राजधानीको बल्खु र झापाको बिर्तामोडमा हालै भएको प्रदर्शनपछि राजतन्त्र र हिन्दु राष्ट्रका पक्षधरहरूले गणतन्त्रको जग हल्लिएको दाबी गर्न थालेका छन् । गणतन्त्र अब ढल्न मात्रै बाँकी रहेको भन्दै उनीहरू हौसिएका पनि छन् ।

स्थापनाको साढे १५ वर्षमै सर्वोत्तम राजनीतिक व्यवस्था भनिएको गणतन्त्र के साँच्चै खतरामा परेको हो ? गणतन्त्रको विकल्प राजतन्त्र हुन सक्छ ? यी दुई प्रश्नका फरक-फरक जवाफ आउन थालेका छन् ।

गणतन्त्र प्राप्तिको आन्दोलनमा होमिएका कांग्रेस सांसद प्रदीप पौडेललाई भने गणतन्त्र अहिले खतरामा नरहेको बताउँछन् । गणतन्त्रको विकल्प राजतन्त्र हुन नसक्ने पनि उनको मत छ । शिलापत्रसँगको कुराकानीमा पौडेलले भने, 'म एक गणतन्त्रवादी हुँ । गणतन्त्रको विकल्प गणतन्त्रबाहेक अरु (राजतन्त्र) हुनै सक्दैन ।’

तत्कालीन नेकपा (माओवादी) को नेतृत्वमा भएको १० वर्षे सशस्त्र सङ्घर्ष र २०६२/६३ मा भएको संयुक्त जनआन्दोलनको एउटा राजनीतिक उपलब्धिको रूपमा गणतन्त्रलाई मान्ने गरिन्छ । तर, राजतन्त्र र हिन्दु राष्ट्र पक्षधरहरू ‘गणतन्त्र धोका हो’ भन्छन् । उनीहरूको उपस्थिति हालैका दिनमा सडक र संसदमा विगतमा भन्दा बढेको छ ।

यसो हुनुको पछाडि कांग्रेस सांसद पौडेल मूलभूत रूपमा गणतन्त्रमा पनि सरकार र दलहरू जनअपेक्षाअनुसार ‘डेलिभरी’ दिनमा चुक्नुलाई ठान्छन् । त्यही असन्तुष्टिको परिणामस्वरुप गणतन्त्रमाथि प्रश्न उठेको उनको विश्लेषण छ ।

‘खासमा जनतामा असन्तुष्टिचाहिँ छ । जनताले डेलिभर भएन भनेर भनेका छन् । त्यसमाथि राजनीतिक दलका नेतृत्वको व्यवहार, कार्यशैली, दलहरूको सञ्चालन विधिलगायतमा धेरै त्रुटि देखिएका छन्,' पौडेल भन्छन्, 'जुन ढंगले आर्थिक–सामाजिक क्षेत्र विकसित हुनुपर्थ्यो, भएन । यसले प्रश्न उठेको हो ।’

उनका अनुसार सरकार र दलहरू भने छिटो सच्चिनुपर्छ । नसच्चिए जनतामा अझ बढी असन्तुष्टि पैदा हुने र त्यसको प्रहार गणतन्त्रमाथि हुन सक्ने उनको विश्लेषण छ ।

प्रकाशित मिति: बिहीबार, मंसिर १४, २०८० १९:५८