एमाले त्याग्ने तयारीमा कर्णालीका पूर्वसभामुख शाही, कर्णालीमा कस्ताे पर्ला प्रभाव ?

एमाले त्याग्ने तयारीमा कर्णालीका पूर्वसभामुख शाही, कर्णालीमा कस्ताे पर्ला प्रभाव ?

नेता भीम रावलसँग शाहीकाे भेटपछिकाे सामूहिक तस्वीर

A+ A A-

नेकपा एमाले दैलेखका नेता एवम् पूर्वसभामुख राजबहादुर शाही पछिल्लो समय नेकपा एमालेबाट टाढिँदै गएका छन् । पार्टीभित्र जिम्मेवारीविहीन बनाइएपछि शाहीले पार्टी नै परित्याग गर्न लागेको चर्चा पनि हुन थालेको छ ।

सुर्खेतमा गत १०–११ असोजमा सम्पन्न एमाले प्रथम कर्णाली प्रदेश अधिवेशनमा शाही प्रदेश अध्यक्षको दौडमा थिए । अन्तिमसम्म उम्मेदवारी कायम राखेका शाही केन्द्रले साथ नदिएपछि उम्मेदवारी फिर्ता लिन बाध्य भए ।

अधिवेशनको स्थायी कमिटी सदस्यहरू यामलाल कँडेल र गोरखबहादुर बोगटी दुई खेमामा विभाजित हुँदा उनले अध्यक्ष पदमा एमालेको संस्थापन पक्ष ओली सर्मथित गोरख बोगटी टिमबाट लड्ने चर्चा थियो । तर, अन्तिममा आएर यो टिमले पनि उनलाई साथ दिएन ।

पार्टी केन्द्रले शाहीलाई बाइपास गरी ‘भिजिटर' नेताका रुपमा चिनिने मीनबहादुर शाहीलाई अध्यक्षमा अगाडि सार्दा अन्ततः अध्यक्षका लागि आस गरेको केन्द्रले नै सहयोग नगर्ने चाल पाएपछि उनले उम्मेदवारी फिर्ता लिएका थिए । औपचारिक रुपमा स्वेच्छिक उम्मेदवारी फिर्ता लिएको भनिए पनि पार्टी केन्द्रीय नेतृत्वले दवाव दिएको उनी निकट नेता बताउँछन् ।

‘केन्द्रीय नेतृत्वको चाहनाविपरीत निर्वाचित भएर पनि पार्टी निर्माणमा सकारात्मक योगदान नहुने आदि सम्भावनाहरूलाई ध्यान दिँदै आफ्नो उम्मेदवारी फिर्ता लिने निर्णयमा पुगें,’ शाहीले उम्मेदवारी फिर्ता लिँदै सामाजिक संजालमा लेखेका थिए ।

शाहीको यो भनाइले पनि उनी पार्टीभित्र पेलानमा परेको बुझिन्छ ।

पार्टी अध्यक्ष केपी शर्मा ओली कर्णालीमा निर्विरोध नेतृत्व चयन गर्ने योजनामा थिए । लुम्बिनी प्रदेशबाट सुरु भएकाे पार्टी उपाध्यक्ष विष्णु पौडेल र महासचिव शंखर पोखरेलबीचको शक्ति संघर्षको बाछिटाबाट कर्णाली पनि अछुतो रहन सकेन ।

शाहीलाई अध्यक्षबाहेक अन्य पदाधिकारीमा आउन चाहेको खण्डमा दुवै टिम स्वीकार्न तयार थिए । तर, शाही अध्यक्षको लाइनबाट पछाडि नहटेपछि एक्लिन पुगेको एमाले स्रोत दावी गर्छ ।

सभामुख हुँदा स्थायी कमिटी सदस्य कँडेलको असहयोगका कारण बिच्किएका शाहीले अध्यक्ष पदका लागि यो टिमसँग कुनै किसिमको पहल गरेनन् । पार्टीमा कँडेल र बोगटीबीच दुई टीम खडा भइसकेपछि उनले अन्तिम समयमा अध्यक्षको उम्मेदवारी फिर्ता लिएका थिए ।

पार्टी अधिवेशन सम्पन्न भएको दुई महिना पुग्नै लाग्दा पनि शाही पार्टीमा कुनै पनि भूमिका पाएका छैनन भने, उनको निर्वाचन क्षेत्र मात्रै होइन, कर्णालीमा उनले ‘दल त्याग’ नै गर्न लागेको हल्ला चलेको छ ।

शुक्रबार शाहीले एमालेमा भुमिकाविहीन रहेका भीम रावलसँग काठमाडौंमा भेट गरेका छन् । शाही र रावलबीच के विषयमा कुरा भएको थियो भन्ने तथ्य बाहिर नआए पनि यो भेटले विशेष महत्व राख्ने एमालेका एक नेताले बताए ।

तर, शाहीले पार्टी परित्याग गरी अर्को पार्टीमा प्रवेश गर्ने वा राजनीतिमा निस्क्रिय रहने भन्ने विषयमा अहिलेसम्म कुनै पनि आधिकारिक धारणा सार्वजनिक गरेका छैनन् ।

पछिल्लो समय पार्टी राजनीतिमा खासै सक्रिय नरहेका शाहीसँग यो विषयमा कुरा गर्न खोज्दा आफू बाहिर रहेकाले पछि कुरा गर्ने जवाफ दिए ।

पार्टी विभाजनपछि कर्णाालीमा एमाले कमजाेर बन्दा दैलेखमा भने गठबन्धनका उम्मेदवारलाई पराजित गर्दै एमालेले प्रदेशसभामा एक सिट जितेकाे छ । निर्वाचन क्षेत्र २ (ख) मा माओवादीका उम्मेदवार याेगेन्द्र शाहीलाई एमालेका विनाेद शाहले पराजित गरेका थिए । याे निर्वाचन क्षेत्र २०७४ मा शाही निर्वाचित भएकाे क्षेत्र हाे । त्यसैले पनि शाहीले एमाले त्यागेमा तुलनात्मक रुपमा दैलेखमा बलियाे रहेकाे एमालेलाई ठूलाे प्रभाव पर्ने देखिन्छ । त्यसमाथि शाही एमाले त्यागेर के गर्छन् भन्ने विषयले पनि अर्थ राख्छ । समग्रमा कर्णालीमा कमजाेर रहेकाे एमालेलाई शाहीकाे बहिर्गमन झन समस्या हुन सक्ने देखिन्छ ।

स्थानीय निकायको निर्वाचन २०५४ मा एमालेबाट साविक तोलिजैसी गाउँ विकास समितिको अध्यक्ष उम्मेदवार बनेर निर्वाचनमा जित हात पारेका नेता शाही सोही समयमा गाविस अध्यक्ष महासंघ दैलेखका अध्यक्षसमेत बनेका थिए ।

दैलेखको पश्चिममा पर्ने हालको ठाँटिकाँध गाउँपालिका स्थायी घर भएका नेता शाही २०७४ सालको प्रदेश निर्वाचनमा नेकपा एमालेबाट दैलेख निर्वाचन क्षेत्र नम्बर २ ‘ख’ बाट एमालेको उम्मेदवार बनेका थिए । निर्वाचित भएपछि कर्णालीको सभामुख बनेका थिए ।

प्रकाशित मिति: शनिबार, मंसिर ९, २०८० १८:१९