खसीबोकामा प्रतिकेजी १० रुपैयाँ छुट, घ्यूमा ५० रुपैयाँ

A+ A A-

दशैं, तिहार र छठलाई लक्षित गर्दै सरकारले आफ्नो लगानी रहेका व्यापारिक संस्थानमार्फत बिक्री हुने विभिन्न वस्तुहरूमा निश्चित रकम छुट दिएको छ । सरकारले चामल, चिनी, खसी–बोका, च्याङ्ग्रा, घ्यू, पनीर, खाना पकाउने ग्यासलगायतका दैनिक उपभोग्य वस्तुमा प्रतिकेजी १० रुपैयाँदेखि ५० रुपैयाँसम्म छुट दिने निर्णय गरेको छ ।

दशैं, तिहार र छठजस्ता चाडपर्वलाई लक्षित गर्दै यस्तो छुट योजना ल्याएको उद्योग वाणिज्य तथा आपूर्ति मन्त्रालयका उपसचिव उर्मिला केसीले जानकारी दिइन् ।

‘सरकारको लगानी रहेका संस्थानमार्फत बिक्री वितरण हुने दैनिक उपभोग्य वस्तुमा छुट दिने निर्णय भएको छ । यस्तै निजीक्षेत्रले बिक्री वितरण गर्ने दैनिक उपभोग्य वस्तुमा पनि कालाबजारी नहोस् भनेर मूल्य तोक्नेदेखि तोकिएका मूल्यअनुसार बिक्री वितरण भए नभएको अनुगमनलाई समेत तीव्र बनाइएको छ,’ उपसचिव केसीले शिलापत्रसँग भनिन् ।

खसी–बोका र च्याङ्ग्रामा १० रुपैयाँ छुट

सरकारले खाद्य व्यवस्था तथा व्यापार कम्पनीमार्फत बिक्री हुने खसी–बोका, च्याङ्ग्रा र चामलमा प्रतिकेजी १० रुपैयाँसम्म छुट दिने निर्णय गरेको छ ।

कम्पनीले बिक्री गर्ने जिउँदो खसी र बोकाको मूल्य प्रतिकेजी ५ सय ६० रुपैयाँ तोकेको छ । कम्पनीले यस्तो मूल्यमा प्रतिकेजी १० रुपैयाँ छुट दिएर ५ सय ५० रुपैयाँमा बिक्री गरेको कम्पनीको सूचना अधिकारी शर्मिला न्यौपानेले जानकारी दिइन् । यस्तै, च्याङ्ग्राको मूल्य प्रतिकेजी ७ सय ४० रुपैयाँ तोकिएको छ । यस्तो मूल्यमा पनि प्रतिकेजी १० रुपैयाँ छुट पाइनेछ ।

कम्पनीले २ हजार खसी–बोका र १ हजार च्याङ्ग्रा बिक्री गर्ने भएको छ ।

खसी–बोका आपूर्तिमा निजी क्षेत्र नै निर्णायक

खाद्य व्यवस्था तथा व्यापार कम्पनीले मूल्य तोकेर छुटसहित खसी–बोका, च्याङ्ग्रा र चामल बिक्री गरे पनि त्यस्तो बिक्रीले काठमाडौं उपत्यकाको मागलाई धान्न सक्ने देखिँदैन । मन्त्रालयका उपसचिव केसीका अनुसार काठमाडौं उपत्यकामा दशैंको बेलामा मात्रै करिब ४० हजार खसी–बोका र च्याङ्ग्राको माग हुन्छ ।

‘सरकारी संस्थानमार्फत बिक्री गरिने खसी–बोका र च्याङ्ग्राले माग धान्दैन, सबैभन्दा ठूलो आपूर्तिकर्ता निजीक्षेत्र नै हो, तर सरकारको लगानी भएका संस्थामार्फत बिक्री गरिने वस्तुको मूल्य तोक्ने कार्यले निजीक्षेत्रलाई पनि सोही मूल्यमा बिक्री गर्नुपर्ने अवस्था आउँछ,’ केसीले भनिन् ।

चामलमा प्रतिकेजी १० रुपैयाँसम्म छुट

कम्पनीले बिक्री गर्ने चामलमा प्रतिकेजी ५ रुपैयाँदेखि १० रुपैयाँसम्म छुट दिने व्यवस्था मिलाइएको छ । कम्पनीका सूचना अधिकारी न्यौपानेका अनुसार जापानिज चामल प्रतिकेजी ६६ रुपैयाँ, अरूवा जिरा मसिनो चामल प्रतिकेजी ५५ रुपैयाँ र अरूवा सोना मन्सुली चामल प्रतिकेजी ४७ रुपैयाँमा कम्पनीले बेच्छ । यी सबै प्रकारका चामलमा अहिले प्रतिकेजी ५ रुपैयाँ छुटको व्यवस्था मिलाइएको छ ।

यस्तै, कम्पनीले प्रतिकेजी ८३ रुपैयाँमा बिक्री गर्ने अरूवा बासमती चामलमा प्रतिकेजी १० रुपैयाँ छुट दिने निर्णय गरेको छ । कम्पनीले प्रतिकेजी १ सय ३० रुपैयाँमा बिक्री गर्ने कर्णालीको सिमी र प्रतिकेजी ८० रुपैयाँमा बिक्री गर्ने कर्णालीको फापरमा पनि प्रतिकेजी १० रुपैयाँका दरले छुट दिएको छ । यो सबै मूल्य काठमाडौं उपत्यकाभित्रका बिक्री केन्द्रहरूका लागि तय गरिएको हो ।

सहुलियत मूल्यमा २५ हजार क्विन्टल बिक्री गरिने

कम्पनीका सूचना अधिकारी न्यौपानेका अनुसार सातै प्रदेशमा गरी २५ हजार क्विन्टल चामल बिक्री गरिनेछ । यसमध्ये प्रदेश १ मा १५ सय क्विन्टल, प्रदेश २ मा २१ सय ५० क्विन्टल, प्रदेश ३ मा १० हजार क्विन्टल, गण्डकी प्रदेशमा ७ सय ५० क्विन्टल, प्रदेश ५ मा ५ सय ५० क्विन्टल, कर्णाली प्रदेशमा ७ हजार २ सय ५० क्विन्टल र सुदूरपश्चिम प्रदेशमा २ हजार ८ सय क्विन्टल चामल बिक्री गर्ने लक्ष्य लिइएको न्यौपानेले जानकारी दिइन् ।

डीडीसीको घ्यूमा ५० रुपैयाँ छुट

सरकारी स्वामित्वको दुग्ध विकास संस्थानले घ्यूमा प्रतिकेजी ५० रुपैयाँ छुट दिएको छ । यसअघि प्रतिकेजी ९ सय रुपैयाँमा बिक्री गर्दै आएको घ्यू संस्थानले चाडपर्वलाई लक्षित गर्दै प्रतिकेजी ८ सय ५० रुपैयाँमा बिक्री गर्नेछ । यस्तै, पनीरमा प्रतिकेजी १० रुपैयाँ छुट दिएर ७ सय रुपैयाँ कायम गरिएको संस्थानले जानकारी दियो ।

चिनीमा ५ रुपैयाँ र नुनमा २ रुपैयाँ छुट

सरकारी लगानी पनि रहेको साल्ट ट्रेडिङ कर्पाेरेसनले बिक्री गर्ने चिनी र नुनमा छुट दिइएको छ । कर्पाेरेसनले दिएको जानकारीअनुसार चिनीको मूल्य प्रतिकेजी ७९ रुपैयाँ ५० पैसामा साढे ५ रुपैयाँ छुट दिएर प्रतिकेजी ७२ रुपैयाँ कायम गरिएको छ ।

यस्तै, कर्पाेरेसनले प्रतिकेजी २० रुपैयाँमा बिक्री गर्दै आएको नुनमा २ रुपैयाँ छुट दिएर १८ रुपैयाँ कायम गरिएको छ । कर्पाेरेसनले बिक्री गर्ने अन्य खाद्य वस्तुहरूमा १० प्रतिशत छुट दिएर बिक्री गर्नेछ ।

सरकारी लगानीसमेत भएका संस्थानहरूले बिक्री गर्ने दैनिक उपभोग्य वस्तुको मूल्य काठमाडौं उपत्यकाका लागि तोकिएको दर हो भने छुट सुविधा देशभर लागू हुने मन्त्रालयका उपसचिव केसीले जानकारी दिइन् ।

सरकारले केही साता अगाडि नै खाना पकाउने ग्यासमा प्रतिसिलिण्डर २५ रुपैयाँ कम गरेको थियो । चाडपर्वलाई लक्षित गर्दै खाना पकाउने ग्यासको मूल्य घटाइएको सरकारको भनाइ छ ।

प्रकाशित मिति: सोमबार, असोज १३, २०७६ १८:०६