नेकपा कार्यदल विघटनमा बादल–पौडेल दोषी

A+ A A-

नेपाल कम्युनिष्ट पार्टीको पार्टी(नेकपा) को एकिकरणको बाँकी काम पूरा गर्न बनेको कार्यदल आज बसेको सचिवालय बैठकले भंग गरेको छ ।

कार्यदल भंग हुनमा संयोजक रामबहादुर थापा बादल र महासचिव तथा कार्यदलका वरिष्ठ सदस्य विष्णु पौडेको हात रहेको सचिवालय सदस्य झलनाथ खनालले बताए । खनालले भने ‘थापा र पौडेले हामी काम गर्न सक्दैनौं भनेपछि कार्यदल भंग भएको छ, संयोजक र वरिष्ठ सदस्यले नै काम गर्न नसक्ने भनेपछि अरूको असहमति हुँदा पनि कार्यदल भंग भएको हो ।’

कार्यदल भंग गर्नमा पार्टी अध्यक्ष तथा प्रधानमन्त्री केपी ओलीको पनि भित्री आकांक्षा रहेको कार्यदलका एक सदस्यले बताए । उनले भने ‘प्रधानमन्त्रीले नै कार्यदललाई काम गर्न दिनुभएन । यसकोलागि सबै भन्दा उपयुक्त पात्र थापा र पौडेल भए ।’

ती सदस्यले भने ‘कार्यदलले काम गरे ओली, पौडेल र बादलका मानिस टिपेर कमिटीमा राख्न नपाउने भएकाले यो कार्यदल उनीहरूको लागि सह्यै भएको थिएन । कार्यदलले काम गरेपछि मापदण्ड बनाउथ्यो र मापदण्ड अनुसार काम हुन्थ्यो ।’

स्थायी कमिटीको बैठकले पुस १३ गते ९ सदस्यीय कार्यदल गठन गरेको थियो । कार्यदललाई पुस मसान्तसम्म एकीकरणका सबै बाँकी काम सक्ने गरी प्रस्ताव गर्ने गरी काम गर्न कार्यदेश दिइएको थियो । कार्यदलले विधानमा भएका कमी–कमजोरी हल गरेको थियो । तर केन्द्रीय सदस्यहरूको कार्यविभाजन लगातका केही कामहरू भने बाँकी नै रहेका छन् । कार्यदलको बैठक ८ पटक बसेपनि धेरै काम भने पूरा भएको थिएन ।

कार्यदलमा नै विवाद भएपछि बाँकी कामको लागि कार्यदलको बैठक नै बस्न सकेको थिएन । कार्यदललाई माघ २१ गते बसेको सचिवालय बैठकले दुई दिन भित्र प्रतिवेदन बुझाउन भनेको थियो । सचिवालयको निर्देशन पछि संयोजक वादलले ३ पृष्ठको अधुरो प्रतिवेदन बुझाएका थिए । उक्त प्रतिवेदनमा नै बहुमत सदस्यको असहमति थियो ।

असन्तुष्ट पक्षले भने एक दुई दिन भित्र ७ पृष्ठको अर्को प्रतिवेदन पार्टी अध्यक्षलाई बुझाउने तयारी गरेको छ । उक्त प्रतिवेदनमा पार्टी विधिका आधारमा चल्नुपर्छ भन्ने निश्कर्ष रहेको बताइएको छ । कार्यदलका बाँकी सदस्यहरुले बुझाउने प्रतिवेदन तयार भइसकेपनि केही सदस्यले हस्ताक्षर गर्न बाँकी रहेकाले आज नबुझाएको बताइएको छ ।

७७ जिल्लालका जिल्ला अध्यक्ष माओवादी र एमाले एकता हुँदा जसरी भागबण्डा गरेर बनाएका थिए त्यसरी नै जानुपर्ने फरक प्रतिवेदनमा प्रस्ताव गरिएको छ । हरेक जिल्लाका अध्यक्ष संघीय संसद, प्रदेश संसद वा स्थानीय तहमा निर्वाचित भए उपाध्यक्षलाई अध्यक्ष बनाउने, उपाध्यक्ष पनि निर्वाचित भए सचिव र सचिव निर्वाचित भए सिनियर नेतालाई नेतृत्व दिने भन्ने छ ।

प्रदेश कमिटीमा नेपाल कम्युनिष्ट पार्टीका सदस्य नै नभएका मानिसहरू प्रदेश सदस्य बनाएकाले तीनलाई बिदाइ गर्नुपर्ने प्रस्ताव गरिएको एक विघटित कार्यदलका सदस्यले जानकारी दिएका छन् । विधानमा १० प्रतिशत सदस्य थप्ने भनेको कुरा पनि विधि बनाएर मात्र कार्यन्वयनमा जानुपर्ने भनि फरक प्रतिवेदनमा जोड दिइएको छ ।

अहिलेसम्म जनवर्गीय सङ्गठनअन्तर्गत निर्माण व्यवसायी, कानून व्यवसायी र इञ्जिनीयरको मात्र एकीकरण भएको छ । पार्टी एकता भएको तीन महिनामा सबै तल्लो तहको एकता गर्ने भनिएकोमा अहिलेसम्म हुन नसक्दा पार्टी एकता लम्बिँदै गएको छ । एकीकरण लम्बिँदै जाँदा फागुन र चैत महिनामा पार्टी एकतालाई अझ बलियो बनाउनका लागि राष्ट्रिय अभियानसमेत सञ्चालन गर्ने भनिएको अभियानपछि पछि धकेलिएको छ ।

प्रकाशित मिति: शनिबार, फागुन ११, २०७५ ०२:२१