बुद्ध एयरका सञ्चालक दाजु वीरेन्द्र र भाइ शिवेन्द्रकाे शेयर विवादको नालीबेली

बुद्ध एयरका सञ्चालक दाजु वीरेन्द्र र भाइ शिवेन्द्रकाे शेयर विवादको नालीबेली

A+ A A-

नेपालको उड्डयन क्षेत्रमा सफलताको पहिचान बनाएको बुद्ध एयरमा सम्पत्तिको झगडा सल्टिनेभन्दा बल्झिनेतिर लागेको छ । बुद्ध एयरका कार्यकारी अध्यक्ष वीरेन्द्रबहादुर बस्नेत र भाइ शिवेन्द्रबहादुर बस्नेतबीच बढेको शेयर विवाद अदालसम्म पुगिसकेको छ । उनीहरूबीच बढ्दो दुस्मनीपूर्ण सम्बन्धका कारण अध्यक्ष वीरेन्द्रबहादुर बस्नेतले भाइ शिवेन्द्र बस्नेतलाई कार्यालयमा प्रवेश गर्नसमेत रोक लगाएका छन् ।

२०७९ पछि बुद्ध एयरको ४० प्रतिशत शेयरको हिस्सेदार रहेका शिवेन्द्रलाई दाजु वीरेन्द्रले साधारणसभा त परको कुरा, कार्यालय प्रवेशमै रोक लगाएपछि विवादले उग्र रूप लिन थालेको छ । तिहारअघि बुद्ध एयर कम्पनीको कार्यालय गएका शिवेन्द्रलाई कार्यकारी अध्यक्षको निर्देशनमा सुरक्षागार्डले प्रवेश गर्न रोकेको थियो । त्यसलगत्तै भाइ शिवेन्द्रले जिल्ला प्रशासन कार्यालय ललितपुरले सहज वातावरण बनाइदिन जिल्ला प्रहरीलाई पत्र लेखेको छ । ५ कात्तिक २०८० मा जिल्ला प्रशासन कार्यालयले प्रहरीलाई लेखेको पत्रमा भनिएको छ, ‘दुवै पक्षको शेयर स्वामित्व देखिएको कम्पनी रजिस्ट्रारको अभिलेखसमेतका आधारमा शान्ति सुरक्षामा खलल नपुग्ने गरी सहज पहुँचको व्यवस्था मिलाउने ।’

शिवेन्द्रले बुद्ध एयरको आम्दानी दाजु वीरेन्द्र बस्नेतले अनधिकृत रूपमा प्रयोग गरेको मात्र आरोप लगाएका छैनन्, कम्पनीलाई धरासायी बनाउने खेलमा पनि लागेको बताउने गरेका छन् । ४० प्रतिशत शेयर भएको परिवारलाई जानकारी नै नदिई साधारणसभा गर्ने, सञ्चालक समितिले विभिन्न निर्णय गर्ने गरेको आरोप लगाइरहेका छन् । त्यसैले, पछिल्ला दिनमा शिवेन्द्रले बुद्ध एयरमा लगानी गरेका बैंकलाई पनि सन्देश दिइरहेका छन् । उनले बुद्ध एयरको ४० प्रतिशत शेयर भएको परिवारलाई जानकारी नै नदिई ऋण लिएकाले भोलिका दिनमा बैंकले कम्पनीबाट रकम असुल गर्नुपर्ने भए ४० प्रतिशतको हिस्साबाट असुल गर्न नपाउने भनिरहेका छन् ।

विभिन्न बैंकबाट बुद्ध एयरले करिब ४ अर्ब ऋण लिएको बताइएको छ । शिलापत्रको सम्पर्कमा आएका शिवेन्द्रले जहाज खरिद गर्दा होस् वा अन्य निर्णय लिँदा तथा अन्य आर्थिक कारोबारमा आफूलाई संलग्न नगराइएको दाबीसमेत गरेका छन् ।

बुद्ध एयरको सञ्चालक समितिको बोर्डमा ४० प्रतिशत शेयर रहेको शिवेन्द्र परिवारको प्रतिनिधित्व छैन । ३ जनाको बोर्ड हुने व्यवस्था भए पनि अहिले दुई जना वीरेन्द्र बस्नेत र सुनिता बस्नेतले बोर्ड बैठकमा निर्णय गर्दै आएका छन् । शिवेन्द्रले बुद्ध एयरको पैसाबाट रामेछापको मन्थलीमा खरिद गरेको १५ रोपनी र पोखरामा खरिद गरेको ४ रोपनी जग्गा वीरेन्द्र बस्नेतले श्रीमती सुनिता बस्नेतको नाममा पास गरेको दाबी गरेका छन् । बुद्ध एयरले खरिद गर्ने स्पेयर पार्ट्सको सन्दर्भमा पनि पारिवारिक मिलेमतोमा कमिसनको ठूलो खेल भइरहेको आरोप लगाइन्छ ।

बुद्ध एयरले वर्षमा करिब ३ अर्ब रुपैयाँबराबरको स्पेयर पार्ट्स खरिद गर्ने गरेको छ । तर, उसले विदेशी कम्पनीबाट प्रत्यक्ष खरिद नगरी नेपालकै आफन्तको कम्पनीबाट खरिद गरी करोडौँ कमिसन लिने गरेको आरोप छ । त्यसो त, ५० करोड लगानीमा सुरु भएको वीरेन्द्र बस्नेतको आरजु राइस मिलमा बुद्ध एयरका इन्जिनियरसमेत रहेको भन्दै शिवेन्द्रले त्यसमा पनि प्रश्न उठाएका छन् ।

तर, शिवेन्द्रले बुद्ध एयरको साखलाई कमजोर बनाउन भने आफू नलाग्ने दाबी गरे । शिलापत्रसँग शिवेन्द्रले भने, ‘अहिले बजारमा बुद्ध एयर ठूलो संस्था हो, कतै दाजुभाइको झगडाले कोल्याप्स होला कि भन्ने चासो छ, वीरेन्द्र बस्नेतको नाजायज गतिविधिलाई चेक एण्ड ब्यालेन्स गर्न खोजेको हो । नाजायज पैसा असुल गरिरहेका छन्, त्यसलाई नियन्त्रण गर्न खोजेको हो, बुद्ध एयरलाई कमजोर हुन दिने छैन ।’

झगडाको बिउ

१४ साउन २०७५ मा सुरेन्द्रबहादुर बस्नेतले हालैको बकसमार्फत १३ प्रतिशत शेयर र २५ फागुन २०७९ मा शेषपछिको बकसमार्फत ३५ प्रतिशत अनुपातको शेयर प्राप्त गरी शिवेन्द्रबहादुर बस्नेतको परिवार ३५ प्रतिशतको शेयर धनी भएको दाबी गरिएको छ । शिवेन्द्रको परिवारले बुद्ध एयर र कार्यकारी अध्यक्ष वीरेन्द्रबहादु बस्नेतविरुद्ध ७ साउन २०८० मा दर्ता भएको मुद्दामा कम्पनीको नियन्त्रण भने वीरेन्द्रबहादुर बस्नेत, उनकी श्रीमती सुनिता बस्नेत र छोरीहरू आरजु बस्नेत र आस्था बस्नेत समूहको छ ।

६० प्रतिशत शेयर सदस्य रहेका उनीहरूमध्ये वीरेन्द्र र सुनिता दुई जना सञ्चालक समिति सदस्य रहेका छन् । भाइ शिवेन्द्रको दाबीमा बाबु सुरेन्द्र बस्नेत स्वास्थ्यका कारण ४/५ वर्ष कम्पनीको काममा सक्रिय हुन सकेनन् र दाजु वीरेन्द्र बस्नेतले एकलौटी सञ्चालन गरे । त्यही समयदेखि केही शेयरधनीको एकलौटी नियन्त्रणमा रहेकाले कम्पनी के कसो भएको छ भन्नेबारेमा अल्पमतका शेयरधनीलाई थाहा नदिएको दाबी गरिएको छ । भाइ शिवेन्द्रको दाबीमा साधारणसभाको निमन्त्रणासमेत दिने गरेका छैनन् ।

१० पुस २०७९ मा वीरेन्द्रबहादुर र शिवेन्द्रका बाबु सुरेन्द्र बस्नेतको निधन भयो । त्यही समयदेखि शेयर विवाद हुन थालेको देखिन्छ । शेयर पाएपछि शिवेन्द्रको परिवारले बुद्ध एयरको विषयमा जानकारी लिन खोजेको थियो । त्यस क्रममा कम्पनी नियन्त्रणमा रहेको समूहसँग पटकपटक भेटघाट गरी कम्पनीको विषयमा कुराकानी गरेको दाबी गरिएको छ । त्यस क्रममा दाजु वीरेन्द्रले ‘हामी जेजसरी चलाउँछौँ, त्यसरी नै चल्ने हो, तपाईंहरू चुपचाप जे दिन्छौँ त्यही लिनुहोस्, होइन भने विभिन्न कानुनी तथा प्राविधिक कारण देखाई लाभांश रोक्नेदेखि लिएर लाखौँको झमेला खेप्नुपर्ला’ भनेर धम्की दिएको शिवेन्द्रको दाबी छ ।

उनीहरूले बाबु सुरेन्द्र बस्नेतबाट प्राप्त गरेको सम्पत्तिसम्बन्धी अधिकरबाट वञ्चित गराउने प्रयास भएको आरोप वीरेन्द्रमाथि लगाएका छन् । शिवेन्द्र परिवारले रिटमा उल्लेख गरेको छ, ‘कम्पनीको प्रशासन एवं सञ्चालक कम्पनीले दिने हवाई उड्डयन सेवाको गुणस्तर र सुरक्षाको उच्चतम मानक पूरा हुनुपर्ने, न्याय र कानुनसम्मत, नैतिकतापूर्ण र शेयरधनीको लाभको रक्षा हुने गरी हुनुपर्ने, कानुनविपरीतका कम्पनीसम्बन्धी नीति र अन्य कागजात सो हदसम्म अमान्य वा रद्द हुने र कम्पनीमा हामीलाई हाम्रो हजुरबुबा ससुराले सबैलाई भाग लगाइदिनुभएको शेयरबमोजिमको अधिकार कानुनबमोजिम उपभोग गर्न पाउनुपर्ने र सोसम्बन्धी सबै जानकारी र कानुनबमोजिमको पहुँच प्रदान गर्न आग्रह गरेका थियौँ ।’

तर, उक्त मागको सुनवाइको सट्टा दमनकारी नीति लिएको शिवेन्द्र परिवारको दाबी छ । कम्पनीसँग त्यसरी सूचना माग्दा नदिएपछि शिवेन्द्रको परिवारले २४ वैशाख २०८० मा कम्पनी रजिस्ट्रारको कार्यालयबाट बुद्ध एयरसँग सम्बन्धित केही कागजात माग गरेका थिए । उनीहरूले कम्पनीले कम्पनी रजिस्ट्रार कार्यालयमा पेस गरेको कागजात पाऊँ भनी निवेदन दिएका थिए । बुद्ध एयरले नै अपुग कागजात पेस गरेको भन्दै केही सीमित कागजात प्राप्त गरेको भए पनि अधिकांश कागजात उपलब्ध नभएको दाबी गरेका छन् ।

रिट निवेदनमा उल्लेख भएअनुसार, कम्पनीले रजिस्ट्रार कार्यालयमा बुझाएको कागजातमा आर्थिक वर्ष २०७५/७६ को वार्षिक साधारणसभाको माइन्युटमा ९ करोड ८५ लाख ७२ हजार ४ सयमा लाग्ने लाभांश कर कट्टी गरी शेयरधनीहरूलाई लाभांश वितरण गरेको भनी उल्लेख छ । सोही आर्थिक वर्षको प्रोफिट एण्ड लस अकाउन्टमा पनि ९ करोड ८५ लाख ७२ हजार ४ सय लाभांश वितरण गरेको भनी उल्लेख छ ।

त्यसैगरी, कम्पनीले कम्पनी रजिस्ट्रार कार्यालयमा दाखिला गरेको आर्थिक वर्ष २०७८/७९ को वार्षिक साधारणसभाको माइन्युटमा १० करोड रकम लाभांश वितरण गर्ने भनी निर्णय भएको देखिन्छ । अहिले उच्च अदालत पाटन र ललितपुर जिल्ला अदालतमा दाजुभाइ वीरेन्द्र बस्नेत र शिवेन्द्र बस्नेतबीच बुद्ध एयरको सम्पत्तिसम्बन्धी मुद्दा चलिरहेको छ । शिवेन्द्रको दाबीमा दाजु वीरेन्द्रले मुद्दा लम्ब्याउने र पेसी सार्ने काम गरिरहेका छन् ।

शिखर इन्स्योरेन्सको ४ करोडमा एकलौटी

४ फागुन २०७८ मा बुद्ध एयरका सञ्चालक तथा ८० प्रतिशत शेयरधनी रहेका सुरेन्द्रबहादुर बस्नेतले २० प्रतिशत शेयर रहेका वीरेन्द्रबहादुर बस्नेतसमेतको सहमतिमा भाइ शिवेन्द्रबहादुर बस्नेतकी श्रीमती अर्चना बस्नेत, छोरी शिवानी बस्नेत र छोरा आदर्शबहादुर बस्नेतको नाममा शेयर हक हस्तान्तरणसम्बन्धी सम्झौता भएको थियो । त्यस दिन भएको सम्झौताअनुसार सुरेन्द्रबहादुर बस्नेतले आफ्नो नाममा भएको ८० प्रतिशत शेयर वीरेन्द्र बस्नेत र शिवेन्द्रका परिवारलाई ४०/४० प्रतिशतको दरमा भाग लगाइदिएका थिए ।

साथै, बुद्ध एयरले शिखर इन्स्योरेन्स कम्पनीका शेयरधनीको हैसियतले शिखर इन्स्योरेन्स कम्पनीकै ४२३६५० कित्ता हकप्रद शेयर खरिद गर्ने अधिकार प्राप्त भएको थियो । उक्त सम्झौतामा वीरेन्द्रबहादुर बस्नेतले बुद्ध एयर प्रालिले खरिद गर्न पाउने सम्पूर्ण हकप्रद शेयर बुद्ध एयर प्रालिबाटै ४ करोड २३ लाख ६५ हजार रुपैयाँ एड्भान्स रूपमा उपयोग गरी खरिद गर्ने र खरिद गरिएको १५ दिनभित्र उक्त शेयर ३५ प्रतिशत शिवेन्द्र बस्नेतको परिवारको नाममा बिक्री गर्ने सहमति भएको थियो । उक्त सम्झौताअनुसार वीरेन्द्र बस्नेतले शिखर इन्स्योरेन्सबाट हकप्रद शेयर खरिद गरिसकेका छन् तर सम्झौताअनुसार खरिद गरेको झण्डै दुई वर्ष बितिसक्दा पनि शेयर नदिएको शिवेन्द्र बस्नेत परिवारको दाबी छ ।

सम्झौताअनुसार १५ दिनमा खरिद गरेको ३५ प्रतिशत शेयर आफूहरूको नाममा दुई वर्षसम्म नदिएपछि मुद्दा दायर गरेको शिवेन्द्र परिवारको दाबी छ । त्यसो त, सम्झौतामा ३५ प्रतिशत शेयर शिवेन्द्रको परिवार अर्थात् अर्चना बस्नेत, शिवानी बस्नेत, आदर्श बस्नेत र स्वर्गीय सुरेन्द्रबहादुर बस्नेतको हकमा बुद्ध एयर प्रालिले निजहरूलाई वितरण गर्ने लाभांशबाट कट्टा गरिने उल्लेख छ । ४ फागुन २०७८ को सम्झौताअनुसार वीरेन्द्रबहादुर बस्नेत, उनकी श्रीमती सुनिता बस्नेत, छोरीहरू आस्था बस्नेत र आरजु बस्नेत बुद्ध एयरको ६० प्रतिशत शेयरको शेयरधनी रहेका छन् ।

तर, शिवेन्द्र बस्नेतको परिवारको दाबीमा चाहिँ वीरेन्द्र बस्नेत परिवारले लामो समय व्यतित गराई शेयर जारी गराएका छैनन् । शिवेन्द्र पक्षले पाटन उच्च अदालतमा दायर गरेको मुद्दामा भनिएको छ, ‘विपक्षी वीरेन्द्रबहादुर बस्नेतले यति लामो समय व्यतित गराई हामी फिरादीको नाममा जारी गर्नुपर्ने शेयरसमेत जारी गरिदिनुभएको छैन । साथै, उक्त शिखर इन्स्योरेन्स कम्पनीको शेयरमा प्राप्त हुने लाभांश, हकप्रद शेयर एवं अन्य सुविधामा समेत कानुन एवं करारविपरीत कब्जा गरिराख्नुभएको छ ।’ त्यसैकारण, शिवेन्द्रको परिवारले सम्झौताअनुसार विपक्षीले हस्तान्तरण गर्नुपर्ने रकम हस्तान्तरण नगरी करारबमोजिमको दायित्व पूरा नगरी मुलुकी देवानी संहिताको दफा ५३५ बमोजिम करारको उल्लंघन गरेको दाबी गरेर मुद्दा दायर गरेको छ । शिवेन्द्रको परिवारले २४ साउन २०८० मा शिखर इन्स्योरेन्ससँग जोडिएको शेयर विवादको मुद्दा दर्ता गरेका हुन् ।

तर, वीरेन्द्र बस्नेत पक्षले यो मुद्दामा २ असोज २०८० मा प्रतिउत्तर पठाएको छ । उक्त प्रतिउत्तरमा वीरेन्द्र बस्नेत पक्षले शिखर इन्स्योरेन्स कम्पनीको शेयरको विषयमा भएको सम्झौता सक्कल प्रति हराएको दाबी गरेको छ । जवाफमा वीरेन्द्र बस्नेतले भनेका छन्, ‘उक्त शेयरहरू बुद्ध एयर प्रालिका शेयरधनीहरूको नाउँमा खरिद गर्दा बढी लाभकारी हुने तथ्य सबै शेयरधनीको मौखिक छलफलबाट निष्कर्ष निकालिएअनुसार मिति २०७८/११/०१ मा बसेको म वीरेन्द्रबहादुर बस्नेतको एकल उपस्थितिको सञ्चालक समितिको निर्णयबाट शेयरमाथिको अधिकार बुद्ध एयर प्रालिले परित्याग गरी सो प्रमोटर तथा पब्लिक राइट शेयर ४२३६५० कित्ता शेयरहरू म वीरेन्द्रबहादुर बस्नेतको नाउँमा खरिद गर्ने निर्णय भएको थियो ।’

शिवेन्द्रको काउन्टरमा वीरेन्द्र

बुद्ध एयरका कार्यकारी अध्यक्ष वीरेन्द्रबहादुर बस्नेतले भाइ शिवेन्द्रबहादुर बस्नेत र उनको परिवारले दाबी गरेको शेयर विवादमा काउन्टर रणनीति लिएका छन् । शिवेन्द्रबहादुर बस्नेतले वारेसनामा लिएर ४० प्रतिशत शेयरको हिसाबकिताब खोजेका छन् । बुद्ध एयर कार्यालयले हिसाबकिताब नदिएपछि शिवेन्द्र मुद्दामामिलामा गएका हुन् । शिवेन्द्रले दाजु वीरेन्द्र बस्नेतविरुद्ध पाटन उच्च अदालतमा मुद्दा दर्ता गरेका छन् । अनि, बुद्ध एयरको शेयर रहेको शिखर इन्स्योरेन्सको हकप्रद शेयर विवादमा पनि मुद्दा दायर गरेका छन् । त्यसको काउन्टरमा कार्यकारी अध्यक्षसमेत रहेका वीरेन्द्र बस्नेतले मुद्दा नै खारेजी हुनुपर्ने दाबी गर्दै अदालत पुगेका छन् । शिवेन्द्रको मुद्दाको तारेख बुझेका वीरेन्द्रले उक्त मुद्दाको प्रतिवादमा ललितपुर जिल्ला अदालतमा शिवेन्द्रविरुद्ध मुद्दा दर्ता गरेका छन् । तर, शिवेन्द्रको मुद्दाको दर्ताको प्रक्रिया नै गलत भएको भएकाले खारेजीको माग गरेका छन् ।

२३ माघ २०७९ मा शेयर दर्ता किताबअनुसार अर्चना बस्नेत, शिवानी बस्नेत र आदर्शबहादुर बस्नेत शेयरधनी कायम भएका छन् । कार्यकारी अध्यक्ष रहेका वीरेन्द्रबहादुर बस्नेतले दाबी गरेअनुसार नै पनि २३ माघको शेयर दर्ता किताबमा नयाँ शेयरधनी कायम भएपछि २२ फागुन २०७९ को सञ्चालक लगतअनुसार आफू सञ्चालक समितिको कार्यकारी अध्यक्ष भएका हुन् ।

उच्च अदालत पाटनमा २९ असार २०७९ मा मुद्दा नम्बर ०७९–ँव्–०१८० को कम्पनी ऐनको दफा १६०, दफा १६१ र दफा १६२ बमोजिम सजाय गरी पाऊँ भनेर दफा १६३ अनुसार शिवेन्द्रबहादुर बस्नेतले मुद्दा दायर गरेका थिए । अर्चना, शिवानी र आदर्शबहादुरको वारेस मुकरर गरी शिवेन्द्रबहादुर बस्नेतले पाटन उच्च अदालतमा मुद्दा दायर गरेका हुन् । उक्त मुद्दाको तामेल भने वीरेन्द्रले ४ भदौ २०८० मा बुझेका हुन् ।

वीरेन्द्रबहादुर बस्नेतले १० असोज २०८० मा ललितपुर जिल्ला अदालतमा दायर रिटमा अर्चना बस्नेत, शिवानी बस्नेत र आदर्शबहादुर बस्नेत शेयरधनी भएको स्वीकार गरेका छन् । तर, उनीहरूले वारेस दिएका शिवेन्द्रबहादुर बस्नेतले शेयर विवादमा प्रवेश गर्न नमिल्ने जिकिर गरेका छन् ।

खासमा शिवेन्द्र अमेरिकी नागरिक भएको वीरेन्द्र बस्नेतको दाबी देखिन्छ र विदेशी नागरिकले मुद्दामा वारेस लिन नमिल्ने दाबी मात्र गरेका छैनन्, वारेसनामालाई बदर गराई दिन माग पनि गरेका छन् । वीरेन्द्रले त्यसको आधार भने सर्वोच्च अदालतले विशेष इजलासको एक फैसलालाई मानेका छन् । नेपाल कानुन पत्रिका २०३० अंक १ नि. नं. ७७४ को मुद्दामा विशेष इजलासले भनेको छ, ‘वारेस हुन अयोग्य व्यक्तिको वारेसको रूपमा उपस्थित हुँदैमा सो वारेस राख्ने पक्षको प्रतिनिधित्व भएको भन्न मिल्दैन ।’

यही सिद्धान्तलाई टेकेर वीरेन्द्रले भाइ शिवेन्द्र अमेरिकी नागरिक भइसकेका कारण बुद्ध एयरका शेयरधनी अर्चना, शिवानी र आदर्शबहादुर बस्नेतको वारेस बस्न नमिल्ने बताएका छन् । स्मरणीयचाहिँ वीरेन्द्र बस्नेतले मुद्दा दायर गर्दा तटस्थ बसेकी दिव्यानीले पनि अहिले शिवेन्द्रलाई मञ्जुरीनामा दिइसकेकी छिन् ।

यद्यपि, वीरेन्द्रबहादुर बस्नेतले शेयरधनी शिवानी बस्नेत पनि अमेरिकी नागरिक भएको दाबी गरेका छन् । वीरेन्द्रले अदालतमा दर्ता गरेको रिटमा शिवानी नेपाली मूलकी विदेशी नागरिक भएको भन्दै पासपोर्ट नम्बर ६८९३६०४७८ रहेको उल्लेख गरेका छन् । अर्थात्, शेयरधनी शिवानी र वारेस लिएका शिवानीका बाबु शिवेन्द्र पनि अमेरिकी नागरिक भएका कारणले मुद्दा रद्द हुनुपर्ने दाबी गरिएको छ । शिवेन्द्रले भने ललितपुर जिल्लाबाट गैरआवासीय नागरिकता लिइसकेका छन् । राजनीतिक अधिकारबाहेकका अधिकार उपयोग गर्न पाउने गरी सरकारले गैरआवासीय नागरिकता दिन थालेपछि ललितपुर जिल्लाबाट पहिलो नागरिकता लिने व्यक्ति शिवेन्द्र नै हुन् ।

उनले २ असार २०४४ मा ललितपुरबाट नै नेपाली नागरिकता लिएका थिए भने ११ मंसिर २०७९ मा गैरआवासीय नेपाली परिचयपत्र लिएका थिए । हुन त, तीन जना शेयरधनीले शिवेन्द्रको सट्टा दिपेन्द्र खड्कालाई वारेसानामा सारेको पनि देखिन्छ । ७ साउन २०८० मा शिवेन्द्रबहादुर बस्नेतको सट्टामा दिपेन्द्र खड्कालाई वारेस तोकिएको देखिन्छ । त्यसमा पनि वीरेन्द्र बस्नेतले प्रश्न उठाएका छन् । मुद्दा दर्ता गर्दाताका कायम रहेको वारेसनामा नै गैरकानुनी रहेकाले सच्याउन उनीहरूले खड्कालाई ल्याएकाले उक्त प्रक्रिया पनि गलत भएको वीरेन्द्र बस्नेतको दाबी छ । उनले मुद्दा दर्ता भएपछि सच्याउन सकिँदैन भन्ने आधारमा टेक्ने प्रयास गरेका छन् ।

शिवेन्द्रबहादुर बस्नेतले २२ साउन २०८० मा ललितपुर जिल्ला अदालतमा करारको यथावत् परिपालना गराई पाऊँ भनेर मुद्दा दायर गरेका छन् । उक्त मुद्दाको म्याद वीरेन्द्र बस्नेतले ३० साउन २०८० मा बुझेका छन् । ४ फागुन २०७८ मा भएको शेयर लगानीसम्बन्धी सम्झौताबमोजिम लगानी गरिएको रकमलाई लुकाएकाले यथार्थ विवरण प्राप्त गर्नका लागि भन्दै शिवेन्द्रले मुद्दा दायर गरेका हुन् ।

आर्थिक वर्ष २०७८/७९ को लाभांश रकमबाट प्राप्त हुने रकम शिखर इन्स्योरेन्स कम्पनीमा लगानी भएको शिवेन्द्रको दाबी छ । त्यसको पनि हिसाबकिताब पारदर्शी होस् भन्दै शिवेन्द्रले ललितपुर जिल्ला अदालतमा मुद्दा दायर गरेका छन् । यो मुद्दामा शेयरमाथिको अधिकारमा प्रतिकूल असर पर्न सक्ने भएकाले अदालतको फैसला अन्तिम नभएसम्मका लागि मुलुकी देवानी कार्यविधि संहिता २०७४ को दफा २०१ अनुसार प्रस्तुत मुद्दा मुल्तबी राखिपाऊँ भनेर वीरेन्द्र बस्नेत पक्षले अदालतमा जवाफ पठाएको छ ।

प्रकाशित मिति: शुक्रबार, मंसिर ८, २०८० १६:३१