तीनकुनेमा महेश र बल्खुमा दुर्गा: कसको माहौल कस्तो ?

A+ A A-

संख्याकै हिसाबले तीनकुनेमा एमालेको तुलनामा बल्खुमा दुर्गा प्रसाईंका समर्थक बढी देखिन्थे । उद्दण्डता पनि प्रसाईंकै भिडमा देखियो । युवा संघको कार्यक्रम शान्तिपूर्ण रूपमै सकियो । प्रसाईंको प्रदर्शनमा झडप भयो, तनाव भयो । भेला हुने क्रममा नै कसैले प्रहरीतिर ढुंगा हानेपछि सानेपातिरको भिडमा भागाभाग भएको थियो ।

प्रदर्शनकारीलाई बल्खुबाट कुलेश्वरतिर रोक्न ठूलो संख्यामा प्रहरी तैनाथ थियो । प्रदर्शनकारी जबर्जस्ती गर्दै थिए । प्रहरीले उनीहरूलाई सम्झाउँदै, ठेल्दै रोकिराखेको थियो । माइकिङ गर्ने व्यक्ति भन्दै थिए, ‘हाम्रो शान्तिपूर्ण आन्दोलनलाई रक्तपातपूर्ण बनाउन घुसपैठ भएको सूचना आएको छ, सुरक्षाकर्मी साथीहरूले बुझिदिनुहोला ।’

सम्बन्धित समाचार

दुर्गा प्रसाईंको प्रदर्शनलाई प्रहरीले बनायो तितरबितर, केही घाइते

केही बेरपछि उत्तेजक भाषण गर्दै स्वयम् दुर्गा प्रसाईंले 'अब शहर छिर्ने' भनेर प्रहरीको घेरा तोड्न प्रदर्शनकारीलाई उक्साए । अनि स्थिति तनावग्रस्त बन्यो । प्रदर्शनकारीसँग घम्साघम्सी परेपछि प्रहरीले दर्जनौँ राउण्ड हवाई फायरसहित अश्रु ग्यास प्रहार गर्‍यो । त्यहाँ फेरि भागाभागको स्थिति बन्यो । प्रदर्शनकारीलाई चारैतिरबाट ढिम्किन नदिने गरी पुलिसहरू बसेका थिए । अर्थात् उनीहरूलाई बल्खु चोक वा मुख्य सडकमै सीमित गर्ने प्रहरीका रणनीति देखिन्थ्यो ।

सानेपाको पुलबाट हेर्दा बल्खु चोक परपरसम्म मूल सडकमा मान्छे नै मान्छे थिए । उनीहरूमध्ये अधिकांशले राष्ट्रिय झण्डा बोकेका थिए । भिडमा आफूआफू कुरा गरिरहेकाहरू नेताहरूलाई दुत्कारिरहेका थिए । उनीहरू भन्दै थिए, ‘यो सबै परिस्थिति अहिलेकै नेताहरूका कारण बनेको हो ।’

कोहीचाहिँ नेताहरू असफल भएकाले फेरि राजतन्त्रलाई मौका दिनुपर्ने कुरा आपसमा गरिरहेका थिए । कतिपय प्रदर्शनकारी पत्रकार र क्यामेरा देख्नासाथै ‘राजतन्त्र जिन्दावाद, गणतन्त्र मुर्दावाद’ को नारा लगाउँथे । त्यहाँ २० हजारभन्दा बढी मानिस रहेको दाबी भिडमै भइरहेको थियो ।

प्रसाईंले युट्युबमा जस्तै नेता र गणतान्त्रिक व्यवस्थालाई गाली गरे । बैंक तथा वित्तीय संस्थाको ऋण मिनाहा हुने आश्वासनमा विभिन्न जिल्लाबाट आएका अधिकांश सर्वसाधरण नारा लगाउन अलमलिएको प्रस्ट हुन्थ्यो । यसरी आउनेमा महिलाहरूको समूह बाक्लै देखिन्थ्यो । अनुमान लगाउन खासै मुस्किल पर्दैन थियो, उनीहरू कथित् लघुवित्तपीडित हुन् ।

प्रदर्शनमा छासमिस राजावादी देखा परे । पूर्वाराजाको परिवारबाट कोही पनि थिएनन् । राप्रपा अध्यक्ष लिङ्देन आएनन् । राप्रपाका प्रवक्ता ज्ञानबहादुर शाहीचाहिँ केही युट्युबर अघिपछि लाएर भिडमा मिसिए र प्रसाईंजस्तै उत्तेजक भाषण गरेर हिँडे ।

युट्युबतिर चर्का कुरा गर्दै प्रसाईंले ७ मंसिरको आन्दोलनबाट राजा फर्काउने दलील दिएका थिए । तर, उनको भिड बल्खु छिचोलेर कुलेश्वरतिर पनि छिर्न सकेन । न त पूर्वराजाको परिवारले प्रसाईंलाई पत्याएको देखियो । गणतन्त्रको विरोध र राजतन्त्रको पक्षमा रहेको राप्रपाकै संस्थागत समर्थन पनि प्रसाईंले पाएनन् । पूर्वराजा शाह ९ मंसिरमा एक विद्यालयमा निर्मित पृथ्वीनारायाण शाहको सालिक अनावरणका लागि झापा जान तयार छन् । जसलाई राप्रपाले आफूहरूको कार्यक्रम बताउने गरेको छ ।

अरु जे भए पनि प्रसाईंले एमालेलाई वा ओलीलाई चाहिँ देखाइदिए, दुर्गा प्रसाईं एक्लो छैन, उसका पछाडि भिड छ भनेर । आन्दोलन हेर्न पुगेकाहरू दिल्लगी गर्दै थिए, ‘बल्ल केपी ओलीले आफ्नै स्तरमा टक्कर दिने पात्र भेटे ।’

प्रसाईं प्रदर्शनको झडपमा प्रहरीको लाठी र अश्रु ग्यास लागेर १० जना घाइते भएका छन् । तीमध्ये २ जना सख्त घाइते भएको डाक्टरको भनाइ छ ।

तीनकुनेमा महेश बस्नेतको भिड

तीनकुनेमा भेला हुँदै गर्दा युवा संघले बाँडेका केही झण्डा बाटोमा फालेको देखियो । रातो टोपी लगाएका केही प्रदर्शनकारी असन्तुष्टि जनाउँदै थिए, ‘बोक्नु छैन भने नलिनु नि, यसरी बाटोमा झण्डा फालेर हिँडेछन् । दिने पनि उस्तै हुन्, सोधेर दिनु नि ।’ केही महिलाचाहिँ ‘भुजियाको भरमा ल्याए यार यहाँसम्म’ भन्दै हिँड्दै थिए ।

बल्खुमा दुर्गा प्रसाईंको भिड जम्मा हुँदै गर्दा तीनकुनेमा महेश बस्नेतले रातो टोपी लाएका कार्यकर्तामाझ भाषण सुरु गरे । कार्यक्रममा विवादित व्यक्ति आङ्काजी शेर्पादेखि कथित् झाँक्री प्रकाश भुजेलसम्म आइपुगेका थिए । बस्नेतले उनीहरूलाई 'न्यानो स्वागत' गरे । एमाले शीर्ष नेता कोही पनि देखिएनन् । प्रदर्शन सकिएपछि एमाले अध्यक्ष ओली तीनकुने पुगे, हात हल्लाए र बालकोटतिर हानिए ।

प्रदर्शनस्थलमै केही मानिस साउती गर्दै थिए, ‘यहाँ दुईदेखि तीन हजार मान्छे त छन् ?’ तीनकुनेमा अन्तिमसम्म रिपोर्टिङ गरेका सहकर्मी दीपेन्द्र अधिकारी भन्छन्, 'बल्खुमा खटिएका प्रहरी तनावमा हुँदा तीनकुनेमा सुरक्षाकर्मी फुर्सदिला देखिन्थे ।'

आधा घण्टाजति भाषण गरेका बस्नेतले दुर्गा प्रसाईंलाई सुन्नै नसकिने शब्दले गाली गरे । उनले पूर्वराजा ज्ञानेन्द्रलाई पनि गाली गरे, चुनौती दिए । उनको भाषण पनि प्रसाईंले बल्खुमा गरेजस्तै अराजक थियो । त्यसअघि युवा संघ र अनेरास्ववियुका कार्यकर्ताले नारा लगाए, ‘भ्रष्टाचारको विरोध, महिला हिंसाको विरोध, एमालेविरोधीको भण्डाफोर ।’ तर, भाषणका क्रममा वक्ताहरूले यी नारामा कम र दुर्गा प्रसाईंको विरोधमा बढी शब्द खर्चिए । लाग्थ्यो, प्रदर्शन नै दुर्गा प्रसाईंको विरोधका लागि हो ।

‘अब हामी कोटेश्वर जान्छौँ र त्यहाँबाट फर्केर फेरि यहीँ तीनकुनेमा कोणसभा गरेर कार्यक्रम सक्छौँ । त्यसैले कोटेश्वरबाट उतैउतै जाने वा बीचमा चियाखाजा खान जाने काम नगर्नुहोला’, आफ्ना कार्यकर्तालाई बस्नेतले अनुरोध गरे ।

भाषण सकेपछि एमाले कार्यकर्ता कोटेश्वरतिर लागे । त्यहाँबाट फर्केर उनीहरूले तीनकुनेमै कोणसभा गरी कार्यक्रम सिध्याए ।

दुवै पक्षको प्रदर्शनका कारण आज काठमाडौंको चाबहिल, गौशाला, बानेश्वर, कोटेश्वर, बबरमहल पुतली सडकदेखि ललितपुरको सानेपा, काठमाडौंको कालीमाटी, कलंकी, बल्खु क्षेत्रमा यातायातसँगै सर्वसाधारणको दैनिकी प्रभावित भयो ।

प्रकाशित मिति: बिहीबार, मंसिर ७, २०८० १६:०३