नेपाल ल्युब आयल लिमिटेडद्वारा चितवनको रत्ननगरका दुई विद्यार्थीलाई छात्रवृत्ति

नेपाल ल्युब आयल लिमिटेडद्वारा चितवनको रत्ननगरका दुई विद्यार्थीलाई छात्रवृत्ति

A+ A A-

नेपाल ल्युब आयल लिमिटेडले चितवनको रत्ननगरका दुई विद्यार्थीलाई छात्रवृत्ति प्रदान गरेको छ । कम्पनीले रत्ननगर– १ निवासी सरस्वती चौधरीका दुई सन्तानलाई एक वर्षका लागि आवश्यक शैक्षिक शुल्क र शैक्षिक सामग्रीबापतको १ लाख १५ हजार ३ सय रुपैयाँबराबरको चेक हस्तान्तरण गरिएको हो ।

रत्ननगरको शिवकृपा अटोपार्ट्स सेन्टरमा आयोजित एक औपचारिक कार्यक्रममा नेपाल ल्युब आयलका मार्केटिङ म्यानेजर पूर्णिमा गौतम, चितवनका लागि नेपाल ल्युबको आधिकारिक बिक्रेता आशीर्वाद ट्रेडिङका सञ्चालक सुवास कँडेल, नेपाल अटो मेकानिकल एसोसियसनका पूर्वअध्यक्ष ठाकुरप्रसाद न्यौपाने, नेपाल अटो मेकानिकल व्यवसायी संघका महासचिव टीकादत्त अधिकारीलगायतले संयुक्त रूपमा चौधरी परिवारलाई चेक हस्तान्तरण गरेका हुन् ।

रत्ननगरमै मेकानिकको रूपमा काम गर्ने सरस्वतीका श्रीमान् विक्रम चौधरीको २०७८ सालमा कोभिड कारण मृत्यु भएको थियो । बीसी अटो वर्कसपका नाममा आफ्नै वर्कसप सञ्चालन गरेका दिवंगत विक्रम चौधरी एक कर्मठ र दक्ष अटो मेकानिकका रूपमा परिचित थिए । कम्पनीले आफ्नो सामाजिक उत्तरदायित्वअन्तर्गत उक्त सहयोग गरेको बताएको छ ।

नेपाल ल्युब आयलका महाप्रबन्धक गंगाराज भट्टराईले भने, ‘हामीले सधैँ नेपालमा कार्यरत मिहिनेती अटो मेकानिक्सहरूको क्षमता विकासमा ध्यान केन्द्रित गरेका छौँ । त्यसैले हाम्रा अटो मेकानिक र उहाँहरूका परिवारलाई आवश्यक परेको बेला सहयोग गर्नु हाम्रो कर्तव्य पनि हो र यो जिम्मेवारी हामीले भविष्यमा पनि निर्वाह गर्नेछौँ ।’

त्यसैगरी, नेपाल अटो मेकानिकल एसोसिएसनका पूर्वअध्यक्ष ठाकुरप्रसाद न्यौपानेले मजदुरहरूलाई खुसी पार्न लाखौँ रकम खर्च गरेर भोजभतेर तथा खानपान गराउनुभन्दा मजदुरको सन्तानको शिक्षादीक्षामा लगानी गर्दा समस्त परिवारकै दिगो रूपमा विकास हुने बताए ।