दसैं मनाउन घर फर्किंदै सुदूरपश्चिमेली

A+ A A-

बैतडीका केशव विश्वकर्मा डेढ वर्ष अघि गहुँ खेती लगाएर परिवार सहित रोजगारीका लागि भारत गएका थिए । उनी अहिले दसैँ मनाउन घर फर्किएका छन् ।

परिवारसँगै बसेर दसैँ मनाउन लामो समय पछि गाउँ फर्कन पाउँदा खुसी लागेको उनी बताउँछन् । केशव मात्र होइनन्, काम विशेषले घर बाहिर रहेका र रोजगारीका लागि भारत लगायत अन्य मुलुक गएका सुदूरपश्चिमेलीहरु अहिले घर फर्किन थालेका छन् ।

दशै तिहार नजिकिएसँगै सुदूरपश्चिम प्रदेशमा चहलपहल बढेको हो । कैलालीको त्रिनगर नाका, कञ्चनपुरको गड्डाचौकी नाका लगायत सुदूरपश्चिमका विभिन्न नाका भएर दसैँ तिहार मनाउन घर फर्किरहेका नेपालीहरूको बाक्लो उपस्थिति देख्न सकिन्छ ।

विगतमा सिमानाकामा निकै सास्ती हुने गरे पनि यस वर्ष भने सहज रहेको यात्रुहरूले प्रतिक्रिया दिएका छन् । भारतमै रोजगारी गरेर दसैँ मनाउन घर फर्किरहेका अछामका दिल बहादुर खन्नी आइतवार त्रिनगर नाकामा रिक्सा खोज्दै थिए । १ वर्ष अघि रोजगारीका लागि भारतको उत्तराखण्ड गएका उनी दसैँ मनाउन घर फर्किएका छन् ।

विगतका वर्षमा सीमामा निकै सास्ती खेप्नु परेको भए पनि यसबर्ष भने सहज रहेको उनले बताए । उनी भन्छन्, ‘पहिले यही ठाउँबाट घर फर्किदा एक हजार रुपैयाँसम्म दिनुपर्थ्यो, नदिए सम्म समान ल्याउन दिदैनथे तर अहिले समय फेरिएछ । पहिलेको जस्तो समस्या खेप्नुपरेको छैन् ।’

भारतीय सुरक्षाकर्मीले विगतका वर्षमा चेकजाँचको नाममा सास्ती दिने गरे पनि यो वर्ष भने त्यो सास्ती नरहेको उनीको भनाई छ । रोजगारीका लागि भारतको विभिन्न सहर गएका नेपालीहरू दसैँका लागि घर फर्किने क्रम बढेको छ ।

जिल्ला प्रशासन कार्यालयले पनि दसैँमा घर फर्किँदै गरेका नेपालीहरूलाई सीमामा सास्ती नहोस् भन्नका लागि त्रिनगर नाकामा चाडपर्व लक्षित सीमा सहायता कक्ष स्थापना गरेको छ ।

नेपालीलाई घर फर्किदा सीमामा कुनै पनि समस्या नहोस भनेर सहायता कक्ष स्थापना गरिएको कैलालीका प्रमुख यज्ञराज बोहराले बताए । सहायताकक्षको प्रभावकारितालाई हेरेर यसलाई वर्षभरि सञ्चालन गर्ने योजना समेत रहेको उनले बताए ।

दसैँ, तिहार तथा छठ पर्वलाई लक्षित गर्दै कैलालीको गौरीफन्टा नाकामा नेपाल प्रहरी, सशस्त्र प्रहरी बल नेपाल र भारतीय सीमा सुरक्षा बल (एसएसबी)ले संयुक्त रूपमा गौरीफन्टा नाकामा सहायता कक्ष स्थापना गरेका छन् ।

प्रकाशित मिति: सोमबार, असोज १३, २०७६ १२:४२