दलहरूसँग किन आक्रोशित छन् दुर्गा प्रसाईं ? (भिडियो)

A+ A A-

भैँसी पालनदेखि जग्गा कारोबारीहुँदै मेडिकल व्यवसायी बनेका झापाका दुर्गा प्रसाईं यतिबेला व्यवस्था परिवर्तन गर्ने हाँक दिएर आन्दोलनमा छन् । कहिले टिकटकमा रमाइरहेकी युवतीको भिडियोमा देखिएर त कहिले प्रचण्ड र केपी ओलीलाई मार्सी चामलको भात खुवाएर उनले मनग्य चर्चा पाए र विवादमा पनि आए । नेताहरू र व्यवस्थाविरुद्धको चर्को आवाज तथा युट्युबका सस्ता कन्टेन्टले प्रसाईंलाई इन्टरनेटको दुनियाँमार्फत छिट्टै फैलायो ।

तर, ओली र प्रचण्डलाई मार्सी चामलको भात खुवाएको चाहिँ चर्चा पाउन नभई आफूले खोलेको बीएन्डसी मेडिकल कलेजलाई सम्बन्धन दिलाउन थियो । कहिले माओवादी र कहिले एमाले हुँदा पनि आफ्नो मेडिकल कलेजलाई सम्बन्धन दिलाउन असफल भएपछि उनी पछिल्लो समयमा राजावादी बनेका हुन् । झापाको बिर्तामोडमा प्रसाईंले अर्बौं लगानी गरेर अस्पताल र मेडिकल कलेज खोलेका छन् ।

उनको योजनाअनुसार काम भएको भए यतिबेला बीएन्डसी अस्पतालमा चिकित्साशास्त्र अध्यापन भइरहेको हुने थियो । आफ्नो मेडिकल कलेजलाई सम्बन्धन दिलाउन उनले शीर्ष नेताहरूको भेटघाट गराउनेदेखि उनीहरूको घरैमा गएर बिन्ती बिसाए । तर, सफलता पाएनन् । यसबाट आक्रोशित भएका र विरक्तिएका प्रसाईं ‘राष्ट्र, राष्ट्रियता, धर्मसंस्कृति र नागरिक बचाऊ महाअभियान’ को नामबाट आन्दोलनमा छन् ।

तेह्रथुमबाट झापा झरेको प्रसाईंंको परिवार सामान्य आर्थिक अवस्थाको थियो । प्रसाईंले ८ कक्षासम्मको औपचारिक शिक्षा लिए । कलिलै उमेरमा विवाह गरेका प्रसाईंले केही समय ग्रिलमा काम पनि गरे । तर, आर्थिक उपार्जनमा प्रगति नभएपछि युरोप छिरे । युरोपमा भैँसी फार्ममा काम गरेका उनले नेपाल फर्किएर यही व्यवसाय सुरु गरे । केही समय दूध र भैँसीसमेत बेच्ने उनको व्यवसाय राम्रै चल्यो । तर, त्यसपछि व्यवसाय डुब्यो । प्रसाईं २०५७ सालपछि माओवादीमा लागे । भूमिगतकालमै केही माओवादी नेतासँग राम्रो सम्बन्ध बनाएका उनी २०६२-६३ पछि उनले जग्गाको कारोबार गरे र राम्रै पैसा आम्दानी गरे ।

भक्तपुरको आलिसान महल उनले त्यसैबेला बनाएका हुन् । प्रचण्ड र केपी ओलीले प्रसाईंसँग उनकै घरमा २०७४ सालमा मार्सी भात खाएका थिए । बिर्तामोडको जग्गा बैंकमा राखेर उनले बीएन्डसी अस्पताल बनाए । उनका अनुसार बीएन्डसीले २०६८ माघ २४ गते मेडिकल कलेज स्थापनाका लागि आशयपत्र पायो । २०७३ सालमा यो अस्पतालले ३ सय शय्याको अस्पताल सञ्चालनको स्वीकृति पायो ।

२०७१ मंसिर १७ गते तत्कालीन विज्ञान, प्रविधि तथा वातावरण मन्त्रालयबाट ९०० शय्याको मेडिकल कलेज सञ्चालनका लागि वातावरणीय प्रभाव मूल्यांकन स्वीकृत भयो । तर, डा.गोविन्द केसीको चिकित्सा सुधार अभियान अनुसार आएको चिकित्सा शिक्षा ऐनका कारण उनको योजना रोकियो ।

२०७६ सालमा चिकित्सा आयोगमा बीएन्डसीको सम्बन्धनका लागि पुगे पनि २०७३ सालदेखि आशयपत्र नवीकरण नगरेको र काठमाडौं विश्वविद्यालयको सहमति नलिएको भन्दै आयोगले सम्बन्धन दिएन । प्रसाईं सर्वोच्च गए । तर, सर्वोच्चले पनि तीन महिनाभित्र नवीकरण गर्नुपर्ने आशयपत्र नवीकरण नगरेकाले स्वतः रद्द भएको फैसला सुनाएपछि प्रसाईंलाई अर्को धक्का लाग्यो । २०७५ सालमा एमाले र माओवादी एकता भएपछि प्रसाईं ओलीसँग निकट भए । कारण थियो, ओली दुई पार्टी मिलेर बनेको नेकपाको पहिलो अध्यक्ष र शक्तिशाली प्रधानमन्त्री थिए ।

ओलीले नै उनलाई राजनीतिक रूपमा स्थापित गरे । माओवादीमा लामो समयसम्म कुनै ठूलो जिम्मेवारी नपाएका प्रसाईंंलाई नेकपा विघटनपछि चितवनमा भएको एमालेको १०औँ महाधिवेशनपछि ओलीले केन्द्रीय सदस्य बनाए । ओलीको सत्ता र शक्तिका पुजारी बनेका प्रसाईंं तत्कालीन समयमा प्रचण्डसहितका नेताहरूमाथि गालीगलौजमै उत्रिए । तर, प्रचण्डले बेवास्ता गरिदिए । ओली प्रधानमन्त्री र कृष्णगोपाल श्रेष्ठ शिक्षामन्त्री भएका समयमा बीएन्डसीलाई सम्बन्धन दिलाउने अनेकौँ प्रयत्न भए । तर, उनको मेडिकल कलेजले सम्बन्धन पाउने आशा अधुरै भयो ।

गत वर्ष भएको निर्वाचनमा उनी झापाबाट चुनाव लड्न खोजेका थिए । तर, कांग्रेस, माओवादी केन्द्रसहितको गठबन्धन चुनावी मैदानमा उत्रिएपछि एमालेका लागि चुनाव अर्को चुनौती बन्यो । ओलीले झापामा आफ्नो सिट सुरक्षित गर्न राप्रपासँग गठबन्धन गरे र प्रसाईंले चुनाव लड्न चाहेको ठाउँमा राप्रपाका राजेन्द्र लिङ्देनलाई समर्थन गरे ।

यी घटनाबाट थप रुष्ट बनेका प्रसाईंले २०७९ फागुन ७ गते एमाले परित्याग गरेको घोषणा गरे र वित्तीय संस्थाविरुद्धको अभियानमा लागे । उनी यतिबेला ओलीका कट्टर विरोधीका रूपमा देखिन्छन् । लघुवित्त तथा वित्तीय संस्थाका मान्छेलाई गाउँमा आए च्याप्पै समातेर कालो मोसो दल्नेदेखि बैंकभित्र पसेमा डाँका मुद्दा लाग्ने भन्दै बैंकबाहिर कुरेर कालो मोसो दल्ने उर्दी गरेर चर्चा पाए ।

त्यसको केही समयपछि झापाको काँकडभिट्टामा पूर्वराजा ज्ञानेन्द्रलाई लगेर ‘राष्ट्र, राष्ट्रियता, धर्मसंस्कृति र नागरिक बचाऊ महाअभियान’ सुरुवात गरेका हुन् । यतिबेला उनले २० लाखसम्म ऋण मिनाहा हुनुपर्ने आवाज उठाइरहेका छन् । जसका कारण प्रसाईंका पछि लघुवित्त पीडित र बैंकका ऋणीको एउटा समूह पनि देखिन्छ । छोटो समयमा कमाएको सम्पत्ति, अस्वाभाविक चर्चा, दुबईका राजकुमारसँगको सम्बन्धदेखि अस्थिर राजनीतिक चरित्रसँगै राजतन्त्रको वकालत गरिरहेका प्रसाईंलाई सन्देहको दृष्टिले हेर्ने गरिन्छ ।

प्रकाशित मिति: बिहीबार, मंसिर ७, २०८० १६:१९