जलेश्वरमा बैठक राखेर मधेशमा घण्टी बजाउने रास्वपाको दाउ, होला त सफल ?

तस्वीर स्रोतः सामाजिक सञ्जाल ।

A+ A A-

२०७९ को चुनावबाट नयाँ राजनीतिक शक्तिका रूपमा उदाएको राष्ट्रिय स्वतन्त्र पार्टी (रास्वपा) को बैठक महत्तरीको जलेश्वरमा जारी छ । २०७९ को चुनावमा खासगरी अरु ठाउँमा रास्वपाको घण्टी राम्रैसँग बजे पनि मधेशमा भने त्यस्तो भएको थिएन ।

रास्वपाले प्रतिनिधिसभामा प्रत्यक्षतर्फ ७ सिट जित्दा मधेश प्रदेशका ३२ सिटमध्ये एउटामा पनि जित निकाल्न सकेन । त्यति मात्र होइन, तीन क्षेत्रमा भएको उपचुनावमध्ये चितवन र तनहुँमा रास्वपाले जिते पनि बारामा भने उसका उम्मेदवार पूर्वडीआईजी रमेश खरेल पराजित त भए नै, जमानत पनि जोगाउन सकेनन् ।

मधेशमा २०७९ मा बजाउन नसकेको घण्टी २०८४ मा बजाउने दाउमा छ रास्वपा । त्यसैलाई मध्यनजर गर्दै अहिले रास्वपाका नेताहरू मधेश झरेका छन् । रास्वपाले यही सन्देश दिनका लागि महोत्तरीमा तीन दिनसम्म केन्द्रीय कार्यसमितिको पूर्ण बैठक गरिरहेको छ । संगठन विस्तारका साथसाथै मधेशका जिल्लाजिल्लामा सभापति रवि लामिछाने सभा गरिरहेका छन् ।

मधेशमा संगठन विस्तारमा जुटेको रास्वपाका सभापति लामिछानेले मधेशकेन्द्रित दलहरूलाई लक्षित गरी अभिव्यक्ति दिने गरेका छन् । लामिछानेले भन्ने गरेका छन्, 'मधेशका मसिहा भन्नेहरूले मधेशका लागि के गरे ? आफू मधेशको छोरा हुँ भन्नेहरूले मधेशका लागि के गरे ? सोच्ने बेला आएको छ ।'

‘हामी इमानका साथ मधेशमा आएका छौँ, मधेशको समस्या, पीडा बुझेर इमानदारीपूर्वक त्यसको समाधान खोज्छौँ,' गत शनिबार रौतहटको गौरमा आयोजित सभामा लामिछानेले भनेका थिए, ‘हामीसँग दिने केही छैन । हामी इमान बोकेर मधेश आएका छौँ । जग्गाजमिन बिक्री भए पछि खरिद गर्न सकिन्छ तर इमान एकपटक बिक्री भयो भने फिर्ता हुन सक्दैन ।'

आफू इमानदार भएर मधेश झरेकाले साथ खोजेको उनको भनाइ थियो । त्यस्तै, महोत्तरीको जलेश्वरमा सञ्चारकर्मीहरूसँग उनले सञ्चारकर्मी हुँदा आफूले मधेशका धेरै समस्या उठाएको र अब राजनीतिको माध्यमले त्यसलाई समाधान गर्न पहलकदमी लिने बताएका थिए ।

रास्वपा सांसद मनिष झा पनि मधेशमा पार्टीको उपस्थिति बढाउन केन्द्रीय कार्यसमित र संसदीय दलको संयुक्त बैठक राखिएको बताउँछन् । बैठकका लागि काठमाडौं छाडेर मधेश झरेको बताउँदै झाले त्यसमा पनि जनकपुर नरोजेर जलेश्वरमा बैठक गरिएको बताए । ‘हामीले मधेश प्रदेशको महोत्तरीमा बैठक गर्‍यौँ । त्यो पनि मधेशको राजधानी जनकपुरधाम गरेनौँ । त्यसको पनि कारण छ,' झा भन्छन्, 'कुनै समय प्रशासनिक हिसाबले महोत्तरीको जलेश्वर जनकपुरभन्दा बढी महत्त्वपूर्ण थियो । तर, आज ओझेलनमा परेको छ । त्यस कारण हामीले ओझेलनमा परेका शहरहरूलाई पनि चर्चामा ल्याउने प्रयास गरेका छौँ ।’

रास्वपालाई मधेश र संघीयताविरोधी भनेर भ्रम छरिएको भन्दै त्यसलाई चिर्नका लागि पनि जलेश्वरमा बैठक राखिएको झाको भनाइ छ । 'हामी संघीयताविरोधी पार्टी होइनौँ । पार्टीभित्र प्रदेश संचरना नहुँदैमा संघीयताविरोधी हुँदैन भनेर बुझ्नु आवश्यक छ,' झा भन्छन्, 'पार्टीहरूले दोस्रो र तेस्रो तहका नेताहरूको व्यस्थाका लागि प्रदेश संचरना राखेको देखिन्छ । हामीले संघीयताभित्र सुधारिएको व्यवस्थाको कुरा गरेका हौँ ।’ प्रदेश सरकारहरूले गरेको भ्रष्टाचार र अनियमितता नछुपेको उनले बताए ।

आफ्नो पार्टीप्रति मधेशी जनताको आकर्षण बढेको झाको दाबी छ । अन्य पार्टीका नेताहरू पनि रास्वपामा आउन खोजिरहेको उनले बताए । सरकारले राम्रो डेलिभरी दिन नसक्दा जनतामा वितृष्णा बढेको झाको भनाइ छ । ‘संघीय र प्रदेश सरकारले राम्रो डेलीभरी दिन नसक्दा दुर्गा प्रसाईंजस्ता व्यपारीहरूले आन्दोलन गरिरहेका छन् । यी कुराहरू बुझ्नु आवश्यक छ,’ झा भन्छन् ।

उता, रास्वपाले मधेशलाई केन्द्रमा राखेर आफ्ना गतिविधि चलाउन थाले पनि त्यसले आफूहरूलाई खासै प्रभाव नपार्ने अन्य पार्टीका नेताहरू बताउँछन् । जनता समाजवादी पार्टी (जसपा) का संघीय परिषद् सदस्य प्रेमचन्द्र झा रास्वापको गतिविधिले आफूहरूलाई प्रभाव नपार्ने दाबी गर्छन् ।

'मधेशी जनताको पहिचानको आन्दोलन उत्कर्षमा रहेको बेला रास्वपा त्यसको विपरीत आन्दोलन गरेर राजनीतिमा आएको पार्टी हो,' झा भन्छन्, ‘मधेशी जनतालाई हक अधिकारबाट वञ्चित गर्ने षड्यन्त्रका साथ केही व्यापारीहरूले लामिछानेलाई राजनीतिमा ल्याएका छन् । मधेशी जनताले उनलाई विश्वास गर्छन्‌जस्तो मलाई लाग्दैन ।’

मधेशको राजनीति परिपक्व भएको उल्लेख गर्दै झा मधेशी जनतालाई भावनाको भरमा प्रभावित पारेर लाभ लिन सम्भव नरहेको बताउँछन् । ‘यहाँको राजनीति म्याचुअर्ड छ । यहाँ भावनाभन्दा व्यक्तिगतलगायत विभिन्न कारणले मान्छेहरू कुनै न कुनै पार्टीसँग जोडिएका छन् । त्यस कारण रास्वपाले मधेशबाट ठूलो उपलब्धि गर्छु भनेर सोच्छ भने त्यो भुल हुनेछ,’ झा भन्छन्, 'रास्वपाको मधेशको विषयमा कुनै फरक एजेण्डा छैन, जुन एजेण्डा ती पार्टीले उठाएको छ, त्यो सबै पार्टीले उठाउँदै आएको हो ।’

विश्लेषक रोशन जनकपुरी नयाँ पार्टी भएकोले मधेशमा रास्वपाले संगठन विस्तार गर्नु स्वाभाविक रहेको बताउँछन् । मधेशवादी दलहरूले एजेण्डा छोडेर सत्ता स्वार्थको राजनीतिमा केन्द्रित रहेको अवस्थामा त्यसको फाइदा रास्वपाले लिन सक्ने उनको विश्लेषण छ ।

'आन्दोलनताका मधेशवादी दलले उठाएको एजेण्डा उनीहरूको चुनावी हतियार थियो । अहिले उनीहरूले त्यो एजेण्डा छोडिसकेका छन् । व्यतिगत स्वार्थ, प्रलोभन, नातावाद, कृपावाद, जातिवादको राजनीतिक मधेशमा हावी छ,' जनकपुरी भन्छन्, 'यस्तो अवस्थामा रास्वपाले आफ्नो स्पेस बनाउन खोजिरहेको छ । केही न केही स्पेस नपाउने होइन । तर, वर्तमान अवस्थामा मधेश प्रदेशमा रास्वपाको खासै चार्मिङ देखिँदैन ।’

प्रकाशित मिति: बुधबार, मंसिर १३, २०८० १७:०५