आन्दोलनमा 'सेटब्याक' भएपछि 'सेफ ल्यान्डिङ' खोज्दै प्रसाईं

A+ A A-

सत्तालाई नै चुनौती दिने गरी आन्दोलन गर्ने भन्दै देशभरिबाट मानिसहरू काठमाडौं उतारेका दुर्गा प्रसाईंको आन्दोलन यत्तिकै सकिने भएको छ ।

आन्दाेलनकाे दोस्रो दिन शुक्रबार प्रहरीले प्रसाईंलाई सुरक्षाका लागि प्रहरीले घरबाट बाहिर निस्किन दिएकाे छैन । प्रसाईंले पत्रकार सम्मेलन गरी आफू नजरबन्द परेकाे बताएका छन् । बाहिर सरकारले यस्तो गर्‍याे उस्तो गर्‍याे भन्दै हल्ला गरिरहेका प्रसाईं आन्तरिक रुपमा भने आन्दोलनमा ल्याएका मानिसलाई कसरी घर फर्काउने भन्ने चिन्तामा रहेकाे बताइएकाे छ । प्रसाईंनिकट स्रोतका अनुसार प्रसाईंले ९ गतेलाई दुई घण्टाका लागि भए पनि काठमाडौंको तीनकुनेमा सभा गर्न दिएमा आन्दोलनमा आएका मानिसलाई योपटक घर पठाउन सजिलो हुने थियो भन्दै प्रशासनमा हारगुहार गर्न थालेका छन् ।

७ गते प्रसाईंलाई प्रदर्शन गर्न सरकारले बल्खुमा ठाउँ छुट्याएको थियो । ७ गते ११ बजेदेखि साँझसम्म आन्दोलन गरेका थिए । ८ गते प्रशासनसँग अनुमति नै नमागेर तीनकुनेमा प्रदर्शन गर्ने तयारी गरेका थिए । तर, प्रशासनले बिनाअनुमति आन्दोलन गर्न नदिएपछि प्रसाईं भक्तपुर घरमै छन् । तर, उनका समर्थक भने प्रसाईंले भनेकै आधारमा तीनकुनेमा जम्मा भएका थिए । प्रशासनले उनीहरूलाई पक्राउ गरेको छ ।

९ गतेलाई प्रशासनले सभा गर्नका लागि तीनकुनेमा २ घण्टाको समय दिएमा आफ्नो नेतृत्वको आन्दोलनमा सहभागी भएकाहरूलाई आफूले सम्बोधन गरेर घर पठाउन सहज हुने भन्दै सत्तापक्षका नेताहरूसँग हारगुहार गरिरहेकाे एक नेताले बताए । ती एक नेताले भने, ‘भोलिलाई दुई/तीन घण्टाका लागि तीनकुनेमा सभा गर्न दिएमा शान्तिपूर्ण रूपमा सभा गर्थें । आएका मानिसहरूलाई घर फर्काउन सहज हुन्थ्यो भन्दै फोन गराइराख्नुभएको छ । हामीले कुनै प्रतिक्रिया दिएका छैनौँं । उनले अन्दोलन गर्न प्रदर्शन गर्न प्रशासनसँग अनुमति माग्ने हो । नेताहरूसँग होइन ।’

प्रसाईंले आन्दोलनमा आएकाहरूलाई घर पठाउनै समस्या परेको बताइन्छ । आन्दोलनबाटै राजा ल्याउने, हिन्दु राज्य घोषणा गर्ने, २० लाखसम्म ऋण मिनाहा गराउन निरन्तर आन्दोलन गर्ने भन्दै उनले सर्वसाधारणलाई आन्दोलनमा सहभागी गराएका थिए । तर, उनको आन्दोलन एक दिन मात्र भयो । आफ्नो भाषण सकेसँगै मासलाई उत्तेजित बनाएर झडपमा उतारेका थिए उनले ।

उनले बैंक, लघुवित्त र सहकारीका ऋणीहरूलाई २० लाखसम्म ऋण मिनाहा गराउने आन्दोलन हो भनेर देशभरिबाट काठमाडौं ल्याएका थिए । तर, हिजाे सम्बोधनमा राजा ल्याउने कुरा प्रमुख बनाएपछि ऋण मिनाहा हुने आसमा आएका सहभागीहरू अहिले प्रसाईंलाई नै के गरौँ कसो गरौँ भएका छन् ।

प्रशासनबाट एक दिनका लागि अनुमति लिएर आन्दोलन गरेका थिए । तर, उनले आन्दोलनकारीसँग भने तीन दिनसम्म काठमाडौंमा आन्दोलन गर्ने आश्वासन दिएका थिए ।

प्रशासनले एक दिन मात्र प्रदर्शन गर्ने अनुमति दिएकाले त्यसपछि उनले प्रशासनसँग कुनै समन्वय नगरेको काठमाडौंका सहायक प्रमुख जिल्ला अधिकारी रवीन्द्रप्रसाद आचार्य बताउँछन् । उनले भने, ‘उहाँहरू पहिला प्रक्रियागत रूपमा आउनुभयो । बल्खुमा शान्ति सुरक्षासहित स्थान तोकेर दिएका हौँ । प्रदर्शन सकिएपछि उहाँहरू दोस्रो दिन अथवा अरु दिन पनि प्रदर्शन गर्छाैं भनेर प्रशासनमा आउनुभएको छैन । उहाँहरूले तीनकुनेमा आन्दोलन गर्छौं भन्ने पत्रकार सम्मेलनमा भनेको सुनेर अनुमति नमागेकाले प्रदर्शन गर्न पाइँदैन भनेर विज्ञप्तिमार्फत जानकारी गराएका हौँ । भोलिका लागि स्थान चाहिएको भए प्रशासनमा आउनुपर्थ्याे, तर आउनुभएको छैन । आए सरसल्लाह गरेर स्थान दिन सकिन्छ ।’

उता प्रसाईंले आफूलाई नजरबन्द गरेको भन्दै अदालतमा बन्दी प्रत्यक्षीकरणको निवेदन दिएका छन् । तर, गृहमन्त्रीका प्रेस सल्लाहकार कमल गिरीले प्रसाईंलाई नजरबन्द नगरेको जानकारी दिए । उनले भने, ‘दुर्गाजीलाई नजरबन्द गरेको छैन । उहाँ आफैँले हल्ला गर्नुभएको हो । उहाँको सुरक्षाका लागि स्थानीय प्रशासनले प्रहरी खटाएको होला । उहाँलाई नजरबन्द गर्नुपर्ने केही कारण नै छैन ।’

प्रकाशित मिति: शुक्रबार, मंसिर ८, २०८० १६:१०