लिबर्टी माइक्रो लाइफ इन्स्योरेन्स नेसनल पेमेन्ट स्वीचमा आबद्ध

A+ A A-

लिबर्टी माइक्रो लाइफ इन्स्योरेन्स पनि अब नेसनल पेमेन्ट स्वीच (एनपीएस) मा आबद्ध भएको छ । कम्पनीले आफ्ना भुक्तानीसम्बन्धी कारोबारहरूलाई नेपाल क्लियरिङ हाउस (एनसीएचएल) का भुक्तानी प्रणालीहरू प्रयोग गरी डिजिटल माध्यमबाट भुक्तानी गर्न सक्ने व्यवस्था लागू गर्न एनपीएसमा आबद्ध भएको हो ।

सोसम्बन्धी सम्झौतापत्रमा लिबर्टी माइक्रो लाइफका तर्फबाट प्रमुख कार्यकारी अधिकृत रामकुमार यादव र एनसीएचएलका प्रमुख कार्यकारी अधिकृत निलेशमान सिंह प्रधानले हस्ताक्षर गरेका छन् ।

उक्त सम्झौतासँगै अब लिबर्टी माइक्रो लाइफ एनपीएसमा आबद्ध पाँचौँ माइक्रो लाइफ इन्स्योरेन्स कम्पनी बनेको छ । लिबर्टी माइक्रो लाइफका आन्तरिक प्रणालीलाई एनसीएचएलको नेसनल पेमेन्ट इन्टरफेस (एनपीआई) सँग जोडी बीमा लेखको भुक्तानी, बीमा दाबी भुक्तानी, एजेन्ट कमिसन, तलब, भेण्डर भुक्तानीलगायत आफ्ना कारोबारहरू आफ्ना तथा लाभग्राहीहरूका बैंक खाताहरूबीच सोझै गर्न सकिने भएको छ ।

एनसीएचएलका विभिन्न भुक्तानी प्रणालीहरूको एकीकृत इन्टरफेसको रुपमा विकास गरिएको एनपीआईमा हाल ५३ सदस्य बैंक वित्तीय संस्थाहरू आबद्ध छन् भने पीएसपी/पीएसओ, रेमिट्यान्स कम्पनीहरू, मर्चेन्ट बैंक, सरकारी तथा अर्ध–सरकारी संस्थाहरूलगायत सयभन्दा बढी गैरबैंकिङ संस्थाहरू इन्डाइरेक्ट/प्राविधिक सदस्यका रूपमा आबद्ध छन् । मर्चेन्ट बैंकिङ, बीमा, सहकारी, लघुवित्तलगायतका विभिन्न क्षेत्रहरूमा भुक्तानी कारोबारहरूलाई डिजिटाइज गर्न एनपीएसअन्तर्गतका विभिन्न उपकरणहरू सञ्चालनमा छन् ।

लिबर्टी माइक्रो लाइफ इन्स्योरेन्स जनवरी २०२३ मा नेपालको ग्रामीण क्षेत्रहरूमा बीमासम्बन्धी सेवाहरूको पहुँच विस्तार गर्ने, वित्तीय चेतना प्रदान गर्ने, सीमान्तकृत समुदायलाई बीमासम्बन्धी विभिन्न सेवाहरू प्रदान गर्ने उद्देश्यले स्थापना गरिएको एक पब्लिक लिमिटेड कम्पनी हो । लिबर्टी माइक्रो लाइफले आफ्नो सेवा प्रवाहलाई सुधार गर्न विभिन्न डिजिटल च्यानलहरू अपनाइरहेको छ र एनसीएचएलसँगको यस सहकार्यले लिबर्टी माइक्रो लाइफको सेवा प्रवाह थप सुदृढ हुने तथा अन्य विभिन्न नयाँ सेवाहरू सुचारु गर्न पनि थप मद्दत पुग्ने विश्वास गरिएको छ ।